مرحب بك بك زائرنا علي منتديات نجوم الفن السوداني



 
الرئيسيةمكتبة الصورس .و .جبحـثقائمة الاعضاءالمجموعاتالتسجيلدخول

شاطر | 
 

 طارق اللبيب .. روايه الصكوك كامله

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الامبراطور حذو
Admin


عدد المساهمات : 223
تاريخ التسجيل : 22/11/2014
العمر : 26
الموقع : http://sudan.nojoumarab.net

مُساهمةموضوع: طارق اللبيب .. روايه الصكوك كامله   الأربعاء مارس 09, 2016 1:02 pm

رواية الصكوك .
الحلقة الاولى
بقلم طارق اللبيب
كان الصباح يتدثر بماء الذهب من تلك الاشعة الفاتنة التي ترسلها الشمس عند السادسة صباحا حيث جهزت بتول الانيقة شاي الصباح وذهبت لتوقظ النيام . فهم يأخذون غفوة بعد صلاة الفجر عادة .. زوجها شمس الدين
وبنتها فيروز 22 سنة وابنها محمد 20 .سنة ولكنها امتنعت ان توقظ سهى (الجميله جدا" لحد الدهشة والافتتان)
البالغة 17 عاما" ولما حاول محمد ان يجر من سهى الملاية التي تغطي بها جسمها منعته امه قائلة" .
سيبا يامحمد بتكون تعبانة خليها تأخد راحتها على مهلتها بتقوم انا بخلي ليها حقها في الشاي تعالو انتو اشربو .فيروز عليك الله سريع اشربي الشاي وكنسي سريع وتعالي غسلي عدة الشاي ..
فيروز متذمرة : والله انا زاتي ماعارفة اعمل شنو واخلي شنو . وبت العز دي مخلينها على راحتها ابرة في حيط مابتسويها .!!
الحمد لله غايتو مابنقدر نقول حاجة حكم القوي على الضعيف
فقاطعتها امها : يابت وطي صوتك اختك بتصحى لو صحت انا مابسيبك
انتي مالك بتغيري منها كدي اول مرة اشوف لي بت بتغير من اختها .
دي اختك الصغيرة على الاقل تعطفي عليها وتحني عليها .. غايتو بنات الزمن ده الله يسترنا منهن ..
الوالد شمس الدين واقف جم الوضاية بتسوك ويعاين بطرف عينو للنقاش الصباحي ويتبسم ..
ومحمد يتمطى ويتثاءب وكأنه لم يكمل نومه..
فيروز تحاول ان ترفع صوتها عشان سهى تصحى وتساعدها في الخدمة المردومة
وسهى شعرت بالضجة لكن استمرت في النوم وبقت تتقلب وشالت المخدة ووطوتها على راسها واضنيها عشان ماتسمع. وامها شكلها زعلت من التصرفات بتاعة فيروز . وحست انو سهى انزعجت .. قامت بتول الام قالت لفيروز : انتي الله ليك من سهى دي .. سهى دي قاطعة قلبك ومصرانك لانك لابتشبيها ولابتجي بي عندها.
هنا فيروز سكتت ساي وخاطرها انكسر ودنقرت في الارض وقامت بدون ماتشرب الشاي .. الاب قال لفيروز دي بقت اسطوانة ثابتة انتي بتغيري من اختك وامك بتشكرها وانت تزعلي غايتو الله يصبرنا معاكم ساي ..
بعدين انتي يافيروز المفروض تتقبلي الحقيقة البت دي اختك الاصغر وهي محتاجة لعطفك بدل ما تشيلي شوفك وتختيهو فيها خلي قلبك معاها ..
فيروز قالت لابوها حتى انت يا أبوي .. انا بحب اختي وبعطف عليها بس فرزة امي بقت ظاهرة وبتدلعها دلع خلاها طلعت لي في راسي وبقت مابتحترمني
وماعندها لي اي حساب
لدرجة انا حاسة اني بقيت مابحبها وماحاسة انها اختي. شنو يعني سماحة الشكل الما معاها اخلاق ولاتربية؟بعدين الجمال والقباحة دي قسمة من الله ومافي داعي الناس تميز بين البنات على اساس درجة الجمال ..
وبتقول في الكلام ده وهي منفعلة شديد ..
المهم بت العز الاسمها سهى صحت غضبانة شديد وشكلها سمعت جزء من كلام اختها القالتو .

..................................................................................................................................................................

الصكوك.. 2
استيقظت بت العز من نومها وهي عابسة ومطرمة..
وانفقعت بالبكاء.. والبكاء زاتو شكله مختلف ..
{نوع من النياص المخلوط بأحتجاج بي كلام غير مفهوم.}
مرة مرة تطلع كلمة مفهومة . ( انا ياماما بتك دي ماعارفاها مالها معاي أيييييييي .. انا بعد كدا انا بخلي ليها البيت ده .. ايييييي .).والباقي كتير مامفهوم . امها خلت الشاي وقامت قعدت جمبها تمسح ليها في دموعها وتحنس فيها بتقول ليها:
انتي ياسهى مابتعرفي الغيرة ؟دي غيرة وحسد
خليناها لي الله . عشان ماعندها لونك لاعندها شعرك ولاعندها عيونك..
انتي المفروض اصلك ماتبكي .
وتثبتي ليها انك ملكة بنات البلد مش ملكة البيت ..
وفيروز هناك تسمع في كلام امها مع سهى ..
وكل كلمة تنزل على قلبها متل الخنجر .
بتول جابت الشاي والبسكويت وقالت ليها قومي غسلي وشك واتسوكي وتعالي اشربي الشاي ماتشتغلي بيها ..
وطبعا فيروز عارفة انه البكا بتاع سهى بكاء مصطنع وهدفها ان انها تحنن قلب امها وتستدر عواطفها فقط وتطلع فيروز غلطانة .. ودايما بتعمل كدا ..
وفيروز مابيدها تعمل شي .. في النهاية ديل امها وابوها وما ممكن تخسرهم عليها بالصبر غير كدا مافي طريقه ..
دي كلها افكار داخلية تتوارد على ذهن فيروز ..
الايام دي ايام الاجازة فيروز اصلا في تانية اقتصاد في جامعة معروفة..
وسهى قدمت في نفس الجامعة في كلية مختلفة وطبعا ده لقاء مدبر عشان بتول وشمس الدين عارفين انو فيروز واعية وعايزنها تكون مع اختها في جامعة واحدة
عشان تراعيها وتراقب تصرفاتها ..
وطبعا ماوصوها بالكلام ده لكن هم متأكدين انو فيروز من نفسها حتعمل الحاجة دي.
دي من ناحية السيرة الاكاديمية لانه في حاجات كدا حتحصل في الجامعة برضو لازم نكون متابعنها .
بعد كم يوم كدا من حادثة الشاي سهى وفيروز كانو معزمين خطوبة بت خالتهم باللفة كدا .. وسهى ماكانت جاهزة يعني هدومة لامغسلة لامرتبة
قامت من الصباح ماسكه يدها و تئن ومشت لامها قالت ليها ياماما انا ماشة معاكم الخطوبة .
امها قالت ليها ليه يابتي كدي الخطوبة بتكون مسيخة انت نور الحتة كلها والبنات كلهم بنتظروا جيتك عشان يشوفو ابداع الخالق ..
وفيروز قاعدة هناك خاتة يدها تحت حنكها كدا تعاين متمحنة .
سهى قالت لامها : بس ساماما انا جاهزة وهدومي لامغسلة لامكوية
ويدي واجعاني اظني كنت راقدة غلط .
وماعندي اخت تجهز لي هدومي ..
ودي كلها خطة عشان هي كسلانة وعايزة فيروز تغسل ليها هدومها وتكويها ..
امها قالت ليها ليه؟ فيروز اختك حبيبتك قاعدة ..
طبعا فيروز اتخلعت من الخطة المحكمة لانها فاهمة اختها
وعارفه امورها ..
امها كروركت ليها .. يافيروز يافيروز ..
ردت ليها نعم يا امي . قالت ليها عليك الله جهزي غيار لاختك عشان تمشي معانا ..
قالت ليها حاضر يا امي .. وقامت البت المسكينة وبدأت في التجهيز ..
سهى جات عاينت ليها بالشباك ورسلت ليها بوسة من بعيد بتاعة سخرية كدا عارفين شكلها كيف ..؟
الزول بفتح يده ويقبلها ثم ينفخ عليها باتجاهك ..
طبعا" فيروز اتغاظت جدا ودمها فار لكن صابرة ساااااي عشان امها ..
والام ماقادرة تحس بالحاصل..
اتصل ابوهم من الشغل وقال انا مابقدر اوديكم للخطوبة دي
حيجيكم شرف ودعمتكم يوصلكم ويرجع قالو جميل ...
شرف ده (شرف العايلة) وزول اخلاق ودين وقروشو النار ماتأكلها. عنده شركة بتاعة اعلانات مشهورة . وعنده املاك وحاجات كتيرة .. وكان نفسه يشوف بنات خالة سمش الدين لانه نفسه يتزوج من الاسرة ..

........................................................................................................................................................................

الصكوك 3
امسى المساء بطيئا" والساعات التي اوصلت اليه كانت طويلة ..
وفيروز ارتدت ملابسها وجاهزة..
انسانة بسيطة مرتبة ماعاملة اي زيادات ورتوش في وشها ..
جمالها طبيعي ومتوسط ...
اما سهى فجمالها وملابسها وكل شي فوق العادة .. حتي طريقة كلامها وكمية التكسر ما طبيعية حقيقة انها ملفتة ..
فيروز تنظر الى سهى وتتبسم . (معجبة بها وبضيائها) .. برضو بتحبها سبحان الله . لما سهى انتبهت انو فيروز بتعاين ليها فيروز قبلت كدا بوشها.
وعملت فيها بتحك في رقبتها
سهى انتبهت ليها وصرت وشها وافتكرت انو فيروز مغيوظة من زيها وملابسها ..
فيروز قالت يا سهى انتي اتحصنتي ؟ الناس دي عيونها خطيرة وانتي ماشاء الله عليك الليلة طالعة بتجنني ..
سهى قالت ليها : اول المفروض اتحصن من ناس بيتنا ناس بره ماغيرانين مني ..!!
امها قالت ليها ياسهى نحن الكلام ده موش انتهينا منو خلاص ..
نحن ماشين على بيت ناس ..
فجأة ا سمعو صوت البوري جنب الباب (ده شرف جا ) سريع طلعو ..
الام همها تركب .. وسهى مقهية في الولد وتعاين ليهو من راسه لي كرعيه
فيروز قالت ليهو .. خش ياشرف اشرب ليك حاجة الوقت لسه معانا ..
امها انتبهت قالت ليهو.. الله يخرب بالي انا الماعزمتك ..
عليك الله تدخل .. فيروز عليك الله جهزي ليهو عصير سريع ..
قال ليهم لالا انا ماعايز اي حاجة لو مصرين جيبو لي موية سادة بس
خش جوه جابو ليهو الموية وشرب وهو بعاين لي سهى متمحنة تعاين ليهو وفيروز قاعدة في البرندة لغاية ماجات شالت منو الكباية والجك وطلعو ..
الام ركبت معاهو قدام وسهى وفيروز ركبو ورا ..وبدت الحجة تتونس مع شرف كيفك ياشرف انا طولت منك شديد اخر مرة جيتنا .
سهى دي كانت في سنة رابع اساس . وهسي خاشة الجامعة ..
قاليها : سبحان الله الوقت بجري بسرعة . والله بس انتي عارفة انا سفري كتير وغالبية وقتي في الدول البرة حتى ناس بيتنا بشوفو من الشهر للشهر ويومين تلاتة وتاني برجع
قالت ليهو : انت مش عندك شركة اعلانيه هنا .. ؟
قاليها نعم لكن دي ماسكها المدير بالنسبة وانا مابشوفها الامن السنة للسنة
في جرد الارباح ..
لكن اكتر حاجة شاغلاني بسافر الصين وماليزيا واليونان وغيرها لمهام تجاريه..
.
بتول شغالة .. الصلاة على النبي ياولدي . ان شاء الله ربنا يديك بت الحلال البتسعدك .
هنا شرف مسك مراية العربيه الفوق ليهو ووزنها على الجماعة الورا وبقا يعاين ويتبسم
وقال ليها : اظنه ربنا اداني بت الحلال ..
فيروز بتعاين بباب العربية للشارع .. وغير مهتمة بهذا الحوار ..
وسهى تعاين ليهو بالمراية وتتبسم وتتخجل ومرة تدنقر وتاني تعاين ..
اول ما وصلو مكان الخطوبة ونزلو . مشو شوية كدا شرف نادى على سهى
ياسهى ياسهى تعالي دقيقة .. جاتو تتكسر وتتفدع هههه ..
وامها تعاين وتتبسم وهمهمت بكلمات لكن فيروز سمعت كلماتها ..
هسي الكلمات مابقولها بعدين خلونا في المهم
هسي عايزين نشوف شرف بقول لبت العز دي شنو؟
وهي زاتها مستعجلة عايزة تعرف .
المهم لما وقفت قدامو وقالت ليهو نعم ياشرف قاليها عايز اقول ليك كلام
بس خليهو يكون سري بيني وبينك ..
امك وفيروز مايعرفوه ..
قالت ليهو حاضر والله أوعدك مافي زول يعرف ..
قال ليها انا بجي راجع بعد ساعة هنا.. حاولي زوغي تعالي لي انا عازمك على مكان حلو بس نص ساعة واجيبك راجعة ..
قالت ليهو حاضر من هسي ح احسب ليك بالدقيقة ..
ودور مشى ..
امها سألتها قالت ليها قال ليك شنو الولد الجميل ده .. الولد الناجح ده..ماشاء الله عليهو ..
قال ليك شنو ياسهى .. اتقدم ليك؟ .. طلبك للزواج ؟ هو مالو مستعجل كدي مايصبر عشان تعرفيهو ويعرفك ....
قالت ليها ماطلبني لزواج يا ماما .
قالت ليها اها قال ليك شنو ؟ قالت ليها مابقول

.................................................................................................................................................................

رواية الصكوك
الحلقة 4
بقلم طارق اللبيب
لما رفضت سهى التحدث . دخلن التلاتة على مكان الخطوبة . تنظر الى ساعتها تترقب مرور الدقائق البطئ . سهى المستعجلة الى لقاء شرف . الكل مشغول في الخطوبة ومقابلة الاخرين .. الا فيروز فهي تنظر الى اختها وتتابع قلقها وكثرة نظرها الى ساعتها ..
جات قعدت جمبها قالت ليها سهى انتي مالك؟ شرف قال ليك شنو ؟
قال ليها انت الحشرك شنو في الموضوع مابوريك .
قالت ليها يا سهى نحن شرف ده اول مرة نتعرف بيهو ماتثقي شديد في الناس . اتريثي . اي هو صح ود عمتي لكن نحن عمتي زاتها ما مواصلانا
زمان كان في مشكلة بينها وبين امي . وانا ما مطمئنة .
احكي لي . عليك الله .
قالت ليها مووووووتي مابحكي ليك .. هسي انتي يعني خايفة علي من شرف.؟
قالت ليها ياسهى . ماكدا بس الحذر واجب على الاقل ماتخليهو يحس انك خفيفة .
سهى قالت ليها كمااااااان !! .. انتي شايفاني خفيفة .. ؟ ماعندك معاي شغلة اهتمي بشؤنك انا مليت منك ومن متابعتك لي.. !!
فيرووز احست باحباط وخيبة أمل .. وقامت مشت ..
الساعة اوشكت على الانقضاء .
ومازالت فيروز تراقب اختها ..
سهى حست بان فيروز مراقباها ..
قامت سهى كانها ماشه الحمام . وفيروز متابعة .. اول مالقت فرصة انو فيروز انشغلت . طلعت براااحة وقفت في الشارع واتضارت في ناصية وبقت تعاين في الشارع من بدايتو لنهايتو .
مع مرور الدقية الاولى بعد الساعة شافت عربية شرف طوالي ظهرت ليهو اشرت ليهو وجاها وركبت ..
هنا في بيت الخطوبة بقت فيروز تتلفت لاختها مالقتها ..
وجرت على الحمام لقتو فاضي ..
جات سريع لامها مزعوجة جدا ..
يا أمي يا أمي ..
سهى مافيشة . فتشت ليها مالقيتها ..
امها قالت ليها .. يعني حتمشي وين سهى بتكون هنا وللاهناك مع صاحباتها وبنات خالتها ..
قالت ليها لا يا امي انا من قبيل براقب فيها بتعاين للساعة
وكانت مقلقة لغاية ماطلعت ..
وانا حاسة انها مشت لي شرف ..
امها قالت ليها .. وانتي مراقباها ليه؟
ماتمشي ليهو كان ماشة مش ودعمتها ؟
انتي مالك شايلة شوفك وخاتاهو في اختك .. خلي البت في حالة
قال ليها بس يا أمي ..... امها فاتت قبل فيروز تكمل كلامها
فيروز قعدت حزينة كدا وهي تقول سبحان الله انا ياربي ليس الناس ديل دايما بفهموني غلط ..
الله يسامحك يا امي ..
المهم خلوني نمشي للبت الرهيبة ديك نشوفها عملت شنو مع الاخ شرف .
مشى وهو بتونس معاها في العربية اسئلة معروفة ومعادة ومكررة
بتقري وين ومدرستك كان اسمها شنو؟
وجبت كم ؟ وقدمتي وين وكدا ..
وصلو مكان عام كدا قال ليها تعالي نشرب حاجة
وقعدت في الطاولة وبدا يسأل فيها ..
فيروز بتقرا وين ؟
قالت ليهو في نفس الجامعة الانا قدمت فيها .
قال ليها فيروز دي اصلا ما اتخطبت ؟ او في حياتها الخاصة مافي زول ؟
قالت ليهو فيروز دي قصتها طويلة ياشرف ..
قال ليها احكي ..
قالت ليهو اولا عندها واحد بتحبه حب مبالغه من اولاد جيرانا
وبتطلع معاهو طوالي وامي يوميا بتتشاكل معاها وشايلة صوره في موبايلها
وعندها عدم مبالاة غريب . يعني قبل تلاتة يوم جات داخلة البيت الساعة واحدة صباحا".(طبعا كله كذب)
قاليها طيب خالي ماعندو خبر بالمواضيع دي ؟
قالت ليهو ابوي ماعندو اي خبر وامي بتدس عليهو اي حاجة
تتخيل قبل شوية انا وامي بنتكلم معاها عنك
قالت شنو؟
قال ليها اها قالت شنو؟
قالت ليهو قالت : شرف ده مستحيل انا افكر فيهو لانو عمتي زمان كان عندها مشكلة معاك يا امي وهسي بتكون حاقدة علينا .
شرف قاليها فعلا كان في مشكلة بس انتهت زمان وهسي طبيعيين .
قالت ليهو ..
عارف انا قلت ليها شنو ؟
قال ليها اها قلتي ليها شنو؟
قلت ليها مستحيل عمة تحقد على بنات اخوها ..
شرف اتبسم وقال ليها خير يا سهى انتي انسانة واعية مع انك صغيرة
انا سعيد بالتعرف عليك ..
قالت ليهو انا الاسعد والله انا طايرة بالفرح كوني هسي قاعدة معاك .
جابو العصير وشرف سرحان بعيد . وهي يتعاين ليه وبتشرب لمن الكباية
فضت والمصاصة بقت تشخشخ حتن انتبهت ..
قالت ليهو وديني سريع عشان فيروز بتكون كايسة لي اصلها مراقباني زي بتاع الامن .
قاليها يلا نمشي بس زي ما اتفقنا ووعدتيني مافي زول يعرف انك لاقيتيني واتكلمنا ..
قالت ليهو لا انت ماتحكي الحكيتو ليك ..
قاليها اتفقنا ..
ومشى نزلها وزاغت في ناس الخطوبة وقعدت تتونس مع البنات
كانها مامشت حتة..
اصلا ما أخدت اكتر من 35 دقيقة ..
فيروز شافتها جاتها .. سالتها ..
مشيتي وين يا سهى؟ قالت ليها قاعدة اصلا ما طلعت اي مكان ..
في واحدة من البنات قالت ليها ياسهى ماتكذبي..
هسي انا في المزيرة شفت عربية نزلتك ورجعت ..
فيروز قالت ليها ياسهى انا ح أكلم ابوي بالموضوع ده ..
والليلة والليله ... ديل البنات قالن كدا

..................................................................................................................................................................

رواية الصكوك .
الخلقة 5.
بقلم طارق اللبيب .
رجعت الام وبناتها من مكان الخطبة مـتأخرات ووجدن الاب يغط في نوم عميق .
فيروز ذهبت لغرفتها والام ذهبت الى غرفة الملابس .
اما سهى فتوقفت امام والدها النائم ..
وضربت الطربيزة برجلها بالقصد . وسقطت كباية النيكل على السراميك ..
ابوها طبعا صحا .. ودي الحاجة العاوزاها هي ..
ابوها : في شنو ياسهى الضجــه شنو ..؟
سهى : سوري يابابا الكباية وقعت من الطربيزة .أأسفة حبيبي ..
شمس..: ولايهمك .. اها كيف الخطوبة كانت ؟
قالت ليهو الخطوبة حلوة بس في كلام احلا منها وسري ..
عايزة اقولو ليك انت بس ماعايزة امي وفيروز يسمعوا ..
قال ليها اقفلي الباب وتعالي قولي لي ..
قفلت الباب وجات قالت ليهو ..
شفتا يا بابا بعد ما شرف وصلنا على بيت الخطوبة ناداني وقال لي انا برجع ليك بعد ساعة ..
زوغي ولاقيني .. وفعلا زوغت من فيروز ولاقيتو ..
ومشينا الحتة الفلانية وقعدنا وطلب عصير ..
وقال لي انا عايز اتزوجك بتقبلي بي ولالا ؟ عشان اطلبك من ابوك ؟
انا قلت ليهو مابقدر اديك راي هسي .. وطبعا يا بابا انت صحبي لازم اشاورك
ارد عليهو اقول ليهو شنو؟
ابوها طبعا" اتكيف جدا من صراحة بتو معاهو
قال ليها اولا انتي انسانة واعية ومخك اكبر من عمرك
وانا مبسوط منك ..بس في حاجة..
انت لسه صغيرة وقدامك مستقبل لو دخلتي في موضوع
عرس هسي
تاني مابتقدري تواصلي دراستك ..
قالت ليهو خلاص انا بقول ليهو موافقة بس عايزة اقرا .
لو عايز ينتظرني تمام ولو ماعايز ينتظرني ما مشكلة
وانت لو جاك قول ليهو نفس الكلام . اتفقنا يابابا
قال ليها اتفقنا ياسهى ..
قالت ليهو في حاجة مهمة قبل ماتجي امي ..
انا عاهدتو انو الكلام ده يكون سري بيني وبينو
انت ماتكلم ماما ولاتكلم فيروز ولاتفتح لي شرف الموضوع.
الا يقول ليك هو براهو لغاية الموضوع يكون
وانا بوافيك بكل صغيره وكبيره واضح .
قال ليه اتفقنا ..
وطلعت على كدا مشت نامت..
بكرة الصباح في جلسة الشاي المعتادة .. فيروز افتتحت كلام ..
يابابا . انا عايزة اقول حاجة . امبارح بالليل ونحن في الخطوبة سهى طلعت من المكان وركبت

عربية ورجعت
ممكن تسألها مشت وين .؟
قال ليها : ايوة يافيروز انا عارف .. شكرا" لي اهتمامك ..
سهى ختت يدها فوق خشمها وكتمت ضحكة
حتى خرج صوت الضحكة من انفها ..
وفيروز اتحرجت حرجة دخلت في ضفورها ووانكمشت
ونفسياتها مرقت من الشاي ومن القعدة وقامت مشت .
وعرفت انو سهى حتكون كلمت ابوها . بس متين كلمتو ؟
ياربي ..نحن جينا لقيناهو نايم .. ياربي تكون صحته من النوم ؟
حكاية غريبة ..!!!
او يمكن تكون حكت لامي وامي حكت لابوي ؟
المهم بقى مخها يودي ويجيب وهي ماعارفة ابوها عرف من وين ؟
اها بعد فيروز طلعت بتول قالت ليهو يخسي عليك ياشمس الدين
احرج البت كم وانا زي الاطرش في الزفة
ماتورورني معاكم عشان اعرف ..
وشربو الشاي وبتول دخلت عدة الشاي وهنا اغتنمت سهى الفرصه
وقالت لابوها بعدين يابابا انا ممكن امشي لناس عمتو معاي صحبتي ..؟
لانو فيروز لو مشت بتبوظ لي المواضيع ..
وعايزة اوريهو راي في سريه تامة رايك شنو؟
قال ليها مافي مشكلة ناس عمتك تمشي ليهم في اي وكت ..
وطبعا" دي فرصة تغزل فيها السعف مع الصوف ..
العصرية كدا ضربت لصاحبتها اسمها فاطمه
وقالت ليها لازم تجي معاي مشوار ومابقبل منك اي عذر
فاطمة قالت ليها كويس بجيك بس مايكون مشوار من مصايبك وبلاويك ..
المهم جاتها وركبو مشوا مشوار ناس عمتها ما أكتر من نص ساعة ..
ووصلو .. ولقو شرف قاااعد ودي الفرصة ..
البت دي شكلها حتلعب لعبة ماطبيعية وشرف ده زول برئ جدا وطيبان
ان شا الله بس مايطلع ضحية ..


..................................................................................................................................................................

رواية الصكوك ..
الحلقة 6 .
بقلم طارق اللبيب ..

سلمت سهى على ناس البيت وقعدت مع عمتها شويه
لغايه ما اكرموها عندها بت عمتها اسمها ليالي مابتريدا
كلو كلو .. لانها عارفاها مدلعه واخلاقها سيئه . اما عمتها
فمستعربه ومبهوته .لانه قريب التمنيه سنوات مافي زول
خش بيت التاني بعد شويه كدا شرف قعد في برندة
بعيده كدا وناداها مشت ليهو قال كيفك وكيف ناس
البيت ..
قالت ليهو تمام الحمد لله انا قلت لبابا انا
معجبه بشرف وبابا فرح بالحاجة دي ..
قال ليها معجبه بي كيف يعني ؟
قالت ليهو معجبه بشخصيتك وكدا .
قاليها نجي من الاخر يا سهى الموضوع كالاتي انا معجب
بي فيروز جدا ومادام قلتي عندها علاقة مع انسان انا
قفلت على الموضوع .. اما انتي فوالله ماشايف فيك عيب
بالعكس اي واحد يتمناك لكن انا ما مناسب ليك ولا
انتي.. ضيفي على ذلك انتي صغيرة جدا وانا ماعندي
طريقة انتظر ..
قالت ليهو طيب ممكن تديني فرصه اتكلم معاها
احتمال توافق بيك .. قال ليها انتي قلتي بتحبه صح ؟
مادام بتحبو لو وافقت بي تبقى دي انسانه مجرده من
الاحاسيس وعايزة تديني جسد من دون روح وكدا بتكون
دمرت تلاته مع بعض. انا .وهو .ونفسها..
وانا اساسا مسافر فارجوك الموضوع ده نقفل عليهو كدا.
المهم شكلها اقتنعت إنوموضوع الموضوع ده انتهى
ولا هي لمت في شرف ولا فتحت الطريق لاختها عشان
تشوف حياتها ..
وفيروز رب العالمين مابنساها وتعال شوف .
ورجعوا البيت في الطريق صحبتها سألتها قالت ليها
مالك مستاءة كدا وحزينة قال ليك شنو العبيط ده
تصدقي اصلي ماحبيتو ؟
شوفتو بتكلم معاك بيديهو وكرعيهو .. وانت صابه فوقك
مطره ..
قالت ليها احكي ليك على سر طبعا هو عايز فيروز وانا
كذبت عليهو عشان انا عايزاهو قلت ليهو فيروز كيت
كيت ..
فاطمة قالت ليها حرام عليك يا حاقده هههه ضحكوا
الاتنين والموضوع انتهى ..
رجعوا البيت وكت وصلت لقت فيروز مافي قالت لامها
فيروز وين .. الكلام ده زي الساعة تلاتة ضهر ..
قالت ليها فيروز ومحمد مشوا لابوك في السوق ودو ليهو
قروش شكله عنده بيعة حلوة ..
قالت ليها محمد اوكي لكن فيروز الوداها شنو؟؟
قالت ليها فيروز عايزة عباية من السوق مشت مع
محمد تشتريها وترجع ..
قالت ليها وانا عبايه مافي لي ..
امها قالت ليها دولابك مليان عبايات وماقاعدة تلبسيهم
وفيروز المابتطلع الابعباية عندها اتنين بس واحدة تلبسها
والتانية تغير بيها ..
قالت ليها مااااابعرف انا عايزة عباية جديده ..
امها شالت التلفون وضربت لابوها وقالت ليهو سهى
عايزة عباية خلي فيروز تشتري اتنين ..
المهم لمن وصلت فيروز على مكان الوالد في واحد صديق
الوالد ومن التجار الفي السوق شافها ..
ونوى في قلبو انه البت دي لازم تكون مراة ولدي ..
لكن ماتكلم ابدا مع ابوها بس راقبها وشاف طرقة كلامها
وقعدتها وطول نظرها الى الارض ..
وكيفية كلامها مع ابوها .. وحس بقيمة التربية ..
الراجل ده ياجماعة عنده ولده اسمه هشام .
دكتور اتخرج من كلية الصيدلة وزول جاهز لدرجة .
وابوه قال ليهو انا بختار ليك وهو منتظر اختيار ابوه
لمن ابوه كلمه بالموضوع ..
حددو زيارة لبيت ناس سمش الدين الاتنين عشان
يشوفو البت ..
في اليوم الهم كانو جايين لفيروز عشان يشوفوها هي
كانت مافي مشت وين .. وسهى هي الموجوده في البيت
ودي فرصتها برضو ..
لكن فيروز مشت وين ؟؟؟ مشت للمشوار اللي حيقلب
موازين القصة


..............................................................................................................................................................................


رواية الصكوك .
الحلقة 7
بقلم طارق اللبيب
فيروز مشت وين؟؟
قبل مايجي هشام وابوهو لي ناس سمش الدين او حتى قبل ما يتصلو انهم جايين (طبعا ماكلموهو جايين لشنو) . كان قبليها عمتهم اتصلت وقالت عايزة محمد وفيروز يجوني يقيلو معاي لان الزياره بتاعة سهى اثرت فيها شوية وبعثت الحنية المنطوية سنين .. وابوهم فرح وهم مشوا .. بس طبعا شرف مافي وبعد شويه حنشوف مشى وين..
يلا خليكم متابعين معاي البحصل هنا في بيت شمس الدين ابومحمد ..
عمك عصمت ابو هشام قال لي شمس الدين ..
انت عندك كم بت ماشاء الله ؟.. قال ليهو عندي بتين والله والحمد لله والولد الشفتو ده ..
قال ليهو انا عايز اناسبك وتدي ولدي ده واحدة من البنات .
قال ليهو والله في واحدة والتانية مافي ، مشت معاها اخوها لي ناس عمتهم ..
وهم بتكلموا كدا جات سهى شايلة العصير ولابسه كويس وهي ماعارفة الناس ديل جو لشنو؟
لكن سمعت طرف الكلام وعرفت انو جايين يخطبو .
يلا لمن هشام شاف سهى جاتو خلعة واندهش اصلو زي ماحكيت قبل كدا هي انسانة جميلة جدا ..
البت سلمت العصير لابوها ورجعت قام هشام بدون مقدمات قال لي شمس الدين
على بركة الله .. انا قبلت بالشفتو وبس ..
هنا طبعا" عمك عصمت عندو كلام .وهو انو البت الشافها وعجبتو ما ياها دي
كانت فيروز ..
وبرضو شمس الدين عنده كلام ..
في الوكت ده كانت البت المسلطة واقفه جنب الشباك بتسمع في الكلام ..
وطبعا" الود الدكتور عجبها شديد ..
يلا شمس الدين ابوها قال: والله ياهشام يا ابني البت دي ودعمتها قال عايزها وكلمها وهي موافقه وعايزاهو وشكلهم كدا متفقين .
بس ماكلمني لسع ولاجاني .. فلغاية مانشوف رايه شنو في الموضوع
انا برد ليك ..
قام عمك عصمت قال ليهو ما: في مشكلة يابومحمد .نحن ننتظر التانية لمن تجي مامستعجلين نقوم نصلي العصر ونشرب الجبنه لغاية الوكت جات الاولاد بكونوا جو .
يلا هنا طبعا" سهى ندمت ندامه شديده على الكضبه ..
يعني هسي كلامها لابوها انو شرف عايزها ضراها ضرر شديد
لو ماكان كدا كانوا قبلو بيها واتخطبت للعريس اللقطه ده
المهم فضلو منتظرين قبل المغرب بشوية محمد وفيروز وصلو
وطوالي قبل ماتقعد ابوها ناداها .. تعالي يافيروز جات وسلمت وجلست
قال ليها ابو هشام ده طالب يدك لولده عندك مانع؟
قالت ليهو انت اللتشوفو مناسب يا ابابا انا موافقه عليهو بس انا عايزة استخير
وبرد ليك اكان بكرة او بعد بكرة ..
كلهم قالو : على بركة الله على بركة الله ..
شمس الدين قال ليهو يا ابوهشام ان شاء الله مايحصل الا الخير ونحن مادايرين احسن منك ومن ولدك ..
وهنا طبعا" سهى طارت من الطبخه ..
وشرف ودعمتها سافر ماليزيا مابجي اقل من سنتين ..
والليل داك كلو سهى مساهرة تحسب في النجوم
وندمانة سافه التراب .. وتقول في نفسها شوف بالله برااااااااي سويتها في روحي
هسي لو ماقلت لبابا شمس عايزني كان خطبوني انا وفيروز الهبلة بارت ههه
طبعا" لمن طلعوا ابوهشام وولده .. قال ليهو يا ابوي انت البت العايزها لي دي شكلها بالجد مهذبه ..
قال ليهو ياولدي الصغيرة دي طايشة ساي ماشايفها بتتلفت كيف لسه مانجضت
انا ياولدي عاجباني الكبيرة دي وياها الشفتها مع ابوها
اكان داير رضاي اما هي او تاني ماعايزين منهم حاجة
اتفقنا ياولدي قال ليهو تمام يا ابوي ..
ومرت بكرة وبعد بكرة وكل مرة فيروز ابوها يسالها اها يابتي
الخيرة قالت شنو؟
المهم في اليوم التالت فوق جلسة الشاي جاتو براها وقالت ليهو يا بابا ..
انا خلاص بقيت على راي محدد في موضوع هشام
قال ليها دقيقة اجيب التلفون ماتقولي لي النتيجة عشان طوالي اتصل عليهم
واوريهم بي كلامك بس لحظة ودخل يجيب التلفون ..
وكلهم منططين عيونهم بتول وسهى ومحمد عايزين يشوفو فيروز رايها شنو

................................................................................................................................................................

رواية الصكوك
الحلقة 8 .
بقلم طارق اللبيب
طبعا" فيروز لمن ابوها جاب التلفون من جوه وجا عايز يشوف رايها الاخير
قالت ليهو : طيب يابابا انا عايز أسالك سؤال ..
هو هشام في البداية قال عايز منو؟ انا ولا سهى؟
قال ليها : اساسا هو شاف شاف سهى وقال عايزها بس انا عندي سبب مانع ..
قالت ليهو اها ماممكن تحكي لي السبب . يابابا ..؟
قاليها لا ماممكن..
قالت ليهو . : طيب .. اذا كان على كلام شرف القالو ليها ..
هي فهمت كلامه غلط يابابا ..وهو كان بعبر ليها عن اعجابه بيها وبي اخلاقها وبس ..
وهو لو كان عايزها فعلا ،ماكان سافر قبل مايكلمك..
(عجيب) . !!
اها طيب فيروز الكلام ده جابتو من وين ؟؟..
انتبه ....!!
لما محمد وفيروز كانو ماشين لناس عمتهم ..
محمد جاهو اتصال من فاطمة صاحبة سهى.. الكان مشت معاها لناس عمتها متذكرنها؟؟..
. فاطمة دي عندها بداية علاقة مع محمد ..
بتتصل عليهو وبتراسله وكدا ..
اها اليوم ده اتصلت عليهو وحكت ليهو الكضبة العملتها سهى ، انها قالت لشرف فيروز عندها زول .. وقالت لابوها شرف عايزني ..فاطمة رصت لمحمد السر الكان بينها وبين كلللو ..وفضحتها لاخوها فضيحة السيح والتلاقيح ..
(دي صداقة السجم والرماد هه)..
ومحمد كلم فيروز بالكلام .. لكن فيروز حللّفت محمد انو مايتكلم .. عشان مايدخّل سهى في مشكلة مع ابوها ..
وهم الاتنين محمد وفيروز بقو كاشفين لعبة سهى ..
اها لمن مشوا لناس عمتهم عمتهم قالت ليها: يافيروز ان شا الله ربنا يتم ليك على
خير قالوا في واحد من جيرانكم عايزك ..
قالت ليها والله الا يكون كلم ابوي بدون ما انا اعرف..
بس انا ماعندي علم بالحاجة دي ياعمتي .
عمتها قالت ليها والله ده الكلام الحكته اختك لي شرف..
شرف كان داير يجن عديل يابتي وقت قالو كدي..
لانو من يوم شافك وانتي ما مرقتي من خشمو..
وبتحسر على انك مرقتي من قسمتو ..
ده كلو الكلام ده حصل يوم زيارة فيروز ومحمد لناس عمتهم ..
ـــ
يلا طبعا لازم تكونوا في الصورة انو فيروز لما جات ولقت ناس هشام
كانت كاشفة الكضبة بتاعة سهى..
اها لمن جو وطلبوها هي ما كانت عارفة انهم اتكلموا في سهى قبليها .
الكلمها منوووو؟؟
هي في اثناء مابتعمل في الاستخارة ..
سهى قالت ليها : يافيروز الجماعة ديل اساسا ماكانوا عايزنك انتي..
كانوا عايزيني انا بس بابا قال ليهم ود عمتها عايزها ..
فلذلك يافيروز هشام ده اصلا طلبك تنفيذ لكلام ابوه الشافك مع بابا ..
فيروز قالت ليها .. وهل فعلا شرف عايزك ياسهى؟
قالت ليها :ماعايزني ولاحاجة كضبت على ابوي ساي وضريت روحي وجات من حظك انتي .. بختك افرحي اها ..!!!
فيروز قالت ليها ماتشيلي هم حبيبتي ..
انا بتصرف واصلح ليك الامور .. (سبحانك ربي) ..
ــــ
يلا هنا فوق الشاي فيروز بتتكلم مع ابوها ..
قالت ليهو انابقترح يابابا ماتفوت الفرصة على سهى اتصرف اي تصرف
لانه هشام معجب بيها هي وأنا طلبني طاعة لابوهو بس صح؟
ابوها قال ليها فعلا ده الحصل يافيروز ..
لكن هسي انا اتصرف كيف؟
وانتي ياسهى بتكذبي علي ليه ؟؟ ليه تقولي لي شرف عايزني ..
وسهى ساكته ومدنقره صابه فوقها مطرة ..
طبعا فيروز ماكلمت ابوها ولا أمها انو سهى كذبت لي شرف وقالت ليهو انو فيروز عندها علاقة مع ود الجيران .. حتى منعت محمد انو يتكلم ..
ولا كلمتها هي انها كشفتها . بس بقت ساكتة .
فيروز قالت لابوها .. سيبها يابابا .. وامشي كلمهم قوليهم فيروز رفضت وسهى ود عمتها موضوعه ما اتوفق .. فانتو لو عايزين سهى وباقين عليها ..
يكون خير وبركه ..
انا يابابا ما ممكن اقبل بواحد معجب بي اختي..
ولا من الادب واحدة تفكر في زول بحب اختها ..
طبعا" قاصده توصل رساله لي سهى بالكلام ده.. لكن ديك غبيه ومابتفهم ..
طوالي شمس الدين اتصل بالتلفون على هشام ..و ما إتصل على ابوه ..
وقال ليهو هشام يا ابني ..فيروز رفضت الموضوع بعد الاستخارة وسهى ود
عمتها موضوعه ما اتوافق معانا .. فانتو لو عايزين سهى وباقين عليها ..
يكون خير وبركه .. وانا منتظر ردكم .

.................................................................................................................................................................

رواية الصكوك.
الحلقة 9
بقلم طارق اللبيب .

طالت المدة ولم يرد هشام ولأ ابوه امكن لمدة اسبوع او اكتر ..
والجامعة قربت تفتح
وطبعا سهى ح تمشي المستوي الاول وفيروز بتكون في تالت..
بعد اسبوع بالتمام هشام اتصل على بتول في تلفونها ..
وقال لها لو ممكن انا عايز اتكلم مع سهى .
طوالي بتول شالت التلفون وودته لسهى وقالت ليها ده هشام ..
طبعا الخفيفة دايرة تطير من الفرح .. لانها كانت في الايام الفاتت منتظرة الرد وكل ناس البيت متوترين ..
هشام قال ليها : كيف ياسهى؟ ان شا الله كويسة ..
قالت ليهو: والله الحمد لله تمام انت كيف؟
قال ليها انا تمام .. الموضوع كالاتي ياستي ..
انا اتكلمت مع ابوي وطرحت ليهو الموضوع .. وقال لي ..
انا ما ح اوافق الا انت تتعرف على البت من قريب وتفهموا بعض ..
هو بقول شايفك مابتنفعي معاي..
وانا شايفك اكتر انسانه مناسبة لي..
بس عايزين فرصة نثبت ليهو أنو نحن لبعض رايك شنو؟
قالت ليهو مافي مشكلة بس المطلوب مني شنو؟
قال ليها اي وقت عايزك تلاقيني تلاقيني ..
وانا بجيكم في البيت من وكت لي آخر ..
قالت ليهو اهلا وسهلا في اي وقت ..
قال ليها خلاص اتفقنا ..
هناك فيروز كانت شايلة كتاب بتقرا .
لمن سمعت المكالمة ختت الكتاب ..
وبقت تسمع في اختهاوهي بتتكلم مع هشام .
بعد خلصت ماسألتها لانها عارفاها ح تقوليها الحشرك شنو؟
مشت بي وراها وهي مودية التلفون لامها ..
سهى حكت لامها المكالمة من دون ماتنتبه لي فيروز بي وراها..
فيروز ردت سريع لامها.. قالت ليها ياماما ..
يجي في البيت مافي مشكلة..
لكن تطلع تلاقيهو براها ده ماتوافقي عليهو ..
لانو والله ده بكون من ضررها وح تخسره صدقيني ..
يعني كل ما كانت غاليه عليهو كل ما اتمسك بيها اكتر..
لكن بالجد يا امي لو كل ما قال ليها الاقيك طلعت ولاقتو.
بتهون في نظره وبفتش عن غيرها ..
امها قالت ليها ده فهم غريب يافيروز ..!! وانا بالجد بقيت مافاهماك ..!!
مرة احس بيك قلبك على اختك ومرة احس بيك شايلة حسد العالمين جواك ..
سهى قبلت على فيروز وقالت ليها اسمعيني يا انتي ..
انتي لو عايزة تكتمي لي نفسي في البيت ده وتقعدي لي شوكة حوت
والله انا بقصدك وبدمرك يافيروز ..
فيروز قالت ليهم ياجماعة انا آآآآآسفه ..
بس لما يجي بابا اطرحوا ليهو الموضوع ده وشوفو رايه لو هو موافق
يبقى انا مافي شي بدخلني ..
وياماما الله يخليك ماتتصرفي قبل مايعرف بابا..
امها قالت ليها : ابوك لوبقى بي فهمك .ده انا ما كان اتزوجته من اساسو ..
خليهو يجي وتسمعي منه بي اضانك ..
وغير كدا لازم يوقفك عند حدك.. لانه اختك دي تعبت منك
وانا بقيت خايفة على نفسياتها .


...................................................................................................................................................................

رواية الصكوك
الحلقة 10
بقلم طارق اللبيب
اها بالمساء لمن جا الوالد اول زول بدا يتكلم معاهو سهى ..
عشان تلعب القيم صح .. قالت ليهو.
يابابا انا تعبت من فيروز ومن عمايلها معاي وماعارفة اتصرف معاها كيف؟
قال ليها ليييييييه؟ في شنو ؟
قالت ليهو قبل النهار اتصل هشام على ماما واتكلم معاي ..
وقال لي نحن وافقنا عليك بس انا عايز اتعرف عليك اكتر ..(كذب)
قال ليها ابوه موافق ..؟؟ ..
قالت ليهو ايوة وابوه مستعجل اكتر منه قال كدا...(كذب)
قال ليها والمشكلة شنو؟ .
قالت ليهو فيروز قالت لي ماتطلعي تلاقيهو .
قال ليها يافيروز الحاصل شنو بالضبط ..؟
قالت ليهو يابابا .. بي المنطق كدا .. الناس ديل المفروض يردو ليك انت ..
الكلام كان كلام رجال .. يعني كونو هشام يتصل على سهى من وراك الكلام ده مامريحني ..
ثم ثانيا" ابوهو معاك في السوق ليه ما كلمك ..؟
الحكاية دي لو فرضنا فرض انها خطوبها ماصح تلاقيهو براها ..
لكن هسي هي ماخطوبة رسميه ..
فيروز تتكلم وابوها خاتي يدو فوق خشمو ماقادر يرد ..
قالت ليهو وانا متبرعة لو قال عايز يلاقيها انا بمشي معاها ..
هنا سهى فقعتها بكاء وخشت اوضتها وهي بتبكي ..
وابوها قام وراها حصلها ..
وبتول بقت تتكلم مع فيروز ..
قالت ليها من الله شق عيني ماشفت زول بي سوادة نيتك ..
شكاكة وظنانة وماعندك ثقة في اي زول ..
قيروز عايزة ترد ليها .. جا محمد قال لي امه يا امي كان انتي وكان ابوي
سهى دي بدخلكم في مشكلة..
لانكم ماقادرين عليها وبتلعب بي عواطفكم ..
امه ردت ليهو .. وقالت ليهو انت من يومك المشيت مع فيروز دي لي ناس عمتك جيت متغير انا ماعارفه الغيرك منو هي .وللا عمتها اصلا" عمتها بزغتها برغه ..(يعني جابداها بتشبها) ..
محمد ساق فيروز وقال ليها تعالي احكي لي في شنو؟..
ابوها وامها طلعو من جوة وهي خلاص وقفت من البكا وجات متكيفة...
وفيروز بهناك بتحكي لمحمد ..
بعد خلصت من الكلام جو بره وابوهم قال اسمعي يافيروز ..
نحن نحن واثقين منها وانتي ماعندك معاها شغلة ..
لو جابت لي مشكلة انا المسؤول ..
محمد قال ليهو بس يا ابوي ... ...... ابوهو قاطعه قال ليهو : اسكت ياولد ..
عندك كلام بعد كلامي كمان ؟ ..
وزي ما ملاحظين انو فيروز جاها سند ..
محمد فهم شخصية سهى الكذابة المراوغة ...
بس محمد زول طايش برضو ومامركز زي فيروز ..
وفيروز مامعتمده عليهو ابداً ..
سهى قالت لي امها يا ماما خلي معاي تلفونك لو هشام ضرب لي ..
طوالي سلمتها التلفون ..
اها بكرة الصباح البيت فاضي محمد وسهى طلعوا ماعارف وين.
وابوها في السوق وامها طلعت تجيب حاجات الطعام ..
جاها تلفون ... بس المرة دي التلفون ما من هشام

....................................................................................................................................................................

رواية الصكوك .
الحلقة 11
بقلم طارق اللبيب الرقم المتصل على سهى .رقم دولي .
وحست احساس انو ده شرف ود عمتها . المهم ردت عليهو الوو..
هو: السلام عليكم انا شرف ممكن اكلم فيروز ..
قالت ليهو : انا فيروز .. (بالله شوف البت دي) ..!!!
هو : كيفك يافيروز .. ان شا الله طيبة ..
سبحان الله اصواتكم انتي وسهى بتتشابه شديد .. ضحكت وقالت ليهو كيفك انت ان شا الله
تمام .. ؟
قال ليها بخير الحمد لله .. بس يافيروز انا عايز اقول ليك انا اسف
اني ما اتكلمت معاك . قبل ما أسافر وكان غلطي اني اتكلمت مع
اختك .. الكذبت علي؟ .. وقالت لي انك على علاقة مع واحد من اولاد
الجيران .. الحمد لله اول امبارح اتصلت على ناس البيت وليالي اختي
حكت لي كل حاجة .. وفهمت انو سهى اختك كانت بتكذب علي ..
قالت ليهو : اصلا سهى طايشة ساي انت كنت تتكلم معاي مباشرة ..
قال ليها مامشكلة الحمد لله انا عرفت الحقيقة قبل ما أتصرف ..
اها يا فيروز انتي عندك مانع من الارتباط ده؟
قالت ليهو أبدا" ماعندي اي مانع خصوصا انت ود عمتي وده مما
يسعدني ويشرفني .. (داخلة في دور فيروز مية ميه ..سبحان الله )
قال ليها : بالمناسبة امي وليالي وناس البيت حبوك محبة ماطبيعية
ياخي ليالي دي وكت تتكلم عنك تقررب تشرق ..
وعلى العكس تماما اصلا قالو ما هضمو الاخت سهى مع اني انا
اتخدعت فيها .. وحسيت بيها انسانة بريئة ونضيفة ..
قالت ليهو : سهى خطيرة شديد ياشرف الله يهديها ..
قال ليها عندك مانع اتصل عليك دايما في تلفون الوالدة ده ..؟؟
قالت ليهو مافي مانع بس دايما" اتصل علي بين المغرب والعشاء بكون
فاضية اصلا خدمة البيت كلها علي انا..
قال ليها خير مافي مشكلة نهائي ..
يلا في امان الله .. قالت ليهو الله يسلمك ..
وطوالي مسكت التلفون ومسحت السجل بتاع المكالمة ..
وناس البيت جــو وفيروز جات وهي عادية .. ولا كانه في زول اتصل
ماجابت سيرة طبعا نهائي.. ومبسوطة اليوم كلو ومتكيفة انك قامت بي
عملية سحرية .. وبقت شايلة تلفون امها طالعة وجاية ..
اها العصرية كدا جاها تلفون من هشام شالت التلفون وخشت
غرفتها وقالت لامها يا امي انا ماعايزة فيروز تتصنت على مكالماتي
وامها المحترمة بدل تراقب مكالمات بتها المراهقة ..
بقت تراقب في فيروز عشان فيروز ماتسمع وعشان سهى تلقى
راحتها في الخبيز والعجن ..
بقت تتونس مع هشام بالساعات بتقول ليهو في شنو..؟؟ الله اعلم ..
بس بعد كل مسافة كدا فيروز برة تسمع ضحكتا تعلو ..
وامها حايمة داخلة ومارقة ولاهماها ..وفيروز تفرك في إيديها ممغوسة
ماقبلانة الوضع ده نهائي ..
وماعارفة تتصرف كيف ..
المهم في اثناء ما بتتكلم مع هشام سمعت صوت مكالمة في الانتظار
عاينت للتلفون لقته ده شرف ..
قالت لهشام يلا ياهشام مع السلامة بابا متصل بكون عايز حاجة ..
مع السلامة .. مع السلامة وفتحت الخط لي منو؟؟ لي شرف ..
وكت المكالمات ده اظنو مستمر ساعة وربع وكلهم فاكرين انها لسهة بتتكلم
مع هشام حتي فيروز ماعارفة الاتصال كان مكالمتين ..
يلا معاي في مكالمة شرف الاخيرة دي قال ليها :
اسمعي يافيروز طبعا انتي عارفة انا ماعندي اي اخو بعتمد عليهو
وليالي اختي مسكينة الغنماية تاكل عشاها ..
انا عايز ارسل ليك حاجات وبوريك تتصرفي فيهم كيف ..
قالت ليهو حاجات شنو ؟؟
قال ليها انا لمن ارسلهم بوريك بس ..
قالت ليهو جدا وانا جاهزة اخدمك بعيوني ياود عمتي ..
قال ليها: ..يسلمو لي عيونك .. وانا اخدم عيونك حافي..
وهي تسمع في كلامو وقلبها من جوة بيغلي غيرة وحسد ..
لانه الكلام اساسا" ماليها ..
قال ليها خلاص يلا مع السلامة انا بكرة بوريك خلي التلفون معاك ..
انا بضرب ليك بكرة الضهرية كدا واوضح ليك اي حاجة


.......................................................................................................................................................................

رواية الصكوك .
الحلقة 12 ..
بقلم طارق اللبيب .
في اليوم ده اصبح الوضع عادي جدا" بس سهى سرحانه وماعارفينها سرحانه على طول في شنو .. امها افتكرت انها خلاص وقعت في الحب والغرام مع هشام عصمت . وهي فكرها شغال في موضوع شرف .. ياربي الزول ده عايز يرسل لفيروز شنو .. وانا لازم اصحصح صح .عشان ما أدقس نهائي ..
مر اليوم زي الضهرية كدا وهي ماسكة التلفون مكنكشه فيهو ..
اتصل عليها شرف ..
بعد سلم وسألها من صحتها وعبر ليها عن الاشتياق والاستعجال للزفاف واللقاء بها ..
قال ليها يلا أسمعيني كويس .. انا زي ماقلت ليك عايز لي زول امين وسند وانا عايزك تكوني زوجتي سندي حتى في الامور التجارية ..
انا مرسل ليك مستندات بتاعات توكيلات ومرسل ليك شيكات بالبريد السريع في طرد مغلف تمشي تسلميها من مكتب العمـارات ..
تخليهم معاك عشان عندنا حاجات عايزين نشتريها لحياتنا المستقبلية ..
وهو بتكلم وهي قلبها يضرب تف تف تف ....
قال ليها الشيك الاول بي بمبلغ كدا .. تمشي تشتري بيت على مزاجك في المكان البعجبك ..
والشيك التاني تصرفيهو على دراستك رسومك مصاريفك كل احتياجاتك .انا ماعايز خالي تاني يصرف عليك قرش . لغاية ما أنا ارجع لاني انا عايزك تكملي الجامعة سوا ان كان اجلنا الزواج او عجلناهو .
قالت ليهو ممكن اطلب منك طلب .
قال ليها اطلبي قالت ليهو هسي في الوقت الحالي ماعايزاك تجيب لبابا اي سيرة بمكالماتنا دي .. ولاتفاتحه في موضوع لغاية ما نكمل تخطيط حياتنا..
عشان لو حسو بانو موضوعنا اتضبط طوالي سهى بتخش في موضوع ..
وانا ماعايزاها تخش في موضوع لانها صغيرة .. بس توعدني مافي زول يعرف اي حاجة ..
قال ليها مادام انو ده اول طلب تطلبيهو مني يافيروز انا بوعدك ..
يلا الموضوع كدا بقى جااااااااهز والشيكات دي يا ها الصكوك ست الاسم ..
المساء كدا اتصل عليها هشام ..
قالت ليهو بكرة الصباح عايزاك تلاقيني عندنا مشوار ضروري شديد ..
قاليها ياهنيتي وده يوم مناي ..
وفعلا الصباح قالت لامها يا أمي انا ماشه ليناس عمتي بغشى فاطمة صحبتي وبنمشي مع بعض .. امها قالت ليها فيروز قاعدة ومحمد قاعد ..
خلي واحد يمشي .. معاك.. قالت ليها يا امي لو ماعايزاني امشي ببطل بس واحد فيهم ما ببراهو ..امها قالت ليها خلاص ماتزعلي افطري واطلعي ..
قالت ليها بفطر مع فاطمة هسي ماجيعانة ..
وطبعا هي لاماشه لي فاطمة ولاحاجة ... طلعت طوالي وشايلة تلفون امها معاها ومشت لاقت هشام في المكان الاتفقو فيهو وقالت لهشام فيروز اختي عيانة شوية وخطيبها ود عمتي شرف مرسل ليها حاجات من بره ..
ماشة استلمهم نيابة عنها .. ومرة واحدة نتونس انا وانت وتحكي لي واحكي ليك .. ومشت طوالي للمكتب المفروض تسلم منه الصكوك ..
وقالت للموظف المختص . انا فيروز عندي خطيبي رسل طرد من برة انا المفروض استلمه ..
الموظف قال ليها لو سمحتي اثبات الشخصية ..
قالت ليهو انا ماعندي اي اثبات شخصية بس انت اتصل علي المرسل لو ما متأكد واهو معاي شهيد .. وهشام ارتبك ماعرف يقول حاجة قال للموظف كلامها صح .. الموظف قال ليها لحظة اتصل عليهو شرف انا بعرفه.
اتصل عليه وقال ليه:
السلام عليكم يا استاذ شرف كيف الصحة ..
الطرد بتاعك وصل وجات واحدة تسلمه بتقول هي بت عمتك وانت وصيتها بالاستلام .. انا بديك ليها بالتلفون تأكد لي لو هي ولا لا ..
قال ليهو اديني ليها اداها ليهو بالتلفون ..
سلم عليها وقال ليها وصلتي قالت ليهو وصلت ..الحمد لله ..
اها اقنع الراجل ده يديني البتاعات عشان أنا اتأخرتا ..
طوالي شرف اتكلم مع الموظف وقال ليهو سلمها .
وسلمها وطلعت وطبعا .. هشام مافاهم ايي حاجة .. لحظه شوفو المصيبة ..
هههه هشام في حاجة واحدة ربكته ربكة شديده


..........................................................................................................................................................................
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.nojoumarab.net
الامبراطور حذو
Admin


عدد المساهمات : 223
تاريخ التسجيل : 22/11/2014
العمر : 26
الموقع : http://sudan.nojoumarab.net

مُساهمةموضوع: رد: طارق اللبيب .. روايه الصكوك كامله   الخميس مارس 10, 2016 1:44 pm

رواية الصكوك .
الحلقة 13
بقلم طارق اللبيب.
اكتر حاجة اربكت هشام هي انو سهى في التلفون قالت لي شرف:
انا فيروز وشرف وافق على اعطاءها الظرف..
وطبعا لغاية هسي هشام ماعارف الظرف فيهو شنو ..
لكن بي نظره الى ملامح سهى المرتبكة وكثرة سرحانها عرف انو في حاجة ماساهله ..
سألها .. قال ليها انتي مش حبيبتي الوحيدة ؟
قاالت ليهو نعم .
قال ليها مش انا حبيبك الوحيد ؟قالت ليهو نعم .
بتثقي فيني ولا لا ؟ قالت ليهو ثقة عمياء حبيبي ..
قال ليها .. صارحيني ووريني الظرف ده فيهو شنو؟
قالت ليهو ياسيدي ده فيهو قروش النار ماتاكلا..
شيكات ومستندات توكيل ماينقصني فيها غير توكيل من فيروز ويكون التوكيل من نصيبي...
قال ليها مافاهم .. حكت ليهو كل تفاصيل العملية الاجرامية ..
هو قعد يضحك وقال ليها لالالا انتي طلعتي داهية ..
قالت ليهو .. اها حتغير رايك مني ؟
قال ليها ابدا" بالعكس ده انا بحب المراة الملحلحة البتعرف تلعب اللعبات الخطرة ..
لكن هسي الظرف ده حتوديهو وين ..
قالت ليهو بمشي بصرف القروش اول بعداك بمشي بشتري لي بيت باسمي
وادس الاوراق بتاعة البيت وبعداك بعترف ليهم بالعملتو ..
واقول ليهو الظرف راح مني .. اها في النهاية ح يعلو لي شنو ؟
في النهاية ده ود عمتي مابرضى الفضيحة لي خاله
وشرف انا عارفاهو كويس حيتعوض الله ويسكت وماما وبابا يزعلو مني يومين والموضوع يرجع طبيعي وانا اكون امنت مستقبلي واسست لحياتي ..
قال ليها : وحيات ربنا ياسهى انت مصيبة وهاهاهاه فقعها ضحكة ..
قالت ليهو اها حتقيق معاي في المهمة دي ؟
قال ليها وانا عندي غيرك منو ياحياتي ؟؟
وفي النهاية دي حياتنا نحن الاتنين مع بعض .وسرك في بير ..
قالت ليهو خلاص انت شيل معاك الظرف خليهو معاك وبكرة الصباح نتلاقى نمشي نصرف القروش سريع قبل ماشرف يكتشف اي حاجة..
ولمان يكتشفوا الموضوع نحن نكون ظبطنا الموضوع واشترينا بيتنا وباقي القروش موفرنه ..يلا حيبي نحن المفروض نمشي سريع لانهم هسي مفتكريني مع فاطمة صحبتي وقايلني مشيت ناس عمتي ..
ومسكت التلفون عشان تتصل على فاطمة وتفهما الموضوع لقت ماعندها رصيد في تلفونها ..
قالت ليهو ياهشام عليك الله اتصل لي على فاطمة ..
وهو اتصل عليها من تلفونو .. واداها ليها قالت ليها اسمعي انا .. هسي مع هشام لو ناس البيت سألوك كان الليلة كان بعد سنة .تقولي انا كنت معاك ومشينا ليناس عمتي .. اتفنا ياعبيطة .. قالت ليها حاضر ياحيوانة يامجرمة ..
هشام قال ليها: يلا خلاص نحن المفروض بكره نصرف القروش دي سريع وبعد اك انا بجهز ليك ورقة فاضية تحاولي تسرقي من سهى توقيع ..واذا ماقدرتي ان شا الله تصوري توقيعها بالموبايل وانا بتصرف ..ولو ده كله ماقدرتي عليهو .. انا بطلع ليك اشهاد شرعي انو انت اسمك سهى واسمك فيروز .بحتاج لحبة قريشات لانه بكون باللفه بدون شهود ..
وفي بلدنا دي اي شى بالككص بطلع.. الناس بقت ماعندها ضماير ..
اي زول في يدو حاجة تدفعي ليهو كاش بمرر ليك .. ههههه..
بعد داك نتصرف في ممتلكات شرف زي ما احنا عاوزين ..
قالت ليهو كدا مية مية وانا اوعدك بجيب ليك توقيعها بطريقتي الخاصة ..
والاتنين بتونسوا فرحانين ومبسوطين بهذا النصر الموزر ..
وهشام قاعد ينظر ليها نظرات اعجاب واندهاش..
وقال ليها ده انا عندي اسرار كتيرة ح اقولا ليك ..
لانك وثقتي فيني وانا كمان حأوثق فيك ..
قالت ليهو خير ياحياتي هسي انت خلي معاك الظرف لغاية بكرة الصباح في احتمال كبير انا اجيب ليك معاي التوقيع واول مشوار لينا للبنك على طول
جيب ليك شوال بلاستيك لانه القروش كتيرة وحنختها في ضهرية العربية نمشي طوالي نشتري البيت ..
قال ليها كمان انا عندي اصحابي بتاعين عقارات في الكلاكلة يعني البيت حنشتريهو هناك عشان يكون بعيد ومافي زول يتوقع حاجة ..
قالت ليهو (هي هي هي) الليلة يوم سعدك ياسهى بت بتول ..
احي انا... يادوب اتفشيت في فيروز تاني لو دخلوني في قزازة انا ما ندمانه ..
وانا حالفه شرف الخلاني وحب فيروز انا ح اخليهو ليك على الحديده ..
يعني فيروز فيها شنو عشان يفضلها علي؟
اجمل مني ولا اصغر مني ولاشنو ولاشنو؟
خليهو لي كويس انا بنظمه ليك نظام احتمال مايلقى القروش البعرس بيها الغنماية بتاعتنا دي ..
واحسن زاتو انا لو اتزوجته ماكان ح احبه زي ماحبيتك انت حبيبي لانه ماكان حيفهمني ولا يتوافق مع افكاري وحياتي.. انا وانت هسي بقينا روح واحدة اسرارنا مع بعض ..
قال ليها انا بحمد ربنا انو شرف اعجب بي فيروز وخلاك لي .. انا بالجد محظوظ بانسانة زيك قمة الجمال والاناقة والذكاء .ورفع يديهو كدا على السماء وقبلهم اممممه ..وسلمته الطرف ومشى نزلا في شارع البيت وهي اتسللت براحة ودخلت البيت ولامن شاف ولامن دري دخلت على اوضتها ..
وفيروز شافتها جات داخلة وامها كان مع الجيران وجات ولاسألتها عن ناس عمتها ولاسالتها عن المشوار ولا لا ..وشايلة التلفون بتاعها ..امها جات داخله و ابوها جا وختو الغدا ابوها قال .. الليلة قبل شويه جاني تلفون من ليالي (بت عمتهكم)
وقالت مشتاقة لي سهى بكرة بتجيكم ان شاء الله ..امها قالت ليهو ؟؟
معقوووول ..؟؟ طيب سهى الليلة معناها ما كانت معاهم ..
سهى انت كنتي وين؟؟

.....................................................................................................................................................................

رواية الصكوك .
الحلقة 14
بقلم طارق اللبيب .
.امها قالت لي ابوها ؟؟
معقوووول ..؟؟ طيب سهى الليلة معناها ما كانت مع ناس عمتها ..
سهى انت كنتي وين؟؟ .. قالت ليها انا ياماما لما مشيت لي فاطمة امها تعبت شوية وما قدرت امشي ناس عمتو وماقدرت اجي واسيب المره عيانه .قيلت معاهم ..
شينة ياماما امشي اخلي امها عيانة ما من الاصول ..
ابوها قال ليها دايما" بتعرفي الواجب ياسهى ..
.. اها انتهى اليوم..
و مر الليل طويلا" ثقيلا .. وسهى النوم طالق من عينا ومقلقلة تتقلب لي متين تصبح ليها الواطة عشان تمشي تلاقي هشام ويمشو على المكان المحدد ويصرفو الشيكات ..
طبعا هو قال ليها انا بتصل عليك الصباح اوريك انا وين ..
اصبح الصباح وسهى مقلة وبعد ماكانت بتقوم اخر زول في البيت هي الليلة قامت اول زول وصحت امها عشان تعمل الشاى وظاهر عليها مستعجلة شديد ..
قالت لامها يا ماما . فاطمة حتجيني الليلة عشان طالعين نشتري اغراض الجامعة بابا عايزة لي قروش .
ابوها قال ليها :طيب انا امبارح مش قلت ليك ليالي جايانا ماشه وين ؟؟
قالت لالا يابابا مابقدر اخلف وعدي مع البنات الماشين معاهن السوق ليالي بوعدك بمشي ليها في البيت يوم تاني..
الليله خليها تقعد مع امي عشان الفي النفوس يتفى
لكن انا ماشه ماشه يا بابا مابقدر اقعد..
قال ليها :طيب طيب .. شيلي من امك القروش البتكفيك .انتي يافيروز ماعايزة حاجة ..
قالت ليهو: اي والله يا بابا عايزة ..بس سهى مابتخليني امشي معاها ..
خليها تمشي هي الليلة مع فاطمة.. وبكرة انا ومحمد بنمشي مافي مشكله ..
قال ليهم خير انا ماشي اتأخرت ..
وهو طلع بي جاي سهى دخلت غرفتها وانتظرت هشام يتصل عليها ما اتصل
..اتصلت عليهو هي ..جرس طويل مارد ..
تااااني اتصلت مارد ..
في المرة التالتة قفل التلفون وبقت تجيها الرسالة الاليه .. (هذا الرقم مغلق حاليا" الخ..)
بقت تودي وتجيب .. ياربي تلفونو يكون قطع كهربا..
ياربي الزول ده عايز يزوغ بالقروش .
تاني اتصلت وبرضو مقفول بقت مقلقه ماعارفة تعمل شنو؟
وهي مابتعرف بيتهم .. ياربي امشي لبابا في السوق يوريني بيتهم وين؟
تاني تقول لالالا احسن ما استعجل .. احسن اظن بيهو خير ..
بعد شوية اتصلت عليها فاطمة .. بالمحادثة التاليه ..
فاطمة: الو .. ياسوسو ..
سهى: هلا تونا .. كيفك والله انا متوترة توتر ماطبيعي ..
فاطمة: مالك يا الشقيه يابتاعة الكوارث ..
سهى : منتظرة تلفون من هشام وشكله كدا ماسورة عظيمة ..
فاطمة : قالت ليها انا عايزة اسألك .. هشام ده ياهو هشام عصمت ود خالة فايقة
الساكنين في الجريف .. زول كدا شكله ابيضاني ..
سهى : ياهو آي ..
فاطمة قالت ليها خمي وصري يا الشومه .. ده حرامي كبير .. وكتال كتلا ..
عامل فيها دكتور صيدلاني صح ؟
سهى ايوة دكتور مش عامل فيها ..
فاطمة قالت ليها: هوي يا الفرحانة دي دكتور شنو؟ ده خريج ثانوي واظنو نجاح ماناجح ..ماشاف الصيدلة بعينو .. كان شغال مع واحد صيدلاني في شارع الوادي
ماسك ليهو حسابات الصيدليه ده بعرفو انا معرفة شديده..
كان عنده علاقة مع صاحبة اختي .. ده قبل فترة قابضنو في شيكات كان مشتري سيخ بالشيكات.
وباعه بالكسر . وابوهو ابا يخلصه خلصه خالة وخالو زاتو حرامي زيه .
والله نحن رحاب بتحكي لينا عنه حكاوي تجيب الخوفه ..
قالت ليها رحاب منو ؟
قالت ليها رحاب صاحبة اختي الكان بينو وبينها علاقة..
وفي النهاية العلاقة اكتشفنا انها مشبوهة والعياذ بالله ..
امشي يابت سريع افسخي الزول ده واوعى تسمحي ليهو يستمر معاك دقيقتين ..
(وطبعا فاطمة ماعارفة قصة الصكوك المرسلة من شرف)..
قالت ليها ياخي كدي خليني من الفسخ انا هسي في مشكلة وماعارفه الم فيهو كيف؟ وووب علي .. الليله اعمل شنو أنا ..؟
فاطمة قالت ليها .. ياسهى مالك الحاصل شنو بالضبط .. اوع يكون غلطتي ..
قالت ليها لالالا ماكدا .. لكن والله انا بقيت مافاهمة اي حاجة.
وراسي كبس كبسه غريبه .. عليك الله تعالي لي سريع يافاطمة كان الحق اتصرف ..والله دي مصيبة دي ..
وهشام سواها ولا يخاف عقباها .

.......................................................................................................................................................................

روية الصكوك
الحلقة 15 ..
بقلم طارق اللبيب
طوالي فاطمة ركبت وفي 20 دقيقة كانت في بيت ناس سهى وأساسا سهى مكلمة ناس البيت قالت ليهم فاطمة جاياني ماشين السوق طلعو مع بعض سريع في الشارع بتكلمو ..
سهى قالت نمشي وين .
قالت ليها .. ارح نمشي نغشى اي كافتيريا أهدي شوية واحكي لي الحاصل شنو وان شا الله مافي اي مشكلة بس انتي هوني عليك ..
نزلن الاتنين مشن لكافتيريا كدا والواطه صباح طبعا يمكن 9 صباحا" ..
وبدت سهى تحكي ليها .. انها غشت شرف واوهمتو انها هي فيروز وشرف رسل
صكوك .. وهشام زاغ بالظرف كله ومابي يرد تلفونو مقفول ..
وانا ماقادرة اعرف انو هو وين والحاصل شنو وماعارفة بيتو وتلفونو مقفول ..
..فاطمة قالت ليها طيب سؤال هشام عارفك صاحبتي ؟
قالت ليها ماعارفة والله الا يكون عرف منك انتي او عرف من حتة تانيه لكن ماحصل جبنا سيرتك ..
قالت ليها طيب حلو شديد..
انتي تشوفي حتة تنتظريني فيها وانا امشي من هنا لبيت ناس رحاب
هنا قريب بسألها من بيتو وين وممكن انا ورحاب نمشي نقابله ان شا الله نطلب منه اي خدمة.. رايك شنو؟ لانه لو شافك انتي ح يزوغ مننا ..
قالت ليها امشي طوالي انا بتلقيني منتظراك في حتتي دي باخد لي مشوار كدا ان شا الله امشي احوم في السوق واجي انتظرك راجعة هنا ده .
طوالي فاتت فاطمة وسهى بقت قاعدة تفكر مهمومة ومغمومة
وفي قعدتها ديك جاها تلفون من شرف .. وكت شافت رقمه في تلفونا قلبها قال شحححححح... هههههه
قال ليها السلام عليكم زوجة المستقبل العزيزة .. بت خالي الغالية ..
قالت ليهو عليكم السلام ياحياتي كيفك .. (^_^) غايتو !!
هو : الامور والاحوال والصحة ..
هي : والله عافية وروقة الحمد لله في امن وامان نحمد ربنا ..
قال ليها اها ما أديتيني اي خبر من الاجراءات عملتي شنو؟ صرفتي القروش
قالت ليهو لسه والله دسيت الظرف في دولابي ومنتظرة الفرصة البمشي فيها ..
قال ليها والله يافيروز انا فرحان بيك فرح ماتتخيليهو ..
وواثق فيك ثقة مابعدها ثقة .. وكيف بالله سهى المستهبله ..
قالت ليهو كويسة والله كل يوم عندها حالة البت دي يتخيل لي عيانة ياشرف
انا بفكر نوديها لدكتور نفسي ..
(قمة الاجرام والاستهبال) ..
قال ليها انا عندي حاجات كتيرة عايزك تقومي لي بيها .. بس هسي خلصي الحاجات دي ....
قالت ليهو خير ان شا الله ..
وبعد داك اتكلم معاها الكلام المعتاد والتعبير عن الاشواق وقال انه هو مستعجل للزواج .. وقال من المفروض يقعد برة سنتين لكن حيجي بعد سنة يعمل العرس ويرجع ــــــــــــ
تاني .. وده كله طبعا ..بتسمع فيهو سهى .. وفيروز صاحبة الشان لاعلم لها بمايجري ..
هو بحاول يتكلم وهي بتحاول تختصر لانها ما مجمعة والخوف قاطع قلبها ..
قامت سألته سؤال .. قالت ليهو ياشرف انا عايزة اسألك سؤال ..
قال ليها اتفضلي طوالي ..
قالت ليهو انت ليه اخترتني انا وخليت سهى ؟.. مع انها اجمل مني واصغر وكدا يعني ..قال ليها طيب اجاوبك ..
اول حاجة القال ليك منو سهى اجمل منك ..؟
الجمال ده يا فيروز حاجة اختيارية وامزجة الناس ورغباتهم ما متشابهة .ربما في ناس يشوفوك جميلة انا اشوفك غير .والعكس فاي زول ليهو نظرته واختياره وميوله ..
الحاجة التانية سهى مغطية على جمالها بصفات ماحلوة ..
وانتي بهاك بيكمن في سلوكك وعقلك ورزانتك وهو كاسيك جمال خالد مابنتهي بالزمن حتى لو كبرتي بتكوني بنفس الجمال ..
الحاجة التالتة مناسبة عمرك وسهى لسه صغيرة ..
المهم اتكلمو كداااااا.. والمكالمة انتهت على هذا المنوال ..
وسهى قاعدة منتظرة فاطمة وكل مرة بتتصل عليها .. وتوريها هي وين ..
وطلعت من الكافتريا دي ومشت لي واحدة تانيه ..
اخر اتصال : فاطمة قالت قالت ليها انا ورحاب قدام بيت ناس هشام وعرفتو ليك ساكن وين ..
قالت ليها طيب الحمد لله اها لمن تلمو فيهو ارجعي لي ..
بس المرة دي طولت من الاتصال ..قريب الضهر .. اتصلت فاطمة على سهى قالت لها قالو في هشام ..
(................) ومشينا ليهو ولاقيناهو .معاهو واحدة مشى يطلع ليها اوراق بس ماعارفه اوراق شنو ؟
قالت ليها ياهبلة دي بطلع ليها في اوراق مزورة باسم فيروز ..
عشان تصرف القروش بي بطاقتها ..
ده زول بتاع تزوير ورشاوي فعلا" يافاطمة .
(ههههههههه الراجل ظبط اموره ) سهى قالت لفاطمة .. تعالي لي سريع ..
قالت ليها جدا .. بس احسن حاجة عرفت ليك بيتو بي وين ..؟
يلا وهي منتظره فاطمه توصل جاها تلفون عاينت للشاشه ..
لقته ده رقم هشاااااااااام .

.....................................................................................................................................................................

الصكوك 16
طبعا" سهى لمن ظهر ليها رقم هشام اصلا ماصدقت عينيها ..
المكالمة ..
هشام : الو ياحياتي .. سهى كيفك ؟
سهى : هلا هشام انت وين . وليه غايب مني كدا بالجد قلقتني عليك قلق ماعادي .موش المفروض تضرب لي الصباح ..
ايوه صح بس حصل لي ظرف ماطبيعي تلفوني طشه برنامج وكضم كلو كلو .وماعرفت رقمك حتى شريحتي اتحرقت انا رقمك حافظه في الجهاز في راسي مافي اسف اسف حبيبتي ..
غشيت لي بترينة واشتريت جهاز ومشيت طلعت شريحتي بي رقمها .
وهسي شلت رقمك من فاطمة هسي قبل شوية ..
قالت ليهو فاطمة لاقتك وين ..؟
قال ليها لاقتني في (..........) نفس المكان القالته فاطمة ..
قالت ليهو وانت مشيت هناك لشنو ؟
قال ليها انا مشيت استفسر وعندي بعض الناس البثق في انهم ممكن يخدمونا .. قلت امشي اول ارتب الامور حتن بعدين اسوقك ..
لانو احتمال نستغنى من توقيع فيرزو ذاتو ..
قالت ليهو ممكن تلاقيني هسي ؟
قال ليها جدا بس والله تعبان ومصدع وجيعان ممكن تديني فرضة اكل لي لقمة واجي عليك ..
قالت ليهو طيب سرعة انا منظراك في الكافتيريا الفلانية .
بعد انتظرت اظن ساعة والساعة مشت لقريب خمسة مساء
جا وقف بي ورا شجرة في اخر الشارع وعاين ليها جوة ..
وضرب ليها تلفون وبعاين ليها لمن ردت قال ليها :حبيبتي
والله انا آسف شديد .. عايني هنا .. بي ورا الشجرة الفي الشارع دي ..
لو زعلانة مني بمشي ..
قالت ليهو حرام عليك تعال فيزول بزعل من روحه ..
طوالي جاها يضحك ..
قالت ليهو وريني اول حاجة الكلام القالته فاطمة ده صحيح ؟
قال ليها قالت شنو؟
قالت ليهو بتحكي عنك كوااااارث قالت انت حرامي وكنت في السجن وكضاب مادكتور
وكان عندك علاقة بي واحدة اسمها رحاب ..
قعد يضحك هههههههه ..
قال ليها صاحبتك بتلعب عليك .. ودايرة تزحلقك مني ..
تتخيلي .. انا لمن اتصلت عليها بتلفوني تتذكري ؟؟
قالت ليهو اي اها ؟؟؟
قال ليها : حفظت الرقم وبالليل ضربت لي وبقت تتونس معاي
في البداية ونسة عادية .. تاني حسيت بيها ونسة ماطبيعية ..
قبيل جاتني في ال (........) وقالت لي انا ممكن اساعدك وتطلع لي بطاقة باسم فيروز لانه سهى ماحتسترك لانك ظالم اختها ..
انا قلت ليها اديني رقم سهى النقطعو معاها ادتني رقمك وفت خليتها ..
صاحبتك خايناك يا الغالية هههه..
اما عن الكلام الحكتو عني .. كله ماصحيح ماعدا قصة دكتور انا اصلا مادكتور ولاقلت لابوك انا دكتور انا لاني شغال في الصيدلية صحباني بقولو لي يادكتور
لكن ابوك براهو قال ليكم دكتور صيدلاني بعدين السودانيين اغلبيتهم مابفرقوا بين الدكتور الصيدلاني والعامل في الصيدلية ياخي ديل مهندس الاجهزة الطبية بقولو ليهو يادكتور ومجهز العملية بقولو ليهو دكتور ومساعد التمريض دكتور وغايتو
المهم انا زهجت من الشرح بقى البقول لي يادكتور بقول ليهو ايوة ..
بعدين انا ماحصل اسجنت ولايوم .. امشيي اسألي ابوي ..
وبعدين هل ممكن اكون اتسجنت وابوك يكون ماعنده خبر ..
سهى هنا خلااااااص بقت مافاهمة اي حاجة ..
قالت ليهو معقول فاطمة تكون بالحقارة دي والندالة دي ؟
الله ينتقم منها والله انا كترة مابحبها مستعدة افداها بي دمي ..
سبحان الله الزمن بقى زمن غريب ..
هسي انا من كلامها انا فكرت اشيل منك الصكوك واسيبك ..
والله كلامها القالتو عنك اصلا" مامحتمل ..
الناس كلها بقت خاينة ومجرمة ..
قام هو قال ليها الا انتي ههههههه .. وضحك .. قالت ليهو وجتى انا ..
قال ليها يازولة ما مشكلة بكرة الصباح نظبط كل الامور ..
قال ليهو خلاص ارح وديني كدا خليني اصل البيت بي سرعة .
ومشت البيت وسبحان الله قدر ما اتأخرت امها ماسألت وابوها ماقال اتأخرت في السوق قدر كدا ليه ..
والزول الوحيد الكان مقلق عليها فيروز ..
لمن دخلت البيت لقت ابوها نايم وامها مشغولة في مواضيع هايفة
وفيروز حايمة بالبيت مقلقة .. اول مادقت الباب جاتها جارية ..
سهى ؟؟ انتي كويسة ؟؟ اتأخرتي كدا ليه ..
وبقت تعاين ليها من راسها لي كرعينها .. وتسأل فيها ..
انتي اتغديتي .. اكلتي ؟؟ جيعانة ؟؟
هي بقت تعاين لي فيروز كدا ؟؟
وفي راسها ستين سؤال .. ياربي ليه امي وابوي مامهتمين بي
وفيروز شايلة همي .. هل ياربي ده نوع من الشفقة الاخوية ؟؟
هل هو تدخل وغيرة ؟ طيب السبب شنو؟
جرت سريع جابت ليها أكل .. وبقت تأكل وفيروز تعاين ليها ..
وسالتها .. مالك يا سهى وشك مسود وشايلة هم ..
حبيبتي انا اختك احكي لي همك واوعدك بشيل منك حمل تقيل ..
قالت ليها كويس يا فيروز بالليل نتكلم انا هسي تعبانة وعايزة انوم ..
قالت ليها طيب صلي ونومي .. قالت ليها بعدين بعدين ..
قالت ليها لا انابجيب ليك الموية جنبك اتوضي وصلي ونومي ..
المهم .. سهى شكلها زهجت من الضيق والتوتر وبقت شاكة في فاطمة وشاكة في هشام وفكرت تحكي لاختها لانها بالجد انها اقرب زول ليها في الدنيا اكتر حتى من امها وابوها .. لكن هل ابليس اللعين ممكن يسمح لها تحكي ليها ؟؟

................................................................................

رواية الصكوك ..
الحلقة 17
بقلم طارق اللبيب
سهى بعد صحت من النوم .
لقت اختها منتظراها بالعشا .
وامها وابوها دخلو جوه نامو من دون مايعرفو عنها اي خبر ..
ختت ليها الاكل وقعدت معاها .. سهى تشيل لقمة وتسرح دقيقة كاملة حتى تشيل اللقمة البعديها وفيروز تعاين ليها ..
فيروز غلبها الاكل بالخوف على اختها وجواها سؤال وسؤال ..
ياربي اختي مالها ..؟ الحصل عليها الليلة في اليوم ده شنو .. وبقت مقلقة عليها اكتر من وقت قبل تنوم .. لانه البت نامت بي همها وقامت بي همها ..فيروز بدت تتكلم مع سهى ..
اسمعي حبيبتي مامن مشكلة الا وليها حل اكلي عشان نقوم نشوف الحاصل شنو .. وانا بوعدك حتنومي مرتاحة ،،
سهى قالت ليها ما اظن تقدري تعملي لي حاجة سيبيني في حالي .. انا ماناقصاك..
قالت ليها : انتي جربيني ماخسرانه حاجة ..
قالت ليها : لا اجربك ولاتجربيني خلصي اكلك وامشي على سريرك يا فيروز عليك الله.. انا مخي كابس وما قادرة اكورك معاك ..
هنا فيروز حست بالعجز التام .. نسبة لانها مقتنعة انو اختها حاصلة ليها حاجة وماقدرت تقنعها انها تحكي ليها ..
فيروز قالت : انا المسؤولة من الحاصل ده كله وبكت ..
قالت ليها مسؤولة منه ليه .. ؟
قالت ليها انا دايما بعيدة منك وما مدياك فرصة تكوني صديقتي عشان اسرارنا تكون مع بعض.. انا غلطانه يا سهى .. وهسي لو كنا اصحاب كان خليتيني طلعت معاك .. وما كان حصل ليك اي شي ..لمن اكون معاك بتكوني معاي في امان من الزمن ..
سهى قالت ليها .. بالعكس دي انا البقفل ليك الطريق قدامك..
خلاص يافيروز بطلي البكا والهباله دي انا مابستحمل ..
فيروز قامت مشت سريرها .. ودموعها على عينيها ..
سهى اخدت ليها رقدة كدا وجات قعدت جم فيروز في السرير..
وقالت ليها : خلاص الجميل وقف البكاء ؟؟؟
فيروز ضحكت ودموعها مازالت على عينيها ..
سهى قالت ليها خلاص ياصاحبي العزيز انا ح احكي ليك ..ونشوف حلك شنو ..
بتعرفي صاحبتي فاطمة ؟؟
قالت ليها نعم ..
قالت ليها فاطمة دي قالت لي انو هشام خطيبي حرامي وبتاع كوارث ومرتاد سجون
وما دكتور صيدلي ولا قيامه ،، زول عنقالي ساي ،، وشغال سلفقة في ابوهو
وكان عندو علاقة سيئة مع واحدة صاحبة اختها اسمها رحاب .
المهم بي اختصار طلعته لي من نفسي
يلا لمن واجهت هشام بالكلام قال لي .. فاطمة صاحبتك عايزة تفرقنا عشان هي عاوزاني واتكلمت معاي..وعايزه تعمل معاي علاقة ..
.. وانا صراحة يا فيروز بقيت مافاهمة الصادق من الكاذب..
اها يهودا الموضوع عندك حل؟؟؟؟
((طبعا ماحكت اي شي عن مكالماتها مع شرف ولاعن موضوع الصكوك وهو الموضوع الاساسي ..))
وواصلت سهى .. بس اهم حاجة توعديني انو ماما وبابا مايعرفوا حاجة
فيروز قالت ليها :ده موضوع بسيط ومامحتاج نحن نكلمهم ،، نكلمهم لمن تتبين الحقايق..
وانا بوعدك بكرة الصباح قبل اليوم ماينتهي بكون عندك الخبر الاكيد..
طيب انتي بكرة ماشه وين ؟؟
قالت ليها راجعة السوق مع فاطمة . لانو الليلة ما اشترينا اي حاجة
اي حاجة نهبشها نلقاها غالية لازم ماما تزيد لي القروش ..
فيروز قالت ليها تمام انا بكرة بطلع معاك الاقي فاطمة اسلم عليها ،،
وبجي راجعة اخليكم براكم تمشو السوق براحتكم ،،
سهى قالت ليها تلاقيها ليه ..؟؟
فيروز ردت .. قالت ليها مش انا وعدتك اعرف ليك الحقايق ..
بس اديني راحتي وما تعترضي علي واسمعي كلامي البقولو ليك ..
سهى قالت ليه: اهااااااااا من هسي جينا في الحقاره والسيطرة .؟
فيروز قالت ليها : الله يخيلك ياسهى اديني فرصة واحدة بس ..
قالت ليها خلاص بكرة بوريك لو موافقة على العرض ده ولا لا ..
وصراحة نص ساعة وسهى مانامت بتفكر في شفقة فيروز وتعرض امامها صور
معاملاتها معاها السيئة .. وهي دايما بتعطف عليها .. وهسي دموع حارة وساخنة رأتها على خدودها .. اثرت فيها اثرأ بالغا" .. وقالت جواها انا المرة دي بديها الفرصة واشوفا ح تعمل شنو؟
وساهرت تفكر لغتية ما أتاكدت انه فيروز نامت ضربت لي فاطمة ..
قالت ليها اسمعي انا بكرة لازم الاقيك الصباح ..
عشان نواجه هشام .. قالت ليها انا مابواجهو .. ده زول غدار وممكن يعمل فيني حاجة .. صراحة ده زول مخيف .. ابعدي منه ياسهى ..
قالت ليها خلاص بس انتي لاقيني .. ان شا الله دقيقتين عشان فيروز تطمئن انك معاي وبعدين انتي امشي واناا بمشي أصفي معاهو اموري ..
فاطمة قالت ليها كدا ممكن ..
طبعا كدا سهى تكتكت لقاء فيروز بي فاطمة ..
ونامت ..
والصباح ناس البيت استغربوا لمن سهى قالت انا الليلة سايقة معاي فيروز .
وبي اختصار طلعن الاتنين ولاقن فاطمة في مكان الموعد ..
واول ما سلموا عليها ..
فيروز قالت لفاطمة .. انا ما ماشة معاكم .. عايزة اسألك سؤال واحد
وراجعة .. قالت ليها اسألي..
قالت ليها .. وصفي لي بيت ناس رحاب

..................................................................................

ارواية لصكوك ..
الحلقة 18
بقلم طارق اللبيب
طبعا السؤال وقع زي الصاقعة . على فاطمة وعلى سهى وماكانوا متوقعين فيروز تطلب الطلب ده ..
فااطمة قالت ليها جدا" بوصفو ليك بس انتي ماشة ليها ليه؟
فيروز قالت ليها عايزة اسألها من هشام واخلاقياته لانها هي بتكون عندها تفاصيل بحكم انها كانت على علاقة معاهو,
(ومافهمت فاطمة انو هي شاكة فيها وفي صدقها وماعارفة الصادق هي ولا هشام) .. اتكلمت معاها على اساس انها صادقه ,,
فاطمة قالت ليها جدا" امسكي الوصف .. تركبي كدا تنزلي كدا الشارع ال.. البيت .. تسالي من رحاب فلات فلان .. ابوها مشهور في الحتة اي زول بوريك بيتهم ,,
طوالي فيروز رجعت البيت عشان تجهز لانه البيت كان قريب اصلا فاطمة لاقتهم في اخر الشارع .. وكانت رافضة تصل بيت ناس سهى ..
ليه ؟ حنعرف بعدين ..
بعد فاتت فيروز فاطمة قالت لـسهى : انتي كلمتي ناس البيت بقصة الصكوك؟
قالت ليها لا.. انتي جنيتي؟؟ بكتلوني .. واحتمال فيروز تصدم ..
قالت ليها طيب ياهبلة .. رحاب ح تحكي لفيروز ..
رحاب مش مشت معاي لهشام لمن كان في (........) وعارفة القصة بالتفاصيل .؟
انتي ناسية؟
قالت ليها طيب اتصلي علي رحاب قولي ليها ماتحكي ليها ..
قالت ليها مامشكلة برسل ليها رسالة .. ((رسلت ليها رسالة))
المهم فيروز رجعت البيت ومشت صحت محمد الكسلان هه قوم يامحمد انت تساهر الليل كله وتجي تنوم انصاص الليالي ..
قال ليها مالِك ياخ ماتكرهينا انا ماقايم ..
واتقلب بالجهة التانية ورافض يطنطن ..
قالت ليهو عندي ليك شمار خطير من فاطمة ..
قام طوالي قال ليها اها مالا ..؟
قالت ليهو مابكلمك نوم نومك .. لو عايزني اكلمك انا ماشة اتحقق من القوالة
تمشي معاي وبكلمك في الطريق ....
طوووووووالي اتجهز ولبس سريع وطلعو ماشين على مكان الوصف ..
في الطريق حكت ليهو وما أبدى اي اهتمام بالبرنامج ..
وصلت ولاقت رحاب .. رحاب جميلة طويلة فارعة صارخة الملامح سحب الروعة تكسو وجهـها غير ان هنالك حزن مدفون في سجايا العيون ..وسلمت فيروز وقالت ليها انا فيروز اخت سهى ؟ محمد قاعد في اخر الشارع ابا يدخل ..
قالت ليها ياسلاااااااااام الله جابك لي والله ماكنت لاقية ليك طريق ..
يا فيروز حصلي اختك.. اختك شكلها حتتدمر وحتدمركم .. وفاطمة بتحاول تنقذ فيها بقدر المستطاع وهي عنيدة ومغفلة ..
وانا هسي جاتني رسالة من فاطمة اقراها ليك .. {يارحاب جاياك فيروز اخت سهى
عايزاك تحكي ليها اي حاجة خاصة عن المستندات والشيكات وماتجيبي ليها اي سيرة عني ..بس عليك الله حذريها وانقذيهم يارحاب الله يخليك }
طبعا .. فاطمة قبيل خدعت سهى ..فيروز قالت ياسلام على ياتونة ..
واصلت رحاب ..وقالت يافيروز الزول الاشمو هشام دمر كمية من البنات وانا واحدة من ضحاياهو .. ده اسكتي ساي ..بحكي ليك .. المشكلة الان مافي هشام المشكلة في سهى اختك يافيروز
انتو سهي دي طالقين ليها الحبل على القارب وحتجيب ليكم كفوة قريب..
فيروز قالت ليها احكي لي مالا سهى اختي ..
قالت ليها : سهى استقلت التلفون بتاع امك واتلقت مكالمات من شرف ود عمتك على اساس انها هي فيروز ورسل ليها ظرف ووووو......حصل حصل حصل...... حكت ليها كل حاجة .. O_O والغالية صابة فوقا مطرة ..
تحكي ليها قريب الساعة .. رحاب عارفة التفاصيل بطريقة غريبة
لانو فاطمة حكت ليها بالتفاصيل المملة..
بعد خلصت رحاب .. فيروز سكتت سااااااي قريب الخمس دقايق وهي سارحة مبهوتة ماقادرة ترد ..قامت طوالي قالت ليها شكرا ليك يارحاب انا ماشة البيت انا حاسة اني ماكويسة ابدا انا ماطبيعية .. ماشايفة قدامى كويس .. قالت ليها :حتمشي تعملي شنو يا فيروز ؟؟
قالت ليها : طيب لحظة افكر شوية ..
يا رحاب هشام ده انا عايز اتغدى بيهو قبل ما يتعشى بي وبس ممكن تساعديني الخطة دي لاني ماعندي وقت ..
وفيروز رسمت خطة محكمة ..واتفقوا على الخطة ..
وطلعو التلاتة ومحمد مشغول بي تلفونة بلعب في لعبة سباق سيارات ..
مشوا على مركز الشرطة .. وفيروز سلمت على الضابط شكلو في معرفة
المهم اتكلمت معاهو كتير ..
ونادت رحاب قالت ليها اتصلي على هشام ..
اتصلت عليهو رحاب وفاتحة السماعة الخارجيه والضابط وسهى والكل يسمع
وقالت ليهو .. انا نفسي ارجع ليك بقيت بشتاق ليك شديد ..
بس انت اليومين ديل مشغول مع سهى
لو حكيت لي بي سر الصكوك .. بساعدك والقى نصيبي وفي النهاية انت حبيبي
وما الحب الا للحبيب الاول ..
والاهبل المغفل صدق وبدا يحكي ليها واثبت انو الظرف معاهو وفيهو الصكوك وقال ليها عايز اعمل هوية باسم فيروز .. واصلا في النهاية كنت حسافر وتاني ماجاي ..
لكن كدا حيكون في تغيير في الخطة . وفيروز تسمع والضابط يسمع ..
هههه كتمت

..................................................................................

اروية الصكوك..
الحلقة 19 ..
بقلم طارق اللبيب
انتهت المكالمة .. والضابط اخد وصف البيت تماما" من رحاب لانها قبل كدا مشت ليهو مع فاطمة وعارفين بيتو ..
والضابط كان راجل صباح خير وظاهر عليهو انه فعلا عايز يحسم القضية
ونظراته دارت حول رحاب بطريقه ملفته ولم يستطيع ان يصرف عنها نظره
فهي بالحق فاتنة الجمال مريعة نيران شالعة بق ..
قال ليها ادوني رقم التلفون بتاعكم ده عشان اتواصل معاكم لو في اي جديد.. انا اسمي مقدم ازهري .. كما أعتقد ان له في ذلك اهداف ربما تكون نبيله ..
ادوهو رقم التلفون وطلعو .. ومحمد باريهن يبرم في شعره ويصلح في اكمامه ..
لمن بقو في آخر الشارع جاء عسكري ..محصلهم .. يا أخت ياأخت .. وقفو ليهو ..
قال ليها : لو سمحتي ادينا رقم التلفون بتاع المتهم ده ..
طوالي ورته ليه وكتبه في ورقتين يعني كتبه مرتين ورجع ..
مشى سلم المقدم ورقة واحتفظ بي الورقة التانية ..
عسكري ماعندو ضمير ..
العسكري بعد ماسلم الضابط واحدة من الورقتين المكتوب فيهن الرقم.
طلع من المركز من دون علم الضابط (ازهري) واتصل على هشام
قال ليهو اسمع يازول انا عسكري من المركز الفلاني قبل شوية جاك اتصال من واحدة اسمها رحاب .صح؟
قال ليهو نعم .. قاليهو دي جات هسي في النقطة ومعاها واحدة اسمها فيروز .. وحصل حصل .. والاتصال كان مسموع لناس الشرطة..
والضابط ازهري زول صعب جدا".
والليلة حتجيك مداهمة في البيت في نص الليل ..
حاول اتصرف امشي ليك على مكان انا بتصل عليك تاني ..
بس حضرلي مسحة الشنب مسحة الشنب دي طبعا" (الرشوة)..
قال ليهو : طيب انا أصدقك كيف؟
قال ليهو .. على كيفك ماتصدق بعدين لمن تتعكش .. بتعرف كلامي كان صاح كان بكضب .. سلام ..
وقفل الخط ودخل ربيكتو في جيبو وجا داخل على المركز ..
الكلام ده نصت نهار ..
وفعلا مشى قابله بالمساء والعسكري قاليهو لازم تتصرف سريع ..
ومافي داعي للهوية المزورة الانت بتقول فيها دي .
نشوف ليك اي بطاقة تصرف بيها الشيك وتتخارج . والحبشة جاك زول ..قال ليهو المشكلة الشيك مكرص .. والشيك المكرص .. هو الذي توضع عليه علامة ان لايصرفه الا المستفيد الاول ..
المهم قعدو الاتنين يخططوا للجريمة .. نسأل الله السلامة ..
طبعا سهى مشت انتظرت هشام في الكافتريا وفاطمة فاتت منها ..
طبعا فاطمة ممتنعة تدخل بيت ناس سهى ليه؟؟
لانو في بينها وبين محمد شمس الدين سوء تفاهم ..
ومتقطعين ليهم خمسة يوم ..
وسهى منتظرة وهو كل مرة تتصل عليهو يجيب ليها عذر ..
كان من الصباح معاهو واحدة بطلع ليها في هوية .. وفعلا نجح ..
ومواعيدو بكرة يستلم اثبات الشخصية المزور ..
جاهو الموضوع بتاع العسكري ده جهجه افكاره ..
وسهى منتظرة هشام وهشام ماجاها ..
في النهاية اتصل عليها وقال ليها ياسهى..
الكلم فيروز بي موضوعنا ده منو ؟...

................................................................................

رواية الصكوك ..
الحلقة 20
بقلم طارق اللبيب ..
قالت ليهو ليه؟؟ في شنو؟؟
قال ليها هسي جاني اتصال من عسكري قال قال ..
قالت ليهو .... معقوووووووول.. طيب رحاب حكت لي فيروز معناها ..
الليلة اوووووووب علي انا ..
قال ليها اسمعي حبيبتي .. ولايهمك انا بتصرف بس انتي خليك طبيعية ..
قالت ليه .. طبيعية كيف ؟ وانا امشي البيت كيف وأقابل فيروز بياتو وشي ؟؟
وهسي فيروز تكون حكت لماما وبابا .. الليله انا خلاص انتهيت كشخصيه ..
اسمع يا هشام نحن الموضوع ده خلاص خليناهو ..
جيب لي الظرف وانا بسلمها ليهو وبعترف ليها ..
ويادار مادخلك شر ..
قاليها .. بلااااااااي ؟؟ عليك الله .. وانا الجري الجريتو الخسارات الخسرتها
البسددها لي منو؟
قالت ليهو خسارات شنو ياهشام ؟ انت عملت شنو؟
قال ليها اسمعي ياسهى امشي البيت انا ما بقدر اجيك ..
امشي لاختك حبيبتك منتظراك .. انا بتحمل مسؤليتي براي ..
هنا احست سهى بوضوح الخيانة التي يمارسها هشام ضدها ..
واحست باحساس الحسرة والندامة وماقدرت تقوم على حيلها ..
من الاحباط والشعور الغريب ..
فاطمة صاحبتي غدرت بي .. ورحاب عايزة تدمرني . .
وهشام ذبحني بسكين ميتة ..
الزولة الوحيدة البتسعى لي بالخير وبتعطف على اختي حبيبتي وانا الان دمرتها وضريتها ..وحطمت حياتها .. انا اسوء انسانة
بالجد انا مابستحق العيشة .. ومشت البيت ..مستاءة وخجلانة من مقابلة فيروز ..
ولقت فيروز قاعدة متغيرة تغيير شديد .ما أتكلمت معاها نهائي ..
ولاسألته زي كل يوم ..
حتى لمن سهى سلمت فيروز ردت السلام بتحت نخريها ..
لكن فيروز شكلها ماحكت لناس البيت ..
لانها مطمئة انو الضابط ازهري حيرجع الظرف بتاع الصكوك ..
و مشت لي اوضتها وماطلعت كله كله ..
سهى جاتها في اوضتها قالت ليها .:
فيروز ؟. فيروز ؟.بالجد انا اسفة يافيروز..
والله انا ماعارفة عملت كدا ليه ؟؟ والله انا سيئه .
اوع يكون كلمتي ماما وبابا .. تاني ماحيحترموني نهائي ..
فيروز قالت ليها .. ماحكيت لزول .. بس انتي غلطتي فيني غلط كبير ياسهى ..
حرام عليك انتي اكتر زول انا بحبه وبخاف عليه ..
ليه تعملي فيني كدا ؟ عملت ليك شنو انا ياسهى .
ليه عملتي فيني كدا؟ (تتكلم دموعها كحبات اللؤلؤ تتساقط .. )
انا محطمة من جواي ياسهى ..
لاني فقدت اختي حبيتي الكنت متمنياها تكون سند ليه في المستقبل .. حطمتيني ياسهى .. دمرتي كل حاجة جميلة جواي ..
لكن اقول ليك .. اطمئني .. انا ح احل الموضوع ده براي ..
وما ح احكي لي ماما وبابا.. الا المواضيع تتصعب علي ..
لاني متأكده لو عرفو الكلام ده حيصدموا..
ويمرضو مرض انا اندم عليه طول حياتي ..
انا لو بغير منك وبكرهك زي مابتقولي .دي فرصتي الممكن احطمك فيها وازيلك من افكار امك وابوك الى الابد .. لكن مابعمل كدا انا ..
تعالي هنا اقعدي احكي شرف ود عمتي قال ليك شنو وقلتي ليهو شنو ..
لاني حواصل مكالمات معاهو ولو عرف.
انك دي انتي بتغشي فيهو . ماحيظن بينا خير لا أنا ولا اسرتي ..
وسبحان الله شخصية فيروز اتغيرت في نفسيات سهى 180 درجة ..
بنفس المستوى شخصية سهى اتغيرت في نفسيات فيروز
لاسوء طبعا" لانها ماكانت بتعتقد انو ممكن اختها تنحدر للمستوى الخطير ده ..
اهااا الليل جا.. والمداهمة على هشام . بعد ساعة

........................................................................

رواية الصكوك
. الحلقة 21
بقلم طارق اللبيب..
طبعا قبيل مع المغارب كدا اخونا العسكري عديم الضمير ضرب موعد مع هشام .ومشى قابلو واقنعه بالهروب .بعد ماحكى ليهو كل المشهد.
ووصف ليهو البنات هشام اقتنع .. ورتب يمشي يبيت مع اصحابه في اركويت ..
في الجانب الاخر .. رحاب اتصلت على فاطمة ..ودار بينهما الحوار التالي ..
رحاب .. كيفك ياتونا ..
فاطمة الحمد لله يارحاب اها احكي لي الحصل شنو؟
حكت ليها .. كل الحصل لغاية مشهد مركز الشرطة ..
قالت ليها : ياااااااه ده انتو طورتو الموضوع تطور خطير ..والله يارحاب انا واجعاني العمايل البتعمل فيها سهى .. ولي منو؟ لي اختها ؟ اعوذ بالله..
وانا قررت اني اقاطعها نهائي .. البت دي كل ما ماشة كبيرة ماشة سيئة
قلبها اسود شديد سبحان الله من بره هلا هلا ومن جوه يعلم الله ..
رحاب قالت ليها انتي من الاول ليه ماصاحبتي فيروز ؟ ياخي فيروز دي مبالغة والله تعقد الزول . ادب وفهم وطيبة وحنان ياخي انسانة سبحان الله . انا قررت انها تكون صاحبتي الوحيدة في الدنيا دي ..
فاطمة قالت ليها : طيب رايك شنو نحن نقوم بعملية نحاول ننقذ الموقف ..
نقوم نجيب رقم شرف ونتصل عليهو ونحكي ليه الحاصل على الاقل يقدر يتصرف
ويعمل تجميد للحساب بالنت ..
رحاب قالت ليها .. المشكلة انو فيروز ماعايزة شرف يعرف لانه لو عرف ممكن الحكاية تجوط وفيروز تخسره وتخسر سمعتها وسمعة اهلها ..
ونحن اتفقنا مع الضابط انو يحاول يحسم لينا الموضوع قبل ماتصل المحكمة
والضابط اتعاون معانا شديد وقال لينا كلام مطمن وان شا الله الكابوس ده يتحل وفيروز ترتاح منه ياخي انا والله متوترة من الصباح .. اول مرة اخش مركز شرطة ههه
والله طلعت عبايتي مبلولة من العرق والخوف ..
هي بتتكلم معاها رحاب سمعت صوت تنبيه انتظار قالت ليها دقيقة برجع ليك ردت على المكالمة .. الو؟؟؟؟؟؟؟
قال عليكم السلام يارحاب .. انا مقدم ازهري ..
كيف امسيتو؟
قالت ليهو الحمد لله ياجنابو اها الجديد شنو؟
قال ليها الجديد انو نحن عملنا مداهمة لي هشام في البيت وكانت مداهمة امنية رسلت ليهو افراد لابسين مدني عشان اهله مايحسوا ونعرف مكانه بالضبط
لكن للاسف لقيناهو مافي واهله قالو غريبة انو الليلة قال بايت برة عمرو ماببيت بره البيت .. بس عارفه معناها لازم انه اخد خبر بالمداهمة هل انتو كلمته البت خطيبته بالموضوع ؟؟.. قالت ليهو لا وما أظن اختها تحكي ليها
قال ليها معقول ؟ لكن الخبر جاهو من وين ؟؟
طيب اسمعي كويس ..
اناعايزكم تجوني الصباح في المركز 7 صباحا" انتي وفيروز . وتجيب معاها بطاقتها ..
قالت ليهو حاضر .. حاضر ..
وقفلت رجعت لفاطمة قالت ليها عايزاك تضربي لسهى تديك فيروز قوليها رحاب قالت ليك .. مقدم . ازهري قال تجوهو في في المركز 7 صباحا" وتجيب معاها البطاقة .
لمن اتصلت فاطمة لقت التلفون عند فيروز ..
وكلمتها ..
فيروز لمن كلمتها فاطمة بالموضوع .. مشت طوالي نادت سهى لقتها نااايمة ام قلبا" ميت .. قالت ليها بكرة الصباح الساعة 7 تكوني جاهزة عشان تطلعي معاي ..
المهم بالاختصار عشان مانطول .. مشو الصباح التلاتة وقابلو الضابط رحاب وفيروز وسهى خايفة ومطيرة عيونها وترجف ..
فيروز حست بيها خايفة .. قالت ليها حبيبتي ماتخافي انا معاك مابحصل الا الخير اوثقي فيني .. قالت ليها ابقيت مابثق في روحي بثق فيك انتي ..
الضباط قاعد جوة بتكلم مع بعض الافراد زي تلاتة كدا,,
وكلهم لابسين ملكي .. تعالو جاي نشوفو بقول ليهم في شنو ؟
ازهري قال للعساكر للاسف في واحد امبارح خاين عمل عملية ماكريمة وانا متأكد كان حاضر الاتصال بهشام ..
يلا سريع اي زول يطلع تلفونو .. وصاحبنا العسكري الهلفوت سقط في الفخ .
وطلعوا تلفوناتهم وختوهن قدام ازهري .. وبدا يفتش في المكالمات تلفون تلفون
والعسكري الغبي مامسح سجل المكالمات وساقوه طوالي دخلوه لي جوة
البحصل ليهو شنو؟ الله اعلم ..
ازهري جاب معاهو الاتنين التانين وطلعو الستة البنات التلاتة والعسكريين والضابط وعلى وين على البنك .. ومن محاسن الصدف انو الليلة هشام حيجي البنك يصرف القروش

.............................................................................

الصكوك 22
العربية كانت بوكس وصلت للبنك وطبعا" سهى قالت ليهم الليلة مية المية هشام حيجي يصرف القروش من هنا .. والضابط قال للجميع اتفضلوا وخشو البنك لكن اتفرقوا .. وماتقعدوا في مكان واحد ويافيروز تعالي ..
مشت معاهو وسأل من مدير البنك ودخل عليهو في مكتبه وحكا ليهو الحاصل .. ومدير اتواصل مع الشبكة الداخلية ومعلومات الحساب بتاع شرف وعرف انو مافي زول صرف حاجة لغاية الان؟
الضابط ازهري .قال ليهو نحن حنقعد شوية . ونشوف البحصل شنو لانه الزول ده احتمال يجي هنا ؟
بهوية مزورة وحنبركت قضية كبيرة ..
المدير قال: ابشرو .. طبعا نحن حنأخد صورة من البطاقة دي وحنخليها معانا ونجمد الحساب تجميد مؤقت ..
وبي كدا الحمد لله رب العالمين ربنا انقذ القروش من المحتال ..
وماهي الا دقايق وجاء هشام واول زول شافه شافته سهى .. وبدون ماتحس
كوركت يهودا هشام ياجنابو ..
بالله شوف البت الغبية دي؟
المفروض يخلوهو لغاية مايطلع الشيك ويحاول يصرفه وكدا يقبضوه بالثابته
لكن برضو طوالي اتحركوا العساكر والضابط وقالو ليهو ثابت يازول ..
ارفع يديك فوق ..
قال ليهو شنو ياجماعة في شنو؟ الله ؟
ازهري قال للعسكري فتش الزول ده .
دخل يده في جيبو طلع شيك بأسم فيروز ..
قال لفيروز يافيروز فتشي البت المعاهو دي ..
فتشتها طلعت من شنطتها بطاقة باسم فيروز شمس الدين
والصورة صورة البت ..
الحمد لله البنك ماكان فيهو ناس كتيرين والساعة كانت زي عشرة صباحا"
ازهري قال ليهو وين باقي الاوراق والظرف الفيهو ؟؟
قال ليهو في البيت ياجنابو ..
بس ياجنابو انا بتصرف بناء على رغبة خطيبتي سهى ...
الضابط قاليهو .. اسكت يانعجة ..
يلا ارمو الناس ديل في البوكسي وراء وعلى البيت
الضابط قال لفيروز اخدو امجاد او تكسي وانتظرونا في المركز
فيروز اتكلمت مع الضابط همسا" ..
قالت ليهو انا ماعايزه ناس بيتهم يحسوا بحاجة ..
قال ليها اطمئني ..
ديل مشو على المركز وديل مشو على البيت..
كلها نص ساعة والبنات منتظرين في المركز وجات العربية بتاعة ناس ازهري وشايلين هشام ومعاهو البت والظرف معاهم..
ولمن سلم فيروز كل الأوراق ..
فيروز قالت ليهو ياجنابو نحن عفينا عن هشام وبعد استلمنا الظرف تاني ماعايزين منه حاجه ..
والغلط الحصل حصل من هشام ومن سهى ..
فانا ماعايزة الكلام يصل لابوه..
لان ابوهو قاعد يفتخر بيهو..
وان شا الله ربنا يهديك ياهشام انت زول ماساهل
الضابط قال ليها خير يا انسانة ياراقيه .. لكن نحن عندنا معاهو مفاهمة في مسألة تزوير البطاقة .. واتأكدي وصيتك ما ح أفرط فيها ..
يقصد انها عايزة اهلها مايعرفوا حاجة ..
والسعادة غمرت البنات وفرحوا فرح مبالغ فيهو وسهى بدون ماتحس
حضنت فيروز وقالت ليها انت اعز واطيب اخت في الدنيا
انا من الليلة حكون خدامة تحت رجليك ..
قالت ليها والله ياسهى انا حزينة انك فقدتي خطيبك ..
سهى قالت ياشيخة فكينا بالله .. انا عايزة اقرا بلا عرس بلا هم ..
وهم طالعين كدا .. الضابط نادى على . رحاب . وقال ليها ..
بالمناسبة انا لقيت شريكة حياتي لو هي ما عندها..
مانع انا بالمساء بجي بيتهم ..
قالت ليهو يكون ده اسعد يوم في حياتها ..
والموضوع ظبط مع رحاب ..
وسهى بقت تشوف فيروز في مكان امها وابوها من شدة الحب والاحترام
ومحمد مبرم شعره .. وفاطمة قالت ليهو اختاني جاي ولا جاي انا عايزة اقرا
وشمس الدين وبتول كلمتهم فيروز وقالت ليهم شرف..
رسل لي اوراق وحاشتري بيت .. وهم ماعندهم اي فكرة عن الحصل
وسهى اتغيرت 180 درجةوبقت تقلد فيروز في كل تصرفاتها .. صلاة ولبس وو .. سبحان الله ..حتى امها وابوها محتارين في الحاصل
وبعد فيروز اشترت البيت حتى اتصلت على شرف .عشان مايفرق بين الاصوات .ويقول فرحانة ..ساي
وفعلا ماقدر يفرق اساسا سهى وفيروز اصواتهم قريبة لي بعض ..
وبي كترت المكالمات فيروز بقت مجنونة بي شرف ..
بس الفرق انو اي اتصال يجيها بتكون بتتكلم قدام ناس البيت .
واستمر الحب الغالي وتم المراد
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.nojoumarab.net
 
طارق اللبيب .. روايه الصكوك كامله
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: مكتبة القصص والروايات :: روايات طارق اللبيب-
انتقل الى: