مرحب بك بك زائرنا علي منتديات نجوم الفن السوداني



 
الرئيسيةمكتبة الصورس .و .جبحـثقائمة الاعضاءالمجموعاتالتسجيلدخول

شاطر | 
 

 طارق اللبيب .. رواية ظلال المظالم كامله

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
الامبراطور حذو
Admin


عدد المساهمات : 223
تاريخ التسجيل : 22/11/2014
العمر : 26
الموقع : http://sudan.nojoumarab.net

مُساهمةموضوع: طارق اللبيب .. رواية ظلال المظالم كامله   الإثنين أبريل 18, 2016 12:22 am

رواية ..
ظلال المظالم ..
الحلقة الاولى ..
بقلم طارق اللبيب
القدر يضع الناس دايما" في مفترق طرق .
وكل مايحصل خير للانسان.. المفروض مايتوشح بالفرحة المطلقه ..
ربما يكون مبطنًا بالشر .
وعندما تحصل مصيبة ..ما تستيأس.. لانها ربما يكون الخير مخبأ فيها ..
لكن الزول ماعندو حل غير انو يقول قدر الله وماشاء فعل .. وكل شي يجري بامر الله
في زمن كانت البلاد تتقدم كان بلادي تتقسم وتتهدم
والسبب في ذلك هو ان النفوس التي تحتوي على الانانية والشر اكتر من النفوس الخيريه ... والمشكلة لاتنحصر في الحكام والمسؤولين .. بل اصبحت ازمة ضمير عامة .. الا من رحم الله وقليل من جعل الضمير متحكماً في تصرفاته.
المثل زمان قالو كان طابت النية العنقريب بشيل مية . والنفوس ان بقت جواها بطال مليون ميل
بنشوفو علينا ضيق .
في زمن اي زول يجازف حق الناس ويشوف مال الحرام غنيمة باردة ..
وياكل السيح والريح ولايشبع يأكل ينافق ينافق لكي يوافق .. يسرق كل ما سهلت سرقته ..
صاح في واحد بيسرق ملاية .. وفي واحد بيسرق ولاية ..
صاح في واحد بزوغ بي حق القهوة من ست الشاي.. وفي واحد بزوغ بي ميزانية وزارة كاملة ..
وفي النهاية الاتنين عندهم ازمة في الضمير ..والزول الزاغ بي حق القهوة كان لقى فرصة في الولاية كان سرقها ..
قصة عمر الشهير بي اب حنك كان من اكتر القصص التي تدمي القلب وتخلي الزول يتصدع من الداخل من الالم ..
عمر راجل متزوج وعندو بت وولد . وساكن بالايجار في حي متواضع . وماعنده اي طموح في حق الناس
شغال سمسار في السوق بتاع عربات وبيوت وكدا يوفق بين البايع والمشتري والبدوها ليهو يحمد عليها الله ويوديها لوليداته
في فترة لقى قروش السمسرة ممحوقة ولابتسد ايجار ولا بتعيش زي الناس ويوم يلقى وخمس يوم يجي مدلدل ايديهو
وهو مع ذلك انسان امين .. لايستخدم مسألة الكوبري بتاع السماسرة لانه حرام وسحت ..
والكبري طبعاً انك تدي المشتري سعر اعلى وتقول للبائع سعر اقل .. والبايع والمشتري يكونو ماعارفين او على الاقل واحد عارف والتاني لا..
والفرق بين البيعتين بكون مبلغ لابأس به اسمو الكبري ..
الكبري ده بتقسموه السماسرة .. اها لمن انتشرت قصة الكباري بين السماسرة وبقت كتيرة شديد ..
والسماسرة اتقسموا كتل كتل .. ابحنك ومعاهو كم نفر كدا بقو شغالين بالنزاهة والشغل بتاعهم ميتان ..
لان الشر في السوق عم .. ابحنك لاقى صاحبه (غريق)و ..
ابحنك قاليهو : ياخي الشغل ده بقى ماجايب حقو .. وانا شكلي كدا . من بكرة بمشي بفتش لي على مصدر رزق جاي ولاجي ..
ناس الكباري البضبحو الرهاين ديل انا مابنفعو معاي ..
(الرهاين .. هم زبناء السماسرة كان بايع كان مشتري .. بسموهو رهينة لانو بكونو متحكمين فيهو وبتم البيعة بالشي البقولوه ليهو
لانو في ناس بتثق في السمسار . فده بسموهو رهينة ..)
فرريق قاليهو ياعمر قصة الكوبري دي كلهم عارفنها حرام بس ماعارف بعملوها ليه ..
قاليهو المابهدي الكريم تعبان .. لكن انا غايتو .. مابأكل اولادي خمسميه جنية حديدة واكون شاكي فيها ..
انت عارف الجرايم البتحصل في البلد دي كلها.. القتل والسكر والبنقو وغيرو .. ده لانو الناس بتأكل اولادها حرام بعدين الولد يكبر معاهو الحرام جاري في دمو ويطلع مجرم !! ( كلام عجيب والله يا ابحنك).
على كل حال انا يافريق ماشي اشوف معايشي بعيد من مجتمع التماسيح ده..
ان شا الله ناكلها انا واولادي بي موية اخير لنا من الحساب بعدين ..
فرريق قال ليهو ان شا الله ربنا يكتب لك السلامة والتوفيق في طريقك شقيش ماتقبل ..
وكانت الدعوة دي من فرريق دعوة مجابة نوعا" ما ..
طبعا فعلا ابحنك اليوم ده ..مشى لي اولادو مدلدل ايديهو ..لاقرش لاتعريفة.. والسماسرة كلهم شغالين زي السلام عليكم..
وتاني بالليل مشى اتدين حق العشا من سيد الدكان ..
اصلا بتدين منو والديون تتردم وتتردم . ولما يلقى ليهو مسكة كويسة من زبون ..
بجي يسدد دينه ..
اها يازول .. بالليل كدا اتصل عليهو واحد من زملاهو في المهنة الخطيرة دي ..وقال ليهو بتعرف حاج فلان قال ليهو نعم صاحبي ..
قال ليهو الزول ده قبيل جا السوق وعندو عريبة كيت كيت .. وكان بسأل منك ..
ونحن قلنا ليهو عربيتك دي بتجيب خمسين .. والعربية الحقيقة ممكن تجيب الستين براحة لكن هو وافق ..
نحن دايرينك باكر تجي السوق وتأكد ليهو كلامنا ..لانه نحن عندنا رهين داير العربية ب خمسة وستين .. وماعارف سيدا طالب فيها الخمسين ..نحن بنموت بي رهينتنا وندفعو الخمسة وستين .. وانت تخلي زولك يقبل ب الخمسين ..
وانا بوعدك نسلمك الخمسة مليون في يدك.. وانا وزولي نتقسم العشرة ..خمسة .. خمسة ..
(ودي طريقة الكوبري عند السماسرة ..)..
بس طبعاً لا البائع لا المشتري مابكون عارف تفاصيل البيعه ..
اب حنك قال ليهو لالالا . ده كوبري ليهو ضل وانا برررره
زميلو ده اسمه حيضر .. طبعا بنطوها بالضاد مع انها حيدر .. يقنع فيهو ي ابحنك ياخي ماتبقى زول مكاجر .. وماتقطع ارزاقنا .. انت قالو خلاص داير تخلي السمسرة .. تم البيعة دي وبعدين توب ياخي
بعدين موش حرام تخلي البيعة تطير مننا ونحن في الحوجة دي والفلس الكافر ده ؟
هسي يعني انت مامحتاج للخمسه مليون؟
اها ابحنك سرح كدا طويييييييل وفكر لقا الخمسة مليون دي.. بتسدد ديون الدكان ..
وبسدد رسوم المدرسة ..وبتشتري لي زوجته عشوش التوب.. النابحاهو بيهو ليها خمسه شهور .. قال ليهو يازول فيها خير .. خلاص لي بكرة .. ولو عمل كدا حتكون دي غلطة عمرو ..
وبداية الانزلاق الى الهلاك ..

....................................................................................................

ظلال المظالم ..
الحلقة الثانية
بقلم طارق اللبيب
الليل بطولو واب حنك يفكر في موضوع الخمسة مليون. البتحل ليهو كل المشاكل. لكنها حرام ..
وفيها ظلم لناس.. ونفسو ضاقت.. وحس بانو انسان حقير.. لمجرد انو فكر يعمل العملية الماكريمة دي .. طوالي اتناول التلفون وضررب لصاحبو حاج احمد سيد العربية العايز بيعها ..
وقال ليهو : كيف حالك ياحاج احمد..معاك انا عمر السمسار .
قاليهو كيف الحال ياراجل يا نزيه ..والله انا كنت كايس ليك ..عشان انت مختلف عن كل السماسرة ..والواحد بيثق فيك ..قال ليهو فعلا قالو لي الليلة كنت كايس لي في السوق .
قال ليهو ننعم والله فتشت ليك ومالميت فيك ..
قال ليهو العربية العايز تبيعها عايز فيها كم يا حاج احمد ؟
قال ليهو.. انا والله ياعمر اننا مضطر للبيعة دي ،،كننت عايز فيها ستين ..لكن ناس السوق قالو مابتجيب الا خمسين ...
قال ليهو ياحاج ماتصدق كلام السماسرة ..
العربية بتجيب الستين.. بس انت اصبر لي بعدين.. لو حصل اي شي وانا ماجيت السوق. ماتبيع العربية لزول غايب ..لازم الزول العايزها يكون حاضر وتستلم منو المبلغ من ايدو لي ايدك وتوثق ليهو العربية في اسمه تصر انو يكون حاضر وتعرف منه ح يدفع كم عشان ماتقع في قصة الكباري..
قال ليهو بس الجماعة قالو لي تدينا العربية ونجيب القروش في محلك ونجي نمضيك فوق الورق وخلاص ..
قال ليهو كدا غلط والف غلط يا حاج احمد...
ماتمضى الا تتاكد العربية اتباعت لمنو واتباعت بي كم انا بجي بكرة بزبط لك الموضوع بس انا دايرك تمسك في الستين دي اصلك ماتنزل منها انا بتم ليك البيعة وبتشوف وانت مابتقصر ..
بس ماتقول للسماسرة اني اتكلمت معاك الناس ديل ثعابين انت ماعارفهم بلدغوني كان عرفوني قديت ليهم الانبوبه ..قال ليهو علي خيرة الله يازول..
بعد انتهت المكالمة .. ابحنك عاين لي وليداته الاتنين كانو بذاكرو مع بعض..
وقال في سرو .. كان طردوكم من المدرسه انا مابدخل عليكم حرام .. وربنا كريم علينا ...
اصبحت واطات الله ومشى السوق .. السماسرة جو اتلملمو فوق ابحنك وعزموه شاي..واتونسو معاهو مبسوطين .. وحلفو عليهو فطروه بي كبده عشان يكتلو قلبو .. لكن هو من البارح بالليل .بوظ ليهم الموضوع وقدا ليهم الشغل وكسر الكبري..قالو ليهو ياب حنك اتكلمت مع الزول؟
قال ليهم ايوه وهو موافق .. واثق من كلامي شديد..
السماسرو اتبسطوا شديد الاتنين بتاعين امبارح ومعاهم تاني تلاته .. الوسبله واب حبال اللهو حضير ديل الاساسيين..
الوسيلة قال لي ابحنك .. الجماعة التلاته ديل عودهم راكب ياب حنك .. (عودهم راكب) دي معناها مشتركين معانا في الغنيمه .. اب حنك قال له نظامهم شنو .؟
قالو ليهو كل واحد مننا نحن التلانه يدفع كلب.. (يعني مليون ).. يعني نصيبك حيكون اربعة .. قال لهم ربنا يسوي الفيها خير.. يلا طبعا"هم منتظرين تلفون من حاج احمد بتاع العربية ..عشان يمشي ابحنك يجيب منه العربية ويشيل ليهو القروش ويمضيهو على الخدعة ..
وماهي الادقايق و حاج احمد فاجأهم وجا بي نفسه..
اها يازول وكت جاء حاج احمد بتاع العربية .. الجماعة احبطوا احباط ماطبيعي ..لانو حيباشر البيع بينفسو.. وبي كدا الكبري بكون طرشق .. المهم الوسيله اخبث مافي الشله.. قال ليهو ياحاج احمد انت مالك تعبان ..نحن منتظرين منك بس تلفون ..وكنا حنجي عليك طوالي نسوق العربية .. انت هسي امشي البيت .. خلي فلان ده يوصلك بعربيتو عشان ماتنتظر طويل .. نحن قاعدين لشنو مش عشان نخدمك حفايا ونتم ليك الشغل ؟.. قال ليهم ممكن أمشي .. بس انا عندي كلام .. انا عربتي ب ستين .. اقل من ستين ما ببيعها .. الوسيله قال ليهو يا حاج ده كلام شنو ؟.. نحن موش امبارح اتفقنا ..وكلمنا الراجل ..والراجل حيجي على ضو كلامك القلتو .. حاج احمد قال ليهم معليش والله اسف بس غيرت راي .. اقلا من ستين ماببيع ..
الوسيله راس الحيه وزعيم العصابه قال لي ابحنك .. يااب حنك والله فشلتنا .. ابحنك قال لي حاج احمد..: يا حاج احمد انت موش امبارح بالليل اتفقتا معاي .. وقلت لي تعال سوق العربية ؟ الليله القلبك شنو؟ قاليهم ياجماعة غيرت راي ..واحتمال اسيب البيع زاتو .. بعدين يا الوسيلة انا اتذكرت .. انا الليله فاضي وقلت اقضي اليوم ده في السوق .. فمافي داعي امشي .. بنتظر الزول لمن يجي واذا دعا الامر بنمشيلو في محلو ..
المهم في الموضوع الراجل العايز العربية وصل والبيعة تمت بطريقة صحيحة والسماسرة اخدو العمولة المفروض ياخدوها وحلالا طيبا" بس طبعا" اقل بكتير من الشي الكانو متوقعنو ..
وحاج احمد دفع والزول الاشترى دفع واتقسموها التلاتة والموضوع انتهى على كدا بس الزول الاشترى العربية .. اتعرف على حاج احمد وكان قابلو قبل سنوات في القضارف واتسالمو شديد وشالو تلفونات بعض .. بس حكاية التعارف دي ضرت اب حنك ضرر بالغ ..
عارفين كيف؟

....................................................................................................

ظلال المظالم
الحلقة الثالثة
بقلم طارق اللبيب ..
قبل ما نعرف معرفة حاج احمد والزول اللخد العربية . ضرت ابحنك في شنو..؟
حاج احمد بعد ماسلم كل زول من السماسرة حصته قال لي ابحنك ماك مارق كدي على الشارع؟ قال ليهو والله مارق وليداتي ماخليت لهم (دي ها) .. ونتل ظفر الابهام مع سنونو دلاله على العدم ..
قال ليهو خلاص نركب مع الراجل ده تبقى لينا آخر ركبة في العربية ووداع لي عربية قعدت معانا عشرة سنين .. الله يلعن ابو الفلس ياخي ..
ابحنك قال ليهو احمد ربك ياحاج احمد انت الليلة مالي قروش .. في ناس ماعندهم عربية يبيعوها .. لما وصلو الشارع وابحنك نازل ماشي يركب المواصلات عشان يمشي على اهلو .. حاج احمد قالو انا دايرك باكر تعال لي . بعد مانزل ابحنك ..حاج احمد قال لصاحبو الاشترى العربية..
الراجل ده زول امين امانة اصلا مابتشبه السماسرة تتخيل .. نحن الاتنين كنا المفروض نخسر 15 مليون . انا المفروض ابيع بي خمسين وانت المفروض تشتري بي خمسة وستين .. المهم حكاليهو خطة السماسرة الفشلها ليهم ابحنك..
وطبعا" حاج احمد ماكان متخيل انو ممكن الزول ده يلاقي السماسرة تاني ويحكي ليهم .. حتي ما طلب منو كتمان السر .. عشان كدا السر كان مرق من اتنين .. تاني كان انتشر في البلد ، سيدو مايلوم الكلمو .. والسر أمانة وافشاهو خيانة.. بس حاج احمد مع انو ماكان عارف الكلام بنتشر.. لكن برضو ماكان يحكي .. لانو مرات السر كان مرق من بين اتنين .. ممكن يخرب البلد .. وده الشي الحصل فعلا ..مع الانسان الطيب اب حنك النزيه ..
المهم الجماعة اتفرقو اب حنك مشى على بيتو ..وحاج احمد مشى بي قريشاتو علي اهلو ..والزول ساق عربيتو ومشى برضو .. اب حنك وصل البيت واتغدا معاو ألادو احسن غدوة بي مال الحلال.. وكان مبسوط .. ومرتاح البال .. مع انو القريشات قليلة .. لابتسد جاي ولابتسد جاي .. لكن ربنا كريم ..
البنية يادوب ممتحنة الجامعة .. اسمها عفراء سمحة سماحة لامن يبقصو منها الزول اكان عاين لها مرتين.. احتمال يجيهو سكري ..من كترة الحلاوة الفوقا .. ومربية بالحلال .. وبريئة براءة الطيور الحالمه .. والولد تقريبا في سادس . سكوت وذكي ومطيع عيونو تقول عمرو عشرين سنة ماشا الله اسمو حمد مسميهو على صاحبو .. زوجته (عشوش نور الحوش).. هو مسميها كدا.. اصلا" اسمها عائشه طيبة ووناسة ومرة كلفة وضيفان.. ومرة سترة .. بس دايرالا توب .. تاني ماعندها موضوع ..
باكر الصباح اب حنك مامشى السوق .. مشى لحاج احمد في محل شغله ..
سلم عليهو وقعدوا وشربه الشاي واتونس معاهو قال ليهو : يابحنك انا عندي راجل صديقي من عشرين سنة .. شغال في مجال الاسماك .. عندو ناس شغالين معاهو ..
بجيب السمك من جبل اولياء بوزعو هنا .. بي العربات الفي شكل تلاجات ديل ياخي ..
ابحنك قال ليهو ايوة بعرفها ..
قال ليهو ياخي الجماعة الشغالين معاهو ديل . ماكلنو اكل السوس ..
وهو قبل يومين بتكلم معاي.. قال عايز ليهو زول امين .. يمسكو الشغل ده ..
وانا والله انت واثق منك ومالي يدي منك تب .. فياخي انت رايك شنو؟
ابحنك قال ليهو.. والله مافي اي مشكلة ياحاج احمد.. انا اساسا نويت ابعد من جو السماسرة ..
واشوف لي شغل ثابت.. لانو المسؤليات كبرت.. والبلد بقت صعبة من ناحية معيشية ..
انا موافق طوالي كلمه وده تلفوني .. خليهو يتصل علي، وانا بمشي ليهو في مكانه، واشوف التنسيق والامور بتمشي كيف .. علي خيرة الله .. اب حنك طلع من الزول وهو بقول في سره والله ده شغل انا ماكنت بحلم بيهو فعلا من ترك شيئا" لله ابدله الله ماهو خير منه ..
ومشى قعد في البيت منتظر الاتصال من حاج احمد او من الزول بتاع السمك ..
يومين تلاتة اربعة ..
في الوقت ده خلال الايام القاعدها ابحنك في بيتو فاضي وياكل في سنامه ويدين من الدكانين على حس الشغل الجاي جديد .. زي مابقول المثل على حس الغنيمة رهن واتدين ..في الوقت ده سوق السماسرة هناك كان مقلوب رأسا على عقب واب حنك ماجايب خبر ..
وسيرة ابحنك في سوق السماسرة على كل لسان وهم طبعا مجتمع قذر جدا ..
في انتظارهم قدام ستات الشاي منتظرين الرهاين والغنايم مابخلو سيرة زول
وعندهم جنس شمارات عند الحريم مافي .. لكن برضو فيهم الصالح وفيهم الطالح ..المهم
المهم الحصل انو الراجل الاشترى العربية من حاج احمد جاء راجع يسأل من اب حنك
عندو بيعة ماعارف عايز يشتري المهم سأل منه السماسرة قالو ليهو ابحنك خلا السوق
قال لهم بس انتو ماعندي معاكم شغل انتو مش كنتو عايزين تركبو فوقنا كبري انا وحاج احمد
قالو ليه القال كدا منو ؟ قال ليهم انتو براكم قلتو الكلام ده لي الراجل الاسمو ابحنك وهو الانقذنا منكم وكشف الموضوع لحاج احمد .. اووووووو (وده الضرر الاتكلمنا عنه قبيل )
بس السماسرة كلهم في لحظة واحدة فارو .. وهاجو وماجو وبقو يعضعضو في يديهم ويقولو
عليك الله شوف اب حنك الخاين ..
اول حاجة قد لينا الشغل وغشا علينا ووسخ سمعتنا ..
الوسيلة الهبيلة قال لهم والله انا اعمل فيهو عملية.. يكلب منها جلد الجبال ..
وكلهم مع بعض نوو على اب حنك نية سوداء وهم اساسا" ناس لايخافون الله ..
الله يستر ..

....................................................................................................

ظلال المظالم
الحلقة الرابعة
بقلم طارق اللبيب
الجماعة السماسرة هناك شغالين في المخططات المخططات والمكايد.. وتنقل الاقوال الكاذبة عن ابحنك ..وهو ماجايب خبر
حتى صاحبو الوحيد فريق.. مسكوه غسلو ليهو دماغو ..وقالو ليهو ابحنك قاعد يتكلم عنك وعو ناس بيتكم كلام ماحلو .. وهو العوير مع انو بعرف ابحنك كويس.. بس برضو صدق الكلام . وحقد على ابحنك لا ايدو لا وكراعو ..الناس دي ليه دايما بتصدق الكلام من طرف واحد ؟ ليه مابتاكدوا قبل مايتهموا انسان برئ ؟.. وبعدين يندمو.. ناسين انو ربنا قال (ان جاءكم فاسق بنباء فتبينو ان تصيبوا قوما بجهالة فتصبحوا على مافعلتم نادمين)
.. حتما الزول الاسمو فريق ده . ح يندم يوم من الايام .. لانو صدق مجرد اقاويل غير مثبتة عن صديقو..ومافرريق وحدو .. ناس كتيرين وصلهم كلام انو اب حنك قال عنهم وقال .. واي قواله بتختلف عن التانيه .. وتقريبا ابحنك فقد كل اصدقاهو ومعارفو في السوق..وزي ماهو معروف ..مافي زول اتحقق ولا اتبين من عمر ابحنك .. اي زول سكت بقوالتو وخلاص وشال في قلبو .. ودي طبعا مرحله فقط من مراحل الانتقام الناوين عليهو ناس الوسيله..
وتمهيدية بي دليل انو قال لي فريق يافريق نحن الزول قبل مايمشي من السوق اذانا كلنا وعايزين ناخد حقنا وبنحتاج ليك في يوم من الايام جاهز وللا بتخذلنا ؟ فرريق قاليهو اخذلكم ده انا باخد منو حقي بطريقتي الخاصة ..
واي حاجة انا معاكم ..
المهم ..مرت الايام وفي يوم من الصباح جا اتصال علي اب حنك ..من الراجل صاحب العمل بتاع السمك ..وطلب من اب حنك يجيهو في مقر الشغل ..
اب حنك اتغاءل جدا ودبت الفرحة والسعادة في اوصاله.. وقعد يكورك .. عفرااااااء.. حمد... عشوووش يانور الحوش .. اجرو تعالو البشااااااااره.. ناس الشغل ضربو لي.. يلا ياعشوش جهزي لي انا طالع سريع.. والفرحة عمت ناس البيت.. وعبرو ليهو عن سعادتهم.. واتجهز وطلع وكت وصل الباب عشوش همهمت .. قالت يارب يوفقك ياعمر وين ماتقبل تضرب وتلقاها خضرا .. وربنا يحفظك من السفح واللفح .. اظنها بتدعي الدعوة دي طوالي .. مشى للراجل .. وقعد معاهو .. الراجل راجل طيب شديد اسمو فضل .. وزول هادي وكلامو براحة.. وشكلو العمال مستقلين طيبتو ..المهم حكى لاب حنك الخسارات البتعرض ليها..
ومن هناك بدأ العمل واب حنك مشى الخزان مكان شحن السمك ومن اول يوم اكتشف انو العمال بشتروا اصلا الكمية في قفاف من الحواتة (الصيادين).. ولما يجو يشحنو بنقصو من كل قفه مقدار اربعة خمسة سمكات
وفي النهاية بطلع ليهم قفتين تلاتة ببيعوها وبشيلو قروشها .. والسحت يدخل بيوتهم من اوسع الابواب
وبفكر ودراية كبيرة اكتشف اب حنك اللعبة.. وبقى يشرف على الشحن بنفسو ..وبتابع الكمية من يد الصيادين الى العربات .. والعمال ماعليهم الا العتالة (التحميل) .. وهناك عمك فضل بستلم البضاعة ويوزعها بالكيلو على المحلات المختصة .. من اول يوم شعر عمك فضل باختلاف الكمية ونوعية البضاعة ..
ومن تاني يوم ازداد الطلب وظهرت الارباح ..وبقت ماشة في زيادة مطردة ..
و عمك فضل اكتشف كمية السرقة الكان بتعرض ليها ..وحتى ماعارفها كانت قدر ده ..
اب حنك اشتغل بي ضمير ..وعمك فضل من اول اسبوع قال حيضاعف ليهو الراتب ..
واستمر الشهر الاول والارباح كانت فوق حد التصور .. والعمال حقدو على اب حنك حقد عجيب ..
ومسمنو المقص .. كناية عن قطع الارزاق .. ولو كانوا يعملون لكانو كافؤوه لانه حجز عنهم العذاب وعن اولادهم ..
وطبعا بدو يكيلو في الاحقاد وهدفهم الاساسي يطيروه من الشغل ..
بالله شوف الزول ده ..من هنا ومن هناك جاي عليهو مد الحقد الاسود
في اول تنفيذ للخطط الشيطانية من العمال ..
في واحد من العمال الصباح كان حايم في الحرت .. (هي الارض المحروثة) . بفتش لحاجة وبقلب في الدراب ..
في النهاية لقى الحاجة البفتش عليها ..وهي (عقرب) من النوع الاسود القاتل بسموها ام صويت ..وختاها وختاها في حقة بتاعة صعوط فاضية ..(تقريبا علبه دهان نيفيا)..
يلا لمن اب حنك جا للشغل وقلع جلابيتو وعلقها .. الزول العندو العقرب .. براااحه جا زايغ .. وطلع العقرب وختاها في جيب الجلابية المعلقة ..
عشان ابحنك بعدين يتعوق ويزح جــاي ولا جاي من طريقم .. واساسا ماحبكتشف انو في زول خت عقرب لان الجلابية معلقة في راكوبة عادية ..
والراكوبة معرضة للحشرات والهوام ..
واب حنك المسكين شغال بكل اخلاص وضمير وبتعامل مع العمال معاملة اخوية وماكان عندو اي فكرة انو الناس ديل ممكن يغدرو بيهو ..
واخر اليوم ..بعد ما انتهى من الشغل .. جاء ماشي على جلابيتو بيكل ابتسامة ورضا ..

....................................................................................................

ظلال المظالم ..
الحلقة الخامسة
بقلم طارق اللبيب ..
طبعا ابحنك بي نفس ابتسامتو نزل الجلابية..
وقلبها ولبسها ومادخل يدو في جيب الجلابية ..
اها الزول الخته العقرب بقى يعاين لي ابحنك بي توتر شديد..
وداير يحضرو لمن يدخل ايدو في جيبو.. ويشوف الحصل عليهو شنو..
.. قام اب حنك قال ليهو يافلان مالك مجحم فوقي كدي ..عارفك مفلس واليومية ماسادالك فرقه ..ما مشكلة داير كم؟. ومي بيناتنا ..
قال ليهو ياريت يا عمر .والله الحاله اسكت خليها ساي . عمر داير يدخل ايدو في جيب الجلابية ..اتذكر انو جزلان القروش في جيب العراقي الكان لابسه ..طوالي رفع الجلابية وطلع الجزلان من جيب العراقي.. واداهو قريشات ورما الجزلان في الجيب الفيهو العقرب.. وودعهم قال لهم باكر الجمعة.. وانا ماشي لي وليداتي بدري..يوم السبت الصباح ان شاء الله معاكم.. ومازال الزول المايتسمى بعاين لاب حنك ..طبعا" اب حنك استغرب من نظرات الزول ده المستمرة بعد اداهو القروش..المهم فات منهم ومشى لغاية ما ركب المواصلات.. والعقرب في جيبو ..لابدة .. وفي المواصلات لازم يدخل ايدو في جيبو يدي الكمساري حقو ..لمن البص قرب للكلاكلة .. الكمساري جا يطقطق ..ابحنك دخل ايدو عادي وطلع الجزلان وفتحو عشان يدي الكمساري قروشو ..يعاين يلقى في الجزلان عقرب مفجوخة ميته!!!!
يالطيف ده شنو.؟ ودي الدخلها في جزلاني شنو ..؟ الحصل لمن هو رمى الجزلان في جببو ..العقرب انحشرت في الجزلان ..وهو لمن قعد في الكرسي قعد فوق الجزلان.. العقرب اتهرست هرس ..و ماكان عندها فرصة تحرك ضنبها عشان تلدغ .. لمن ماتت .. سبحان الحافظ .. المهم لمن مشى البيت وحكى لناس القصة .. قالو ليهو حمدلله على السلامة .. قام حمد ولدو عمرة تقريبا 13..قال ليهو يا ابوي احتمال يكون في زول ختاها ليك في جيبك عشان تضربك .. عفراء قالت ليهو انت يا ابوي كنت لابس الجلابية طول اليوم؟ قال ليها لا كنت معلقها في راكوبة .. قالت ليهو احتمال تكون جات من سقف الراكوبة .. حمد قال ليهم مستحيل عقرب تخش في جيب زول براها .. هنا اب حنك اتذكر نظرات الراجل العامل الكان واقف لمن هو لبس الجلابية .. وبدا يربط في اﻻاحداث .. وتصرفات الزول ده معاهو .. قاﻻ ليها ياعفراء ..كلام حمد ده 90% صح.. بس انا مابقدر اتهم زول الا اتاكد .. قالت ليهو بتتاكد كيف قال ليها يوم السبت ان شاء الله ح اتاكد من الموضوع ده .. عشان مانظلم زول ساي ..
قامت عشوش قالت ليهو يالطيف ياعمر ..انا قلبي انقطع من الحكاية دي.. وبقيت ما مطمةة عليك كلو كلو ..غايتو كان لقيت الكلام ده صح وفي زول داير يضرك ختا ليك العقرب في جيبك .. تاني نحن مابنخليك تشتغل هناك .. قال ليها يا عشوش خليك متوكلة على الله مابتحصل لي حاجة .. شفقتك الكتيرة دي عليك الله خليها ، قالو في المثل (المشفوق مدفوق.. ).. المهم عد باقي الخميس والجمعة مع وليداته ..ويوم السبت جاء .. وباشر الشغل عادي اصلو ماقال حاجة .. الزول بتاع العقرب يعاين ساي .. يعاين لي اب حنك ماشي وجاي .. وابحنك ملاحظ وعامل رايح ..قام قال ليهو ياعمر انت كويس.. قال ليهو الحمد لله .. قال الخميس والجمعة كيف معاك .. قال ليهو تمام .. قال ليهو يعني مافي حاجة ..
قام ابحنك حب يفاجئه ..قال ليهو انت قاصد العقرب؟
داك الاهبل قال ليهو ... اها؟؟
قال ليهو ماقرصتني ورب العالمين نجاني منها لكن انا مابخليك ..
قال ليهو انا مالي سويت شنو . ؟
قال ليهو السويتو انا بعرفه ختيت لي العقرب في جيبي ..
قال ليهو اثباتك ياخوي ..
قال ليهو بس دقيقه .. واتصل على عم فضل وحكا ليهو الحاصل .
عم فصل قال ليهو لازم اجي انا بكرة هناك واغير العمال ديل مابنلعو معاي .. وبكرة طوالي عمك فضل جاء وجمع العمال وقال ليهم ياجماعة .. انا استغنيت من خدماتكم .. واداهم حقوقهم وحوافز .. مع انهم كانو شغالين باليومبة والاسبوعية .. وقال لي ابحنك انت زول بقيت اخوي وصديقي ..زول يضرك مابلزمني زي الكانو ضراني.. والعمال ديل فقدوا العمل بسبب الطمع .. وقالو في المثل الطمع ودر ماجمع ..
نحن نشوف غيرهم طوالي .. ابحنك قال ليهو تشول غيرهم ليه .؟
نحن اساسا مامحتاجين عمال .. خلى السواقين يستلموا البضاعة من الحواته مباشرة .. ويحملوها براهم ..ونزيد للسواقين مرتباتهم .. وبي كدا بنكون ربحانين مرتين .. وانا بستلم البضاعة في الخرطوم وبساعدك في توزيعها .. واساسا انا بقيت بعرف .. كمية البضاعة اللي في القفة قدر شنو .. بمقياس دقيق .. يعني لو القفة نقصت سمكة واحدة بعرفها .. عمك فضل قال ليهو والله ياعمر انت المفروض تكون وزير الاقتصاد .. وانا يا صاحبي من الليله شغلك معاي بكون بالنسبه ما بالمرتب لاني بوجودك ربحت ربح ماكنت بحلم اني احققو ..(سبحان الله وهذا ظل من ظلال المظالم).. فالناس تحيك بك الظلم والله يجري لك النعم .. تباركت ياوكيل الغافلين ..
طيب في الوقت الكان عمر موجود في الموقع مع عم فضل.. في زول عقبو وجاهو في البيت .. الزول ده منو؟؟ ..
الباب دقه .. عشوش قالت امشي يا عفراء افتحي الباب شوفي ده منو؟ فتحت الباب لقته ده الوسيلة السمسار ..( الحاقد)
لكن طبعا" مابتعرفو .. اها لمن عاين لي للبت والجمال الفوقها.. فتح خشمي مقهي خمس دقايق .. وهي بتسأل فيهو .. عليكم السلام .. عايز منو ياعمي ؟ ماننسى البت قدر بناتو ..
قال ليها انا اسمي الوسيلة صصصصاحب ابوك وزميلو في السوق ممكن ادخل؟؟
قالت ليهو بس ابوي مافي .. قال ليها مامشكلة اشرب موية واطلع..
قالت دقيقة طيب ياعمو اكلم امي ..
دخلت جري حفيانة كلمت امها ...امها قالت ليها مابندخل راجل غريب
جيبي التلفون نسأل ابوك .. اتصلت على زوجها .. وقالت ليهو في راجل في الباب ياعمر قال زميلك وصاحبك اسمو الوسيلة ندخلو؟
قال ليها ايوة ده زول صديق وزمالة سنين معاي في السوق
مافي مشكلة خلوه يدخل..

....................................................................................................

ظلال المظالم
الحلقة السادسة
بقلم طارق اللبيب..
بعد عشوش استلمت التصريح من زوجها عمر ..قالت لي عفراء شوفي حمد وين ..خليهو يدخلو على الصالون بتاع الرجال .. وفعلا كوركو لحمد ..
كان بقرا جوة .. جا ودخل الراجل وفتح ليهو الديوان .. وجاب ليهو الموية الساعة كانت عشرة صباحا ..وكانو مستغربين من وقت الزيارة العجيب ده ..
قعد يتونس شوية مع حمد وسألو وين ابوك ..قال ليهو ابوي في الشغل .
قال ليهو شغله وين؟ قال ليهو في جبل اوليا . وطبعا حمد ماكان عارف انو ابوهو خلاص ح يجي راجع يشتغل في العاصمة ..
قال ليهو بتقرا وين والاسئلة الكتيرة دي عنه وعن اخته ؟؟ المهم وراهو وفهم انو اخته ح تخش الجامعة الفلانية .. قالو ليهو الفطور قال فاطر جابو ليهو الشاي ..
وهوبشرب في الشاي شاف البت لابسة وطالعة ..ماشة لخالتها في بحري كانت ضربت ليهم الصباح قالت طالعة عزاء وعايزة عفراء تجي تقعد لي مع الاولاد الصغار ..
الوسيلة لمن شاف عفراء لابسة وطالعة ..ما كمل كباية الشاي مرق وراها وركب عربيتو وحصلها ..هي كانت واقفة في الظلط منتظره المواصلات .. واليوم يوم سبت .. سايق ليهو عربية مامعروف حقتو ولاحقة رهينة ..
وقف جمبها وقال ليها اركبي ياعفراء اوصلك ماشة وين يابتي؟ .. قالت ليهو ماشة لخالتو في بحري .. قال ليها خلاص في طريقي ..
قالت ليهو حاضر ياعمو اصلا انا بتضايق من المواصلات ..
ركبت معاهو قال ليها شكلك انسانة طيبة ..وبت حلال وشاطرة الله يديك العافية ..انا عندي بتي قريب من عمرك ده ..وعندي ولدي اكبر منك بشوية ..
ماعارف قلبي اتفتح ليك شديد ياعفراء..
قالت ليهو حتى انا ياعمو حاسة باني بعرفك من زمان من دون اصحاب ابوي حسيت بيك زي عمي بالضبط ..
ومن اليوم ده حتكون في مقام ابوي ياعمو ربنا يخليك أولادك ..
سكتت مسافة كدا وقالت سبحان الله ..
قال ليها في شنو؟
قالت ليهو الناس الطيبين ظاهرين من وجوهم والله ياعمو انت الزول البشوفك قبل مايتكلم معاك بحس بالامن والطمانية ويشعر بانو الخير ماشي قدامك ووراك ..
ابوي بالجد انسان محظوظ بانو عندو اصدقاء زيك ..
الوسيلة سكت مسافة.. وحس بحاجة جواهو كدا غريبة ..وكل النية السيئة الكانت جواهو اتشتت ..واتفرزعت بطريقة غريبة من كلام البت دي ..
قال ليها بتجي راجعة من خالتك متين ؟
قالت ليهو احتمال العصرية ..
قال ليها خلاص شيلي تلفوني لمن تكوني طالعة انا اساسا في طريقي اضربي لي لمن تكوني طالعة ..
بجي اخدك من بيت خالتك معاي .. حتى لو ماجيت انا برسل ليك حسام بالعربية ..
قالت ليهو حسام منو ؟
قال ليها حسام ولدي .. قالت ليهو دام ولدك انت ..يبقى ده في مقام اخوي لانو ابوي مانعنا نركب مع الاغراب ..
قال ليها ابوك كلامو صح لانو البلد بقت مامضمونة نهائي ..
المهم وصلها لشارع بيت خالتها ومشى السوق وطول الوكت وهو سارح ومتعجب مرة يتعجب في جمال البت ومرة يتعجب في طيبتها وبراءتها وسلامة نواياها ..
مرة يعطف عليها ومرة يتذكر العملية العملها فيهو عمر ..ويعض يديهو ..
في النهاية غلب عليهو طبع الشر ..لكن اتاكدا انو هو مابقدر يعمل ليها اي حاجة ..
لانها كسرت قلبو نهائي بكلامها ..
اتصل على ولده الشفاتي درجة اولى حسام .. قال ليهو حسام ياصاحبي تعال عندي ليك دامة من الدرجة الاولى ..
حسام هههه قعد يضحك قال ليهو والله يا ابوي انت امورك دي مابتخليها ..
ياحاج انت كبرت ماتعقل شوية ..
قال ليهو لا ده موضوع بهمني شديد وعايزك تخدمني فيهو ..
قال ليهو اخدك كيف يعني .. قال ليهو انت بس تعال السوق ..
جاهو طوالي طبعا حسام هواهو البنات والخمج والكلام الفاضي ..
ابوهو قال ليهو ياحسام في واحد من السماسرة اتهمني باني حرامي ووسخ سمعتي واتكلم في امك واخواتك ..
وانا عايز انتقم منو والليلة اتعرفت بي بتو وعايزك تشوف شغلك معاها..
عايزو وجهو يسود ويمشي مدنقر في الواطه طول عمره
عايز سمعتو تتوسخ زي ماوسخ سمعة ابوك وامك
قال ليهو يا ابوي الم فيها وين البت ؟؟ انا لو ليت فيها موضوعها معاي مستحمي ..
قال ليهو انا ظبطت ليك الموضوع .. انا منتظر منها تلفون
وتركب العربية تمشي ليها وفهمو الموضوع كلو ..
قال ليهو يا ابوي والله تستاهل بوسة ده فوق صلعتك دي ..ده موضوع ظابط لمن بيغادي ..
لكن انا عندي فكرة..
احتمال ماتتصل احسن امشي ليها في بيت خالتها واسوقها ..
قال ليهو انت اوسطه في السفاله ياحسام ها ها ها امشي هاك المفتاح ..
دمرو الزول ده وليك عندي هدية ماتحلم بيها .. قال ليهو يا ابوي انا قلت ليك بس سجل لي البيت .. قال ليهو البيت حقك انت ولدي الوحيد .. بكرة بسجلو ليك
كدي انت امشي فشني في اب حنك ..
طوالي حسام شال المفتاح ومشى لي بيت خالة عفراء حسب ماوصف ليهو ابوهو

.............................................

ظلال المظالم ..
الحلقة السابعة ..
بقلم طارق اللبيب .. حسام دور العربية ومشى يوصل البت ..ودخل بالشارع ووقف قدام البيت وضرب بوري.. ماف زول جاهو .. نزل دق الباب .. جاتو خالة عفراء .. مرحب عليكم السلام ..قال ليها انا حسام ..عفراء موجودة .. قالت ليهو نعم .. الموضوع شنو .؟ قال ليها مافي شي قولي ليها حسام ود عمك الوسيلة جا عشان يوصلك البيت .. قالت ليهو ايوة صح حكت لي انو ابوك وصلها .. الله يديكم العافية .. خلاص كويس اكلمها ليك .. مشت قالت ليها حسام منتظرك برة بالعربية .. قالت ليها طيب لحظة .. طلعت سلمت عليهو بابتسامه عجيبة .. وهو من شافها جاهو هبوط اضطراري في مطار الخلعة ..وحسه بي حمى في قلبو ..
قال ليها هلا والله هلا .. كيفك عفراء .. خلاص طالعة نمشي .. قالت ليهو بس بتاخر شويه .. قال ليها اخدي راحتك .. خشت قالت لي خالتها ياسلاااام على الناس ديل .. بالله لسه الدنيا بخيرا لمجرد انهم اصحاب ابوي .. تعبو معاي في التوصيلة .. خالتها قالت ليها .. اقول ليك حاجة ياعفراء ماتزعلي مني .. بس الولد ده انا ما ارتحت ليهو كلو كلو..
قالت ليها حرام عليك ياخالتو هوهسي عمل شنو .؟ ماصح نظلم الناس بمجرد احساس .. قالت ليها المهم انا خايفة عليك وماعايزاك تركبي معاهو براك ..قالت ليها انتي تخافي على منو .. انا شريرة ومافي زول بقدرني .. قالت ليها هاها والله انتي وامك الغنماية تاكل عشاكم .. مساكين الله والرسول .. عفراء عايزة تكوي خمارها وتطلع ..
هناك في البيت عمر ابوها جا ..وكلموه بتفاصيل الزيارة .وعشوش قالت ليهو عفراء اتصلت من بيت خالتها.. وقالت صاحبك الوسيلة وصلها معاهو ....واحتمال يجي غاشيها يجيبها البيت .. قال ليها ياسلام عليهو ياخ الوسيلة راجل مهذب.. واخو اخوان .. وهسي احتمال يكون جاني عشان شغل .. لكن هسي الوكت اتاخر.. انا ماشي اجيبها.. احتمال يكون ماجاها .. طوالي اتصل على خالتها .. وقال ليها انا جاي اسوق عفراء .. خالتها ماقالت ليه. عن زول منتظرها ..قفلت الخط طوالي .. وقالت لي عفراء ابوك في الطريق جاي يسوقك .(مراة حكيمة والله) .قالت لي عفراء امشي كلمي حسام لو بنتظر يدخل على غرفة الضيوف ..ولو مستعجل يمشي ..كان قالك بنتظر .معناها زول كويس زي ماقلتي.. وكان قال مستعجل ومشى. معناها ظني في محلو .. طلعت عفراء قالت ليهو ياحسام ابوي جاي في الشارع لو بتنظر ادخل ..
قال ليها طيب كويس بنتظر ماعندي حاجة .. انا زاتي مشتاق اسلم عليهو سمعت بيهو كتير عند ابوي ..
دخل غرفة الضيوف ينتظر .. عفراء مشت قالت لي خالتها انا ماقلت ليك احساسك دايما" ماتعتمدي عليهو .. حسام دخل ومنتظر ابوي ..
قالت ليها استغفر الله العظيم من حقو .. المهم كلها تلت ساعة وعمر جاء ولاقا حسام وسلم عليهو .. وقال ليهو ماعرفتك .. قال ليهو انا حسام ود الوسيلة ..كنت جاي اوصل عفراء ..ابوي كلفني ..لمن عرفت انك انت جاي قلت انتظر اسلم عليك واوصلكم ..
عمر قال ليهو الله يحفظك يا ابني انتو ناس ماساهلين بالله ابوك كيف ..؟
قال ليهو تمام الحمد لله .. عمر قال ليهو ابوك ده انا بعزو معزة ماتتخيلا ..بعدين زمالة وعشرة سنين ..
المهم عفراء طلعت وركبت ورا وابوها ركب قدام مع حسام وبتونسوا ..
وعفراء ساكته طيلة الطريق .. وحسام مارفع عينو عاين ليها وبتكلم بكل ادب وتهذيب
بطريقة غريبة .. وكلام كلو كلام راقي ..تسمعوا تقول ده اما المسجد معانا .. سبحان الله .. ناس تعرف تمثل تمثيل عجيب ..
طبعا عفراء اعجبت بشخصية الانسان ده على حسب ماظهر ..
ولمن ابوها سألو بقرا وين ؟؟ اكتشفت انو بقرا في نفس الجامعة المفروض ماشة تقرا فيها عفراء ..
عمر قال ليهو الحمد لله في نفس جامعة عفراء الح تخشها .. انا كنت متوتر من دخول عفراء للجامعة لانها زولة مسكينة.. لكن مادام انت معاها مابجيها عوجة ..انا كدا اطمأنيت وخليتها ليك امانة في رقبتك ..
الجنى الشفت اتكيف كيف وظهرت اسارير الفرحة فوق وشو واغتنم الفرصة وقال ليهو خلاص قبل انت ماتنزل اديني رقم تلفونك وتلفون عفراء وان شاء الله مافي عوجة خليك مطمئن دي زي اختي وفي عيوني الاتنين ..
وعفراء اعجبت بالزول ده شديد .. وكل ماتعاين ليهو تلقاهو مدنقر في الواطة
مامعروف تمثيل ولا مستحي فعلا .. لانو البت ماشا الله عليها جمالها بخجل مابتقدر تعاين ليها مرتين ..
ونزلهم ومشى لاقى ابوهو ..و قال ليهو يا حاج والله الشرك قبض قبضة غريبة ومؤسسة .. وحكا ليهو الحاصل ..وقال ليهو بالمناسبة ياحاج البت دي زولة مهذبة شديد ..وصعب الوصول اليها بالطريق القصير بس عايزك تديني فرصة ..وحسام بعد لقاء عمر ..حس انو ابوهو ظالمه ومستحيل الراجل ده يكون قال كدا في امو وابوهو ..لكن ماصارح ابوهو بالفكرة دي .. بس هو عندو مصلحة لازم ينفذ المهمة عشان يسجلو ليهو البيت ..وايضا هو انسان رزل وسافل ممكن تتوقع منه اي حاجة ..
ومرت الايام .. والوسيلة مازال الحقد في قلبو ينمو يوما" بعد يوم ..
والشغل مع عمر ماشي زي الفل والنسبة كلو يوم بتكبر .. والقروش جرت في يدو ..
وفكر يأسس نفسو .. يشتري ليهو قطعة ارض يبنيها لي اولادو ..
وعفراء دخلت الجامعة .. ومن اول يوم في الجامعة اتصل عليها حسام .. وقال ليها في نهاية اليوم لاقيني عايز اوصيك بي حاجات معينة ..
تتخيل من يوم لاقاها تاني ما اتصل عليها .. وهي اتبسطت جدا للاتصال ده وظهرت الفرحة في كلامها وقالت ليهو انا برضو من الصباح بفتش فيك .. حاسة باني راسي لافي ومافاهمة اي حاجة ..

....................................................................................................

ظلال المظالم
الحلقة الثامنة ..
بقلم طارق اللبيب
من بعيد حسام شاف عفراء ماشة عليهو ..
تتبسم لابسة لبس بختلف عن بنات الجامعة كلو ستر وحشمة ..
اول ماوصلت قالت ليهو اخوي الغالي وين انت؟
يعني الاخو بنقطع من اختو قدر ده؟ ..قال ليها كيف حالك ياعفراء؟ ..
والله بس الانشغال والمسؤليه انت عارفة انا الولد الوحيد و الكبير..قالت ليهو صح ابوك بكون معتمد عليك ..وبر الوالد بفتح طريقك ويزيل عنك المصايب ..
خصوصا انو عمي الوسيلة انسان بمعنى الكلمة..
والله كتير اتمنيت ابوي يوديني زيارة لي بيتكم عشان اتعرف على اخواتك اللهمه حيكونو اخواتي..واشتقت لعم الوسيلة شديد..
قال ليها كيف ابوك والوالدة .. قالت ليهو تمام الحمد لله ..ابوي قال لي اي مشكلة تواجهك في الجامعة معاك حسام .. وبالجد انا فرحانه شديد انك انت هنا ..قال ليها افديك بعيوني ..قال ليهو سلامتك وسلامة عيونك انت الخير وسيد الخير ..قال ليها اها الامور تاني شنو ؟ ..قالت ليهو والله تمام الحمد لله ..تصدق ابوي من اول يوم لاقاك.. حباك حب عجيب وكل دقيقة ياسلام على حسام ياسلام على حسام.. قال ليها اها وانتي؟بتقولي عني شنو؟ .. قالت ليهو انا دايرة شنو اكتر من لقيت اخو كبير .. طبعا حمد اخوي اصغر مني.. وكنت فاقدة احساس اخو كبير ..من اليوم داك وانا حسيت اني مطمئنه حتى وانت بعيد..تاني لو ابوي او امي اتشاكلو معاي بشكي ليك انت ههههه( هو وطبعا في نفس ادبو وتهذيبو ومدنقر) ويتبسم ..
وقال ليها والله دي مكانه كبيرة ياعفراء ربنا يقدرني.. قالت ليهو انت اكبر من كدا انا ماحصل ظني خاب في زول اما بالنسبة ليك اظن ما أقدر اوفيك .. المهم قالت ليهو ياحسام الوقت اتاخر وانا مشاة اصلي وماتشيل هم انا معاي بنات اتنين من جيرانا برجع معاهم .. قال ليها خلاص كويس خلي بالك من نفسك ربنا يحفظك ..يلا في امان الله .. ومشت بس ردة فعل كلام عفراء على حسام شنو ؟ الله اعلم ..
طبعا عمك عمر اب حنك القروش جرت في يدو وبقى مرطب وناس السوق سمعو بيهو لانو بقى يرسل لاصحابو السماسرة المقشطين بعض يد العون ..
اها لمن الوسيلة سمع اتصل علي اب حنك لانو شكله الحقد ازداد اضعافا" مضاعفة وزاد عليهو مايسمى بالحسد ..
قال ليهو كيف يا ب حنك المبروك ياخي مشتاقين . قالو ياخوي رطبت ونسيتنا .. قال ليهو والله الحمد لله انا طبعا" ما ممكن انساك انت اول زول انا اتعرف بيهو في السوق ومنك عرفنا الصنعة ..
كيف صحتك ووليداتك .. قال ليهو الحمد لله .. اها يا ب حنك ماعندك قريشات كدا نستثمرها ليك دايما الزول البكون شغال فيشغل زي شغلك ده بكون رادم القروش وماعارف يسوي شنو؟
ابحنك قال ليهو ابدأ" والله زي ماعارف نحن لاهسي قاعدين في بيت ايجار
عندي نية اشتري لي قطعة واخت لي فيها انشاءالله اوضتين
عشان ارتاح من حكاية سيد البيت البجي كل اخر شهر يدق الباب داير حق الايجار .. ياخي الزول يسكن في ملكه دي مافي احسن منها ..
انت يا الوسيلة في نعمة .. قال ليهو خلاص مامشكلة نفتش ليك قطعة في حتة كويسة القروش المعاك كم ؟
قال ليهو معاي كدا قال ليهو غايتو انت زيدها شوية وانا بفتش عشان نلقا ليك في حتة ممتازة ..
انا عايزك تطلع من الاحياء الشعبية دي وتمرق على وش الدنيا .
قال ليهو الله يبارك فيك ياوسيلة انت دايما" بتسعى بالخير للناس ..
خلاص الاسبوع الجاي انا ممكن اكمل المبلغ كدا .. قال ليهو تمام كدا بتشتري في حتة كويسة .. ومية مية ..
اب حنك قال ليهو قال ليهو اول ما اكون جاهز بجي بجيب القروش واجيك وانت تتصرف ..

....................................................................................................


عدل سابقا من قبل الامبراطور حذو في الإثنين أبريل 18, 2016 11:02 am عدل 3 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.nojoumarab.net
الامبراطور حذو
Admin


عدد المساهمات : 223
تاريخ التسجيل : 22/11/2014
العمر : 26
الموقع : http://sudan.nojoumarab.net

مُساهمةموضوع: طارق اللبيب .. رواية ظلال المظالم من الحلقه 9 - 14   الإثنين أبريل 18, 2016 9:29 am

ظلال المظالم ..
بقلم طارق اللبيب
الحلقة التاسعة
بعد تلاتة ايام الوسيلة مشى اتكلم في قطعة ارض ناصية.. وحنك الجماعة وادوهو ليها بي سعر حلو شديد .. ضرب طوالي لي عمر اب حنك..
وقاليهو يا عمك جيب القريشات القلتهن .. انا لقيت ليك حاجة لقطه والله ماكنا نحلم بيها وفعلا اب حنك بكره الصباح شال القروش في كيس اسود.. وركب مشى لي الوسيلة .. ومشو شافو قطعة الارض.. واب حنك عجبتو جدا جدا .. لمن ماصدق السعر .. الوسيلة قال ليه الجماعة ديل محتاجين للكاش ..لكين الارض سعرها اكتر من كدا .. عمر قال ليهو والله ظاهر .. والله ياخي انت الله يكرمك ..وسلم القروش من يدو لسيد القطعة .. يعني مافي اي كباري .. بعدين دايما السمسار مابخت كبري فوق رفيقو لانهم كلهم كاشفين اللعبة .. واب حنك وثق الورق عند المحامي بي نفسو .. المحامي قال ليهو اعمل ليك عقد بيع ؟ ولا أعمل ليك توكيل من صاحب القطعة لي قدام تعمل عقدك وتنزلها باسمك في شهادة بحث باسمك عديل .. ؟ اب حنك قال ليهو عقد بيع عديل ..
حكاية التواكيل دي فيها لعب كتير يا استاذ ..
المحامي قال ليهو صدقت بس القصة محتاجة لحبة اجراءات وحاجات كدا تحسين وشنو وشنو ؟؟ المهم بتصرف معاك لكن التوكيل مابصرف ..
اب حنك قال ليهو الضمان امان .. انت بس اعمل لي وسلمني شهادة بحث باسمي .. المهم شال الورق المبدئي وخلا للمحامي باقي الاوراق عشان هو يتابع باقي الاجراءات ..
المهم في النهاية القطعة طلعت سليمة والمحامي طلع شهادة البحث بي اسم عمر والموضوع سليم في السليم ..
والوسيلة بعد تمه الشغل حلف من العمولة (حق السمسرة) رغم انو يومو كلو ضاع وهو ساكي مع اب حنك اجراءات البيع وجاري بي عربيتو من هنا لي هنا .ياخي عمر ده اتكيف من الوسيلة كيف عجيب .. وحس بانو خدمو خدمة مابعدها خدمة وقال ليهو يا الوسيلة ياخي انا كدا بزعل منك الخوة خوة والشغل شغل .. انت شغلك شنو غيرده ؟ مش دي معايشك اقبل القريشات مني عشان اكون مرتاح .. الوسيلة حلف ستين يمين
اها لمن عمر اطمأن على قطعتو واوارقو بقت في يدو قال للوسيلة ياخي عفراء بتي مجنناني جن .. كل يوم تقول لي وديني ليناس عمو وسيلة انا عايزة اتعرف بي بناتو .. وانت زي ماعارف مشغولياتي .. مابقدر اجيكم الا الجمعة ..
الوسيلة قال ليهو ياعمر البيت بيتكم تجو في اي لحظة جمعة سبت صباح مساء ..
عمر قال ليهو خلاص ان شا الله بحاول يوم الجمعة ولو مالقيت طريقه برسلها ليكم معاها حمد اخوها .. قال ليهو خير لكن نحن بتشرفنا انت لو جيت معاها ..
قال ليهو نحاول ان شا الله ..
الوسيلة لمن مشى بيتو قعد يتونس مع حسام ولدو .. قال ليهو اها أخبار عفراء بت اب حنك شنو؟ قال ليهو والله ياحاج البت دي .. ملاك ومسكينة الله والرسول والله الزول نفسه ماتطاوعه يعاين ليها مرتين .. ياحاج عليك الله بس البت دي ابعدني من جيهتها وشوف لي اي موضوع تاني اخدمك فيهو بعيوني .. بعدين البت دي شايفاني زي اخوها .. وبتحبك وبتحبنا كلنا ونفسها تجي بيتنا ياخي حرام والله ..
بعدين انا عايز اسألك ياحاج منو القالك انو ابحك قال فيك كدا ..؟
ياخي الراجل الشفتو انا ده والله مابقول كلام زي ده عن اي انسان خلي عن صاحبو وزميلو .. عليك الله ياحاج اتأكد من الموضوع ده قبل تظلم الزول ..
الوسيلة قال ليهو انت ياكلب اظنك وقعت في حب البت .. لانها بالجد تستاهل ..
حسام قال ليهو والله دي اي زول يشوفها يحبها ياخي دي خلقة واخلاق واحتشام غايتو سبحان الله.. بس المشكلة هي شايفاني زي اخوها بالضبط .. يعني ماعندها تفكير غير كدا .. وشايفها فرحانة بالفكرة دي شديد .. ياخي دي انسانة روعة ..
انا من الله خلقني ماشفت جمال وادب ماشين مع بعض بالحرص ده .. انت عارف ياحاج اي شلة في الجامعة القاهم قاعدين بتكلمو عنها بعدين يابوي .. حتى لو اب حنك قال الكلام ده انت المفروض تصفي حسابك معاهو براك مافي داعي تدخل البت المسكينة في الموضوع ..الوسيلة قال ليهو والله ياحسام ياولدى سبحان مغير الاحوال .. ده انت البتتكلم كدا .. والله انا زاتي غيرت راي خلاص انسى الفكرة .. قال ليهو بس يابوي البيت .. انت هسي عندك بيتين .. البيت الساكنين فيهو والبيت المؤجر .. سجل البيت المؤجر .. قال ليهو سجلتو ليك قبل ماتقول لي الاوراق في العربية امشي شيلها .. طبعا حسام حب والده حب شديد
والابو زعلان من جواهو ان اب حنك كل ماأفكر أضروا الامور بتقلب في صالحه ..وكل ما أكيد ليهو بي خطة بتتحول ليهو لي نعمة شوف حسي الحب اللقاهو هو وبتو من حسام ..
لكن انا برضو ماحسيبو في حاله من عمليتو العملا فيني في بيعة حاج احمد ..
والسمعة السيئة الأنتشرت عننا .. وهسي اشتري القطعة وباكر يكون عندو بيت ملك وعربية .. واغلبي منك يابحنك .. بس انا كسبت ثقتو واي ضربة بتجيهو مابتكون معروفة مني لانو بعد كدا لو حسام كشفني بخسر ولدي الى الابد ..
في يوم من ذات الايام.. عفراء لاقاها حسام وقال ليها انا بعدين عايزك في موضوع ضروري شديد ..
قالت ليهو حاضر .. انت كويس ياخوي الغالي .. ان شاء الله بس مافي مشكلة؟
قال ليها لالا ابدا" الامور كلها كويسة .. المهم اتلاقو قال ليها بصراحه شديد انا من اتعرفت عليك اتغيرت وخليت التدخين وواظبت على الصلاة وحسيت بالايمان والطيبة .. والراحة النفسية اللانتي حاسه بيها .. دايما شايلة مصحفك ابوسسته ودايما في كلامك بتجيبي سيرة ربنا كتير انا حبيت الايمان المجرد العندك ده المامرتبط بي توجه ولابي حزب أنا بقيت مابقدر افارقك ..انتي حولتيني من شيطان لانسان بدون اي خطب ولامحاضرات مجرد صفاتك وتصرفاتك وكلامك العادي دمر كل الشر الجواي .. انا اول مرة اعشق الجمال والروح اول مرة احس باني مسلوب الارادة تما" انا تاني مابفارقك ..
قالت ليهو كيف يعني ؟؟ تمشي معاي بيتنا؟ههههه وضحكت .. قال ليها لا بقصد حاجة تانية ..قالت ليهو ايوة فاهمة فهمت عليك .. بس انا خايفة من حاجة واحدة ياحسام .. خايفة انو الخوة البيني وبينك تتحول لحب وغرام وكلام فاضي.. وانا اقوم اخسر اغلا حاجة في حياتي وهي اخوي الماصدقت اني القاهو في حياتي ..قال ليها طيب مالو لو كان الحب غرضو الزواج الشريف . قالت ليهو ياتو زواج وانا لسه في بداية اولى بعدين انا ممكن اتزوج اي انسان تاني مافرقت .. بس انت لايمكن لاني ماعايزة اخسر احساس الاخ اللقيتو فيك ..بعدين انت الح تستقبل اهل العريس البجيني.. وانت البتسوقني وتوصيني .. وتسلمني لي بيتي .. وفي النهايه الموضوع ده هسي سابق لاوانه شديد ..بس انت الله يخليك ماتفكر اختك تتألم بفقدان الفرحة كونك انت اخوها .. انت ماعارف احساس البت العندها اخو كبير
وشعور الامن والطمأنية البتحسو والحماية ..
اووو هنا الفرحة الكانت في قلب حسام بسبب التعرف على عفراء ذهبت ادراج الرياحوحس بمرارة كدا غريبة والم مبالغ فيهو .. قال ليها حاضر ياعفراء
وبقى مدربك ماعارف يقول شنو؟ وحس انو عايز يبكي .. بس قال ليها خليني امشيي ياعفراء انا ماش البيت ..لكن هي ماحست بي بيهو لانها كانت سارحة وتتبسم فرحانة بس بوجوده جمبها كاخ.. بس السؤال .هل هذه الصدمة ستؤثر في سلوكيات حسام مرة اخرى وينتكس ؟؟
..

....................................................................................................

ظلال المظالم
الحلقة العاشرة
بقلم طارق اللبيب
..............
للاجابة على السؤال .. الزول يتابع مجريات الاحداث في الحلقة دي
..حسام مشى البيت وكان حزين حزن شديد من الصدود..
والطريق الاتقفل في وشه بطريقة جد غريبة .. وبدا يفكر تفكير شديد في كيفية تحويل المسألة لصالحو .وكلما جاهو الشيطان يزين ليهو طريق الضر. يتذكر مدى الحب الاخوي البتحملو ليهو عفراء. ويتذكر كلامها دايما بتقول ليهو. البنفع الناس ربنا بنفعو ..والبضر الناس ربنا بضرو ..يلعن ابليس .. وبقى همو كله انو عفراء تكون شريكة حياته وام اولاده .. قرر انو يواصل دور الاخ المخلص ومايتخلى عن المحاولة .. لي طريقه يحول بيها لونية الحب ده . الحب
ده شكلو سلك طريقا" خطا" في اعتقاده .. سرح كدااااا وقال الايام بينا ياعفراء.. انا بخليك تتنفسي الهواء البكون حوالي ..وتموتي في التراب البمش عليهو ..
مرت الايام الطويلة.. والوضع كما هو ..وكل مشكلة تواجه عفراء بتجري جري لحسام .. وحسام بتفانى في حلها وحسمها.. وفعلا حسام كان رجل والرجال اقلة.. طيلة الفترة دي وحسام مارفع عينو على عفراء ..
وأغلبية الناس كانو قايلنها بت اخته.. وللا بت اخوه .. لانه بدافع عنها دفاع غريب وماظاهر بينهم اي قصة حبب ..وكان لايسمح لاي طائش الاقتراب منها .. ولو جا ساي لقى زول جايب سيرتها وشو بتكرفس ويقرب يضارب ..
الطلاب كلهم بقو يخافو عديل من جيهة عفراء .. (غفرك ديدبان شبه السكونو عراين) ..وزي ماقال الشاعر (البقرب عليها النار ترش بالوابل) المهم في المعنى انها بعد ماكانت مهدده بالضياع المدبر من الوسيلة بواسطة حسام ..عاشت في حماية من حسام نفسه ومن بقية العطالة و الهمجيين في الجامعة وبرة الجامعة .. وده ظل من ظلال المظالم التي يستظل بها المظلوم دون ان يمسه الظلم .. فسبحان الله ان للمظالم ظلالا .. فلذلك يقال .. كن عبد الله المظلوم ولاتكن عبد الله الظالم .. فان المظلوم معه الله .. واما الظالم فالله عز وجل ضده .. فما اكثر الكسب لمن كان الله معه .. وما اشد خسارة من كان الله ضده ..
عفراء الان اصبحت مطلوبة محبوبة مرغوبة يرونها ولايطالونها .. كانها الذهب جوه البترينه تعاين بعيونك وتتشهى والعين بصيرة الايد قصيره . حسام همه كله ان يحافظ على مكانه في قلبها.. الى حين يتحول هذا الحب الاخوي الى عشق وغرام ..الايام مرت ويوم من ذات الايام ..اب حنك قال لي عفراء نحن بكرة الجمعة ماشين لعمك الوسيلة انا وانتي وحمد .. عشان تتعرفي بي بناته .. ياخي عفراء دي قربت تطير من الفرحة .. وحمد ماشغال بالموضوع كتير ..
كمان حمد قال لعفراء انا ماعارفك الناس ديل ديل بتريديهم كدا ليه ؟ اقول ليك حاجة .. انا والله لو ماكلام ابوي ماماشي زاته .. ماعندي رغبة في المشوار .
عارفه ليه ؟
انا الوسيلة ده بالذات من يومو الجاء في بيتنا انا اصلا ماحبيتو ,, ياخي ده كان بسأل سؤال نكير.. التقول المحقق كونن .. الزول البسأل كتير ده بتاع شمارات ..ولا بكون عندو حاجة في راسه..قالت ليهو انت ياحمد اليومين ديل جبت ليك فلسفة كدا بتعرفها براك .. دي شنو الظنون الفي راسك دي ؟؟ ماتبقى زول ضميرك وسخان .. اوعا يكون مشيك لخالتي الكتير ده اثر على مخك وللا حاجه .. اصلا هي موسوسه بتشك في اي حاجه .. ياخي عمو الوسيلة ده زول .. طيب والخصوص حسام ياسلام على حسام ..
انا لو ابوي بخليهو يجي يسكن معاك في الصالون حقنا ده او ان شاء الله يكونو جيرانا بس .. حمد قال ليها بالله شوف البت الغريبة دي ..!!
خلاص عرسيهو وجيبيهو .. قالت ليهو يعرس ركبيك .. في بت بتعرس اخوها ؟
قال ليها اخوك من وين يا بت؟؟ انت بتخاوي على كيفك ؟؟ طيب انا بطلع ود الجيران ؟؟ هههههه المهم نقاش كان جميل وممتع ..
اها طبعا عشوش كانت شاكه انو عفراء بتحب حسام .. قالت اشوفها بكرة لمن تدور تمشي بتلبس كيف .. كان لبست عادي زي ماهي معناها مافي شي.. ولو بالغت التزيين معناها الموضوع ياهو حب وكدا..
بكرة الجمعة عفراء لبست عادي بنفس لبسها واحتشامها المعروف.. لكن كانت فرحانة شديد .. امها قالت ليها ياعفراء انتي حسام ده مامعاك يوميا" في الجامعة ؟ مالك طايرة بالفرح كدا ؟... قالت ليها يا امي انا مافرحانة عشان ح ألالقي حسام .. انا فرحانة عشان ح اشوف عم وسيلة .. ومشتاقة لبناته اخوات حسام وامه .. فهمتي حبيتي ده كل الموضوع وطلعو.. وصلو بيت ناس الوسيلة وطبعا ناس الوسيلة البيت كله كان موجود عشان جية اب حنك واولاده والبنات كانو سامعين بي جمالها وادبها وقالو الليلة حنشوف الكلام فعلا ولا مبالغات ساي ..
المهم لما جو واستقبلوهم البنات الاتنين الكبار والطفلة وامهم كلهم فتحو خشمهم بعاينو للبت .. لمن عقدوها .. وماشا الله ماشا الله ..دي رقدت هبطرش .. البت الكبيرة ماقادرة تستوعب .. روحها مرقت فوق عفراء تعاين ليها داخلة ومارقة ومعجبة بيها اعجاب شديد .البت دي اسمها رقيه وهي راقيه شديد ..
عشان كدا مسنها رقية الراقية .. مشت لحسام .. قالت ليهو ياحسام عايز تقنعني انك ماعندك علاقة مع عفراء؟ قال ليها علاقة اخوية .. قالت ليهو اخوية بتاعة قلبك؟؟ كلامك ده قولو لواحدة هبلة ..
قال ليها انا عايز افهمك حاجة يارقية .. انا بحبها وبعشقها وعايز اجن فيها والله لابنوم ليك ولانهار وحاس بنفسي عيان عديل .. وكل يوم زايد علي حسسي
بس هي ماعندها تجاهي احساس ..غير انو انا اخوها أقسم بالله دي الحقيقة.. وانا ماعارف اتصرف كيف انا تعبت يارقية .. البت دي مسخت علي البنات ..وانا والله مابقدر امسك يد واحدة غيرها .. قالت ليهو طيب ليه ماكلمتني من زمان ؟.انت بس خلي الموضوع ده علي ..

....................................................................................................

ظلال المظالم ..
الحلقة الحادي عشر ..
بقلم طارق اللبيب ..
حسام قاليها : اياك يا رقيه تتكلمي معاها .. لامن بعيد لامن قريب انا براي بحل موضوعي قالت ليهو انا مابعمل حاجه ظاهره ..
انت قايلني غبيه ؟؟ .. قال ليها مع الصبر كل شي بجي ..هناك اب حنك والوسيلة في الديوان بتونسو منتظرين الفطور .. الوسيلة قال لاب حنك انا حاسي بي نفسي ماكويس ..كل مرة بتضايق وبتجيني لفة راس ..
قال ليهو احتمال ده من الضغط . وانت مامحافظ على نفسك اكلك كله دهون وملح .. الضغط والسكري ديل عايزات محافظه ..
قال ليهو ياخي الضغط معاي 12 سنة.. وانا طبيعي ماحسيت بحاجه .. قال ليهو لكن انت كترتها ..بتاكل وتشرب زي الماعندك حاجه .. انا مابعرفك ؟؟
قال ليهو اها ورينا اخبارك شنو يا عمر ؟ قال ليهو والله الحمد لله عال العال ..وفضل الله يبارك في ايامه .. مستأمني على كل الميزانية بتاعة الشغل يعني هو ماعارف الداخلة والمارقة ..
وزول واضعني في محل ثقة .. الله يديهو العافية .. وانا ان شاء الله اكون قدرها ..الوسيلة قال ليهو ربنا يوفق ..
اها والشغل ؟ قال ليهو الشغل بالنسبة.. والحمد لله ماشي كويس. هسي انا بلم لي في قريشات ..عشان ابدا اعمل لي ساس في القطعة وحبة حبة كدا الزول يسكن في حقو ..
قال ليهو ان شا الله انا اسجل ليك زيارة في اليومين الجايات ديل في محل الشغل ..قال ليهو ياريت والله .. اها حسام جاب الفطور وقعدو يتونسوا .. عمر قال لحسام اها يا حسام ماشين كيف في الجامعة وعفراء كيف ؟ ان شاء الله مواظبة على المحاضرات.. وحياتها في الجامعة مستقره؟
حسام قال ليهو يا عم عمر عفراء دي زولة براها كدا .. ماشا الله عقلها اكبر منها ..
الوسيلة قال ليهو ياعمر عفراء بتك عملت الانا ماقدرت عليهو .. قال ليهو عملت شنو ؟ قال ليهو خلت حسام يصلي ويسيب التدخين.. قال ليهو كيف يعني كان مابضلي وبدخن؟؟؟
قال ليهو تصدق ؟ ..! عمر قال ليهو وانت عارف؟ .. قال ليهو وبشيل مني قروش السجاير كمان..
قال ليهو سبحان الله .. والله ياوسيلة انا اخوي الاكبر مني بسجر لاهسع ابوي موعارفو بسجر ..
قال ليهو ديل ناس زمان يا اب حنك .. اولاد الزمن ده مابنقدرو .. قال ليهو ياوسيلة الاصول اصول .لكن الحمد لله مادام ربنا عافاه .. الماضي مافي داعي لي نكيتو ..
المهم الونسة كانت طويلة .. الاكل كان دسم واب حنك يشيل وينصح في الوسيلة انو يبعد من الاكل الدسم.. والوسيلة بقول ليهو .. الكاتبها الله بتكون .. والجلسة انتهت والجماعة بقو مرقة.. لانه ابحنك مصر انو يمشي البيت ..عشان يحصل الجمعة .. والجماعة الجوة لسع ونستهم ما انتهت .. ومعجبين بي عفراء وبسألو فيها اسئلة كتيرة ومتشابكة وهي طبعا خجولة وحساسة .. بس تتبسم وتدنقر وتجاوب بنص عبارة .. وما من نوع البنات البجن البيت ويقعدن يتلفتن في البيت من اركانه الاربعة .. وكمان يعلقن .. على الستاير والطاولات والعفش ولون الطلاء .. ويدخلو ناس البيت في ضفورن من الحرج .. عفراء ما أظنها شافت البيت كويس الا لون السراميك .. لانها كانت بتعاين طول وقتها للارض ..
واما حمد فكان قاعد مع ناس ابوهو وبتلفز في الحاجات وحركات الوجوه ..وساكت ساي ..كان لابس ليهو بنطلون وجزمة بيضاء ..وبعد الاكل قعد في كرسي طرف وخلف كراعو.. وخت يدو تحت حنكاتو وقعد يعاين ويسمع في الونسه ..بعد الونسة اتحركو ومشو ..
اها بعد يومين الوسيلة جا زيارة لعمر في محلو ووشاف طريقة الشغل وكيفية توزيع البضاعة للزباين .. وعمر كان شغال بي نفس .. وفرح جدا بي جية الوسيلة والوسيلة كان بعاين بي حقد عجيب .. الزول ده قلبو حجر ولا شنو ؟ الزيارة القبل يومين دي ما اثرت فيك؟ بعد الوسيلة مشى .. مشى حكى لزملاهو في السوق النعمة اللقاها اب حنك والشغل العجيب وقال ليهم اب حنك بقى رجل اعمال ..
اها يازول مرت الايام و التواصل مستمر وعفراء فرحانة بي فكرة انو حسام اخوها .. وحسام كل يوم بزداد جنون وحب وهيام .. وماقادر حتى يرفع عينو يعاين ليها .. وبقى في اتصال بين البيوت .. والبنات اتصادقن ..
يوم حصلت كارثة على عمر اب حنك في الشغل .. جا يوم الصباح فتح الدكان لقى الخزنة مفتوحة والقروش الفيها كلها مافي بل في اوراق بتاعة ديون على ناس برضو مافي ..
والمفتاح عنده هو بس .. حتى عمك فضل ماعنده نسخة من المفتاح .. والخزنة من النوع المابتكسر يعني مفتوحة بالمفتاح عديل .. وعمر ده جاته صدمة وزهول وماعارف يعمل شنو. الدكان مطبول من برة بالطبلة .. والخزنة مفتوحة والقروش مافي ؟؟ دي جن ده وللاشيطان .. ؟؟
كل المنطقيات بتقول ..انو القروش مافي زول بقدر يصل ليها غير عمر اب حنك .. والقروش قروش كتيرة شديد يعني ماحاجة ساهلة ..
وهو نفسه عندو فيها نسبة بس النسبة الاكبر حقة عم فضل ..
ومامعروف عم فضل لمن يرجع حيقول شنو..

....................................................................................................

ظلال المظالم
الحلقة 12
بقلم طارق اللبيب
على طول اتصل اب حنك على عم فضل وقال ليهو انت وين؟ قال ليهو انا في الطريق جاي عليك ..
قال ليهو خير لمن تصل .. اها لمن وصل لقا اب حنك متحير وخات يديهو في راسو ..عم فضل قال ليهو مالك يا عمر ؟ قال ليهو قروشنا بتاعة الشهر كلها اتسرقت .قال اتسرقت كيف يعني ..؟؟ وراهو..
قال ليهو انا واثق فيك زي ماواثق في روحي بس المفتاح ده اتنسخ ..دي مادايرالا درس عصر ..
وبقى يعاين للعمال البحملو .. وفي كم عاطل كدا بقعدو قدام الدكان مع ست الشاي ..
عمك فضل شك فيهم .. بس ماظهر حاجة لانضم .. وبقى ساكت وعمر داخل في ضفورو واكتر حاجة مأثراهو انو عم فضل ما أتكلم ..
اب حنك قال ليهو نتصل على ناس الشرطة ؟.. عم فضل قال ليهو .. لا مافي داعي القروش دي ماحتتلقي .. نتعوض الله ونبدأ من الصفر ياعمر والحمد لله على كل حال ..
عمر قال ليهو لا .. والف لا.. على الطلاق قروشك ترجع لك على داير المليم ..
ودي مسؤليتي عشان انا المؤتمن على الخزنة ..
عم فضل قال ليهو يعني حترجعها من وينياعمر ..؟ قال ليهو انا بعرف ارجعها من وين ..
بس المشكلة في وصولات امانة بتاعات ديون برضو مفقودة ..
لكن انا عارف الناس وممكن يكونو اولاد حلال ويرجعو الدين ..هم خمسة ..
بس عايز مهلة بتاعة تلاتة يوم .. وانا مستحيل تاني ارجع للشغل .. انا خلاص يا عم فضل نفسي قفلت .. عم فضل قال ليهو استهدأ بالله ياعمر الناس بتموت .. والجاتك في مالك سامحتك
نحن الحمد لله في صحة وعافية وقالو(كان سلم العود اللحم بعود ) .. وانا والله اشك في نفسي ولا أشك فيك بس ده حرامي غدر بيك .. انت لازم تشتغل معاي انا بوجودك الحمد لله ربنا فتحها علي فتح مبين ..
والقروش الاتسرقت دي ولاشي مع الارباح الجاتني بي عملك وامانتك
لو قلت تخلي الشغل معاي يادوب ان دمرتني اكتر من السرقة ..
عمر قال ليهو اولا انا أرجع ليك قروشك بعدين نشوف ..
عمر مشى لناس الشرطة وبلغ وجو مالقو اي دليل والبصمات ممسوحة وقالو ليهو لو شكيت في اي زول ورينا ..قال ليهم ما عندي شك في زول.. المهم مشو وقالو ليهو لو لقيت اي خيط اتصل علينا
وخلاص القروش راحت راحت ..
وما اتعرف الحرامي ..
عمر اتصل على الوسيلة وحكا ليهو الموضوع .. وقال ليهو عايزك في اقرب وقت تعرض لي قطعة الارض بأقل سعر ممكن انا عايز ارجع للزول قروشو .. وسعر القطعة يادوب بكون قدر القروش المفقودة .. وانا ببدأ من الصفر .. والحمد لله على كل حال وماعارف اقول لاولادي شنو ..
والله ياوسيلة فرحانين بالقطعة دي فرح ماطبيعي ..
الوسيلة قال ليهو ربنا يديك العافية وان شا الله تجيب غيرها وغيرها ..خلاص انا هسي بعرضها طوالي .. عشان انت ترتاح زاتو من الهم ده .. مشى اب حنك وحكى لاولاده وزوجته الحصل..
وكلهم اتقبلو الموضوع بي رضا تام ..وقالو ليهو ان شا الله تعيش وتجيب غيرها ولايهمك وربنا يعوضنا ..
امشي بيع القطعة .. الوسيلة اتصل على اب حنك وقال ليهو لقينا زبون للقطعة بس السعر بسيط شديد ..يعني اقل من سعرها الاشتريتو بيها بي 25% .. قال ليهو بيع طوالي قال ليهو خلاص تعال عشان تمضى ليهو
وتسلم المبلغ .. ومشى والبيعة تمت ورجع القروش لعمك فضل وكانت قدرو قدرو .. حتى النسبة البتخص اب حنك ما أتوفرت ..
وبي اصرار شديد عم فضل استلم المبلغ واشترط عليهو انو ماحيستلم القروش الا هو يواصل في شغله معاهو واب حنك وافق .. وبدأ يشتغل بي كل ايمان وثبات ..ولمن سلم القروش ارتاح وبقى يتبسم ورجعت ليهو فرحته .. وقال ليهو الحمد لله انو كان عندي القطعة عشان اقدر اشيل الحمل
من قلبي .. والله ياحاج الفضل لو ما سددت القروش دي كان جاتني نفسيات ..
وبدأ عمر المسكين المظلوم من الصفر .. وبقى يضاعف ساعات العمل وزاد الطلبيات ..
وضغط على نفسه شديد وبقى يتأخر في الشغل ..
عفراء حكت لي حسام القصة الحصلت لابوها والتصرف العملو بالتفصيل .. حسام اتأثر شديد .. وازداد حبو لي لاب حنك وتقديرو لأصالته ونقاهو .. وقال ليها فعلا ياعفراء المفروض يكون ده ابوك .. لو زول عفو ليهو القروش في الزمن ده يحمد ربنا ويبقى نايم لكن ابوك زول ضميرو حي الله يديهو العافية ..
قالت ليهو مناي الوحيد يا حسام انا اتخرج واشتغل واريح ابوي على الاقل اشتري ليهو مسكن لانو ده حلمو الوحيد في الحياة انو يكون عندو بيت ملك ان شاء الله اوضة واحدة ..ابوي زول قنوع ياحسام ماعندو اي طمع كتير .. بس همو يربينا كويس ويسكنا في حقنا ..
قال ليها يا عفراء انا بقيت طول اليوم مشغول بيك وبفكر فيك ..
قالت ليهو الله يبارك فيك انا بيك ماليني الامان تسلم .. وبرضو المفهوم ماوصل ليها ..
قال في نفسه انا لازم اقوم اعمل خطوة جريئة لي عفراء يا قبلت بي كحبيب يا فارقتني واليحصل يحصل انا خلاص مابقدر اصبر اكتر من كدا .. وهو عارف لو قام قال ليها اي كلمة كدا ولاكدا .. احتمال يفقدها الى الابد لانها ماعندها اي ملعبة في الحاجات دي .. وزولة اتجاها واحد .. معصلجة تب ..
بس في اللحظة دي في حاجة حصلت قلبت الموازين فوق تحت .. في واحد من ناس الكلية اسمو ياسين اخد رقم عفراء من زميلتها و رسل رسالة لي عفراء .. والرسالة لمن جات كان حسام قاعد ..
.. الرسالة فيها شنو ؟ والحصل شنو؟؟ والنتيجة شنو ؟

....................................................................................................

ظلال المظالم ..
الحلقة 13
بقلم طارق اللبيب ..
عفراء فتحت الرسالة وماعرفت الرقم بس لمن قرت الرسالة قفتلها طوالي وماعلقت اي تعليق .. حسام قال ليها الرسالة من منو؟
قالت ليهو ماعرفت الرقم .. قال ليهاف فيها شنو؟ قالت ليهو كلام فاضي ولايهمك .. انا ماقعدة اشتغل بالكلام الفاضي .. قال ليها ممكن اقراها.. قالت ليهو جدا .. مسك التلفون قرا الرسالة مكتوب فيها .. ماتغشي الولد المسكين ده واحكي ليهو عن ماضيك وجرايمك .. ولا انا بفتك ليهو .. ولو قلتي اسكت نسكت واتصلي..
قال ليها ده شنو ياعفراء الرسالة دي ؟ قالت ليهو ده كلام فاضي .. وزول عايز ليهو معاي موضوع وانا ماعايزة افتح باب زي ده ؟
قال ليها طيب ماضي شنو البتكلم عنه .. قالت ليهو شن خبرني ؟ كمان قال جرايم ! حكمتك ياربي بالغة ..
حسام سكت ساااااااي .. ومخو بقى يودي ويجيب .. في النهاية قال ليها ..
لو في اي حاجة في حياتك وعن ماضيك احسن تكلميني بيها من هسي..
انا رايح اعرف سيد الرقم ده وقال كدا ليه ؟
قالت ليهو جدا اعمل البريحك دام انت مامصدق كلامي وماعندك ثقة
قامو كل زول مشى في اتجاه ..
وعفراء حست انو حسام شك فيها وفارقها وحست بمرارة شديده
وحسام بقى ماطايق روحو ومحبط احباط لدرجة كبيره ..
ويومين ماجا الجامعة وعفراء بتفتش عليهو بالخفاء ولو شافته ماحتلاقيهو ولاحتسلم عليهو لانه شك بسبب رسالة مجهولة الهوية ..
في اليومين ديل اتصل على الرقم خمسمية مرة بجي جرس ومافي زول برد عفراء في البيت بقت ماطبيعية وماقاعدة تاكل وحست بفراغ كبير لا امها لا ابوها لا اخوها ماسدوه .. فراغ شاسع .. الم مرير .. دمعة تنزل في اقل سبب .. وناس البيت لاحظو .. ابوها سألها قال ليها حسام كيف؟ قالت ليهو مابعرف .. وقامت فاتت .. ابوها عرف انو في مشكلة بينها وبين حسام ..
بس قال القى فرصة وبسأل حسام نفسه ..
قام حمد سألها قال ليها ياعفراء انا مش صاحبك قالت ليهو طبعا .. قال ليها انتي مالك ؟ حكت ليهو الحصل .. قال ليها طيب مادام حسام ماوثق فيك .. معناها ماجدير بالخوة .. يلا جليهو وانا اخوك الجد جد ماخوة الجامعة ..
قالت ليهو بس ماقادرة والله ياحمد حاسة بضيق ماطبيعي ..
قال ليها الزول ده انتي عندك نيه تعرسيهو ماتغشينا بقصة اخوي دي . ليهو فعلا ياحمد انا اكتشفت اني مابقدر اتأقلم مع زول غير حسام ..
وحتى لو اتزوجت زول غيرو مابقدر اعيش من دونه .. وهو كمان مابقدر يرتبط باي واحدة غيري انت ماشفت الحصل عليهو لمن قرا الرسالة .. بس انا زعلانة منو لانو شك في اني مع انه بعرفني ..
لكن دي بتكون غيرة ساي .. هسي بكون قلبو متقطع ..
قال ليها طيب انتي مفهماهو انك اختو صح؟ قالت ليهو نعم .. قاليها خليهو عايش على الوهمة دي وواصلي عادي .. قالت ليهو والله انت مرات بتقول كلام حق ناس كبار .. قال ليها طيب انتي قايلاني شافع؟ ..
بعد خمسة ايام في الجامعة حسام جا وابا يلاقى عفراء وكان موجود وبتاشا يلاقيها وهي شافتو برضو عملت رايحة ..
وطيلة اليومين الهو جا الجامعة كان بيقعد براهو وكان مستاء جدا وعفراء ولا هماها كانت تتونس مع صحباتها عادي .. وبقو يٍالو فيها .. ققالو ليها حبيب القلب اليومين ديل زعلان مالو؟
كان طيلة الايام ماخدك مننا ومابتجي تتونسي معانا بس كل ماتشوفيهو تجري عليهو ؟ هسي هو قاعد هناك براهو وحزين ياحرام ..
مرت كم يوم الناس ديل كل واحد قافل على روحو وعفراء تعبت من البعاد اكتر من حسام وحسام بطنو طامة من اي حاجة ومحبط احباط ماطبيعي ولغاية الان ماعارف البت دي ماضيها شنو .. ولسان حالو يقول ياما تحت السواهي دواهي ..
في يوم من ذات الايام وكان في اليوم ده في منتدى ثقافي وأغلبية ناس الجامعة كانو موجودين..
عفراء قاعدة قدام وحسام جا قعد في الكراسي الوراء وبعاين ليها وهي بتتونس براحة مع
صحباتها وكل ماتتلفت عليهو يقبل لجهة تانية .. لمن يعاين ليها هي تقبل لجهة تانية ..
حتى بعض الناس لاحظو للموضوع ..
المهم حسام طلع تلفونو وقعد ينخس بالزهج ساي ضرب في الرقم المجهول قام رن رقم في شنطة بت .. البت طلعت تلفونها وهو يعاين ليها قفلت الخط وعاينت لحسام ودخلت التلفون راجع ..

....................................................................................................

ظلال المظالم
الحلقة 14
بقلم طارق اللبيب ..
حسام طلع تلفونو وقعد ينخس بالزهج ساي ضرب في الرقم المجهول ..
قام رن الرقم في شنطة بت .. البت طلعت تلفونها وهو يعاين ليها قفلت الخط وعاينت لحسام ودخلت التلفون راجع ..
حسام انتظر على احر من الجمر متين ينتهي البرنامج .. ولكن قبل ماينتهي البرنامج البت قامت براااحة طلعت .. وحسام مراقب .. قام طوالي من كرسيهو ومشى وراها .. وطبعا الناس مندمجين كلهم في البرنامج كورك ليها .. لحظة لو سمحتي .. وقفت منططه عيونا وخايفة .. شكلها عاملة عملة ..
سألها عن الرسالة وعن الرقم .. قالت ليهو انا بقول ليك ..
لكن الله يخيلك ماتدخلني في مشكلة .. في واحد زميلنا وزول اخوي شديد اسمو ياسين .. معجب بعفرء شديد .. وقال انت محاوطها من ماجات الجامعة .. ومامدي اي زول معاك طرف فيها .. وقال مافي طريقة يفرقك منها الا بالطريقة دي .. ورسل الرسالة من تلفوني لمن انت كنت قاعد مع عفراء عشان تقراها انت وبدون علمي والله ..ولمن اكتشفت .. هددني وقال لي اوع تتكلمي ولو في زول ضرب ليك ماتردي ..وفعلا انا شايفاك بعدت من عفراء وكنت متألمة شديد ..
وعايز احكي ليكم وماقادرة .. بس لو بتعزني اوعدني ما تعمل مشكلة .. قال ليها كويس بوعدك .. بس انا عندي منك طلب .. امشي قولي لياسين ..
انك لاقيتي حسام وقال انو فارق عفرء وماعايزها خلاص ..
وخليهو يمشي لعفراء ويبدا معاهو تواصل .. قالت ليهو ليه؟ انت هسي عرفت الحقيقة ..
قال ليها اولا عشان يقتنع اني انا ما محاوطها وهي حرة في حياتها .. وتانيا عشان اشوف ردة فعل عفراء .. قالت ليهو حاضر ..
بعد انتهى البرنامج البت كلمت ياسين .. (ياسين طبعا ود راحات من النوعية البتلقاهم يديهم ناعمين .. وشعرهم مجلط .. وشنطتو فيها كريمات .. وجمالو يشبه البنات .. ..
زملاهو مسمنو <ياسين السحسوحه> .. ).. وياسين لمن كلمتو البت ماصدق .. وقبض يدينو الاتنين ونتلهم كدا ليتحت وقال (yesss) .. يعني نعم نجحت الخطه .. والبت تعاين ليهو باستحقار ..
طبعا" طريقة العلاقة بينو وبين البت علاقة صداقة زي صداقة البنات مع بعض بحكو لبعض الاسرار وبتبادلو المنافع المادية كأدوات التجميل والشيتات وهكذا .. بدون اي مشاعر غرامية وغيرا .. (غايتو جنس محن .. )
المهم مازال الجو متوتر (ظاهريا") بين حسام .. وبين عفراء اللهي ح تخضع لامتحان وشيك على يد ياسين ..
بعد بكره ياسين جا لقا عفراء قاعدة براها .. في نفس المكان الكان بقعدو فيهو هي وحسام .
قال ليها السلام عليكم ..
قالت ليهو عليكم السلام ..
قال ليها ممكن اقعد اتكلم معاك شوية ؟
قالت ليهو اتفضل .. الموضوع شنو ان شاء الله ؟
قعد قال ليها الحقيقة انا اليومين ديل زهجان كدا وماعندي برنامج ..
(شوف الحنك البيش)..
قالت ليهو : استعين بالله .. الصلاة في مواعيدها اهم حاجة .. وكل ماتحس بي نفسك متضايق اتوضأ ادخل المسجد اقرا ليك جزء صدقني بتحس براحة ماطبيعية ..
سكت مسافة وبلع ريقو .. وقال ليها انتي انسانة رايعة وانا معجب بيك ..
قالت ليهو .. شكرا" لاعجابك بس انا رائعة دي بعلم بيها علام الغيوب .. الانسان الرائع هو طيب القلب نقي النفس الما لايغدر ولايكذب ولايخون ..
ودي كلها بعرفها ربنا بس .. اما روعة الشكل دي ما بتشكل اي فرق لانو ربنا لاينظر الى الصور والاشكال ..
قال ليها يااااااه دا انتي طلعتي مولانا بالجد ..
قالت ليهو : ياريت وانا اطول ؟..
المهم حس بانو ماقادر يتخاطب معاها وقام عايز يمشي .. قالت ليهو ياسين الله يخليك عندي طلب .. عليك الله غير شكلك وطريقة حياتك وماتحتكا كتير بالبنات لان مامن صالحك صدقني.. وهسي كتير من البنات بكونوا بسخرو منك بيناتهم بدون ماتعرف.. وانا والله عايزة مصلحتك ..
قال ليها الله يجزيك خير ونصيحتك مقبولة .. وطوالي شتت واتلاشى ..
ومشى حكى لصاحبتو بالتفصيل وقال ليها دي واحدة متخلفة ..ياخسارة السماحة.
البت مشت حكت لحسام بالتفصيل هههههه غايتو جنس نقل .. (نسخ ولصق) ..
حسام بكرة الصباح لاقا عفراء في الجامعة ماشة على القاعة وقف ليها في نص الشارع ..
لفت منو بيجاي جاها بيجاي .. لفت بجاي جاها بيجاي .. وقعد يضحك ومشى ..هي طبعا طول اليوم ماقادرة تركز في المحاضرات ومتفاجأة من تصرف حسام الغريب ده .
الزول ده كان زعلان مني ومحبط ..شنو الحصل عليهو فجأة كدا تغير وبقى ظريف؟؟ وكمان عامل فيها بعاكس فيني .. الود ده اكيد حصل لي مخو حاجة ..في اخر اليوم بقى يفتش ليها ولاقاها.. قال ليها عفراء لو سمحتي عايزك .. قالت ليهو خير ..
قعدو قال ليها كيف ناس البيت ؟ قالت ليهو الحمد لله في رضا من الله ..
قال ليها انا آسف اني زعلت منك في حاجة ما عندك فيها ذنب .. بس من حقي.. لاني انا ماعندي غيرك في الدنيا دي .. ومن دونك مابقدر اعيش ولا لحظة .. عليك الله يا عفراء اعفي مني من قلبك لاني بالجد
محتار اراضيك كيف ؟ قالت ليهو انت هسي اتأكدت انو انا بريئة ..؟ وللا اتراجعت ساي؟
قال ليها اتأكدت .. قالت ليهو طيب الحمد لله ..
قال ليها ماعايزة تعرفي الرسل الرسالة منو؟؟؟
قالت ليهو .. لا ..ماعايزة انا وكلت امري لله وتاني ما انا بتدخل في موضوع وكلتو لربنا ..
انا من البداية قلت ليك ده موضوع فارغ وانا ماشغالة بيهو ..
حسام استغرب لمن حس راسو لافي .. قال ليها يابت انتي جنسك شنو؟
والله حيرتيني معاك كلو كلو .. قالت ليهو في شنو ياحسام ؟
قال ليها .. انا بحبك .. بحبك وعايزك تكوني شريكة حياتي ..

....................................................................................................


عدل سابقا من قبل الامبراطور حذو في الإثنين أبريل 18, 2016 11:27 am عدل 2 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.nojoumarab.net
الامبراطور حذو
Admin


عدد المساهمات : 223
تاريخ التسجيل : 22/11/2014
العمر : 26
الموقع : http://sudan.nojoumarab.net

مُساهمةموضوع: طارق اللبيب .. رواية ظلال المظالم من الحلقه 15 -20 والاخيره   الإثنين أبريل 18, 2016 9:55 am

ظلال المظالم
الحلقة 15
بقلم طارق اللبيب ..
عفراء اتخلعت من الانسكابه المفاجأة الحصلت من اخونا حسام .. قالت ليهو.. ربنا يخليك لي يا حسام ..
وحبك عندي من النعم الكتيرة الانعم لي بيها ربنا .. انا عرفتك شديد.. وصح اني اتعلقت بيك كأخ لكن ..
الاحساس ماشي متزايد بي أحترامي ليك وتقديري الشديد .. لاخلاقك وحياءك وتعــاملك معاي .. اماشريكة حياتك دي .. فانا برضو بتمنى كدا ..
قاليها ... بالجــــــد ؟؟؟؟؟!!!!..
قالت ليهو ايوة بالجد ..
بقى يغمض ويفتح ويتلفت كدا متبسم ومندهش ..
وقال ليها انا لمن قلت ليك الكلمة دي ..كنت خايف من ردة فعلها منك .. قالت ليهو صح انا كنت مطمئنة
بانك انت اخوي .. ومترددة من احساسك التاني .. لكن هسي حسيت بيك اخ وحبيب ..
ودنقرت خجلانة كدا وقامت مشت قالت ليهو مع السلامة ياحسام .. قال ليها الله يسلمك ..
وقاعد في مكانو عشره دقايق ماقادر يتلم على بعضه من الفرحة .. اعمل حسابك من السكري ياحاج ..
عفراء مشت البيت .. وحكت لي عشوش نور الحوش امها ..
وقالت ليها يا امي الليلة حسام اتكلم معاي وقال وقال وقال.. قالت ليها مافي مشكلة حسام ماهو الراجل
البيابوهو .. لكن اصبري شوية .. خلي ابوك يعرف (قيرو من قعيقيرو).. لانو مرات يابتي اخلاق الاولاد في
الجامعة مازي اخلاقهم في البيت والحلة .. انتي بس اصبري لينا شوية وانتي لسع يادوبك قدامك زمن عشان تتخرجي ..
قالت ليها حاضر يا امي كلامك كلو صاح والبتقوليهو اكيد هو الصاح والبركة ..
.
اب حنك جاء من الشغل مرهق وتعبان وزوجته قالت ليهو يا عمر الليله حسام ولد صاحبك اتكلم مع عفراء وقال ليها عايزك تكوني شريكة حياتي .. قال ليها الموضوع ده نتكلم فيهو بعدين .. هسي انا تعبان شوية
وشكلو اتدربك واتضايق من الخبر ده ضيق واضح لدرجة انو عشوش لاحظت ليهو ..
وكانت مستعجلة تعرف الحاصل شنو؟
المهم وكت الليل فجه والنجم المسهرج قجة .. والولد واختو نامو عمر اب حنك ساق عشوش ومشى بيها
غرفتهم الخاصة .. وقال ليها جيبي لي موية .. جابت ليهو الموية .. وقالت ليهو في شنو يا عمر خوفتني ..
قال ليها اقعدي .. قال ليها في واحد من الناس الانا مابعرفهم كويس وهو صديق الوسيلة .وكان جاني قبل كدا
مع الوسيلة في المحل لكن ماقعد كتير .. دقايق ومشى مشوار بي عربية الوسيلة ..حتي بعدين جا وطلع مع الوسيلة
المهم الزول ده جاني قبل يومين في محل الشغل .. وقعد معاي وقال لي انت متذكرني؟ .. قلت ليهو ايوة متذكرك .. قال لي انت عندك قروش اتسرقت ؟ قلت ليهو نعم .. ربنا يعوضني .. قال لي انا عارف الزول السرق القروش .. لكن انا عايزك تعاهدني .. ماتفتح خشمك بس تعرف قروشك راحت وين ..
قلت ليهو جدا بعاهدك.. والله مابجيب اسمك في اي حاجة.. وانا القروش قنعت منها بس عايز اعرف الشالا منو ..
ومنو الخايني .. قال ليهو قروشك شال الوسيلة وكان عندو ديون احتمال توديهو في ستين داهية وسدد بيها ديونو كلها ..
والوسيلة زول خاين يا اب حنك ابعد منو ..ده افعى... انا لمن جيتكم استغربت في خوتك معاهو..
وهو بتكلم عنك اسوء كلام ..وقصة السرقة دي مافي زول عارفها غيري.. لاني انا مشترك فيها..
تتذكر لمن انا طلعت بي عربية الوسيلة؟ .. وجيت راجع؟ .. هو اداني مفاتيحك عشان انسخها ..
وقال لي (في مستندات ديون علي. في خزنة اب حنك انا عايز اسرقها .. لاني هسي ماعندي ليها طريقة اسددها ..)
لكن انا بعدين اكتشفت انو نسخ المفاتيح عشان يسرق القروش ..
ودي الحقيقة ياب حنك انا بصراحة لمن عرفت الزول سرق القروش ندمت على اني ساعدته لكن والله كانت نيتي انو يتمهل في السداد ..لاني عارفو مزنوق .. حتي في خمسة وصولات امانة شالهم معاهو مضرة ..
يعني الزول ده حاقد عليك حقد ماطبيعي .. (كده انتهت الحكاية البحكي فيها اب حنك لعشوش )
والله ياعشوش انا جاتني نفسيات عديل ..والله انا كنت واثق في الوسيلة وفي خوته وانصدمت صدمة حصل لي بيها خلل في الاعصاب .. فانا ياعشوش مستحيل اخلي بتي تتزوج من أسرة الوسيلة ..
وهسي بي عهدي للزول ماقادر افتح خشمي مع الوسيلة وقريشاتي اصلا" راحت ..وهو مادام سدد بيها دينو .. الحمد لله مامشت في الفاضي .. لكن عارفة.. انا لو الوسيلة وراني انو متضايق في
ديون انا كنت بقيف معاهو ولو كلفني الموضوع بيع القطعة ..
مامشكلة .. انا عارف الوسيلة بي املاكه ومافي حاجة بتضظراهو يسرق .. عشان كدا انا عايزك تقنعي عفراء انها تصرف النظر من الولد الاسمو حسام ده ..ودي حكاية بالمنطق كدا انا كشفت ليك كل حاجة .. ولو عندك راي انا بسمعه ولو عايزاني احكي ليها بحكي ليها ..
بس عشان بتي ماتتخوزق .. وتدخل في حياة مظلمة وبعدين تندم وتلومنا ..
انا خلاص خوة الوسيلة وارتباطي معاهو انتهت بالحكاية دي وقريشاتي يعوضني صاحب العوض
لكن بتي مابفرط فيها لي ناس زي ديل .. حتى لو حسام كويس .. ده مابهمني ..بعدين احفادي يكونوا احفاد الوسيلة ؟؟..
مسسسسستحيل

.....................................................................................................

ظلال المظالم ..
الحلقة 16
بقلم طارق اللبيب ..
طبعا عشوش اول شي فكرت في كسر خاطر عفراء .. وأول مرة تشوفها فرحانة بالدرجة دي .. وفكرت في خيبة ظنها بي عمها الوسيلة .. اللهي معجبة بيهو اعجاب شديد .. وده كلو حيأثر على نفسياتها ..
خصوصا" امتحانها على الابواب .. فقامت قالت لأب حنك هسي انت ياعمر حتعمل شنو؟ ..
قال ليها قروشي عفيتها ليهو وربنا يعوضني ..لكن بتي مابتدخل بيتو .. وعلاقتي بيهو انتهت .. يعني هو كسب القروش وفقدني وفقد سعادة ولدو ..
عشوش قالت ليهو طيب.. انا عندي منك طلب الله يخليك بس طلب وحيد .. ماعايزين عفراء تعرف الموضوع ده لغاية الامتحانات تخلص ونكلمها بطريقة سياسية كدا رايك شنو؟
قال ليها بس المشكلة انا خايفها تتعلق بالولد اكتر .وبعدين تبقى الفكه منو صعبة على قلبها ونفسياتها .. قالت ليهو ولايهمك ..كان على دي هينة..
انا بوصيها تكون غير متأكدة من العلاقة دي ..
وبحسسها اني مارضيانة حه حبة .وهي بتهتم برضاي اكتر من اي شي في حياتها ..
قال ليها مامشكلة انا واثق في تصرفك.. واعملي البتشوفيهو صح بس انا في النهاية بحملك المسؤلية ..
بكرة الصباح طلعت عفراء بي نفس فرحتها الكبيرة ..
اما اخونا حسام ..فأصلا" اليوم داك مانام باللي من الفراحة وقام لبس من الساعة خمسة صباحا
وحس باليوم ده مختلف ..والشمس طريقة شروقها غير باقي الايام ..والهوا والنسيم الصباحي له طعم لاول مرة يمر عليهو .. وحاسي بانو نفسو يصرررخ في الشارع ويقول يانااااااااس انا فراحان ..
وصل الجامعة قبل الناس ووقف جمب الباب.. وقال انا ح انتظرها واقف هنا بره عشان لازم اشوفها قبل كل شي وبعدين امشي على دراستي ..
وقف ووقف لامن كرعيهو يبسن من الوقاف.. بعد شوية قعد ليهو في حجر ووخت شنطتو قدامو ..وبكتب في الرسايل ويمسح .. ويكتب يودي اصبعو على (ارسال) ومابرسل وتاني يمسح ....
غايتو الزول ده حاصلة عليهو حالة عجيبة .. (ياحسرة موعارف حاجة)
والتقوا في نهاية اليوم.. وبدو يخططوا لي حياتهم ومستقبلهم.. وينسجو احلام وامنيات خيالية.. ماعارفين مصيرها ..
بس الملاحظ انو عفراء ازدادت خجلا" بعد بوحها بمشاعرها .. وكانت طيلة الوقت مدنقره ..
وتتكلم براحة ..وتتبسم مع الارض .. قالت ليهو انا تاني مابقدر اقابلك كتير انا بخجل شديد ياحسام.. لو عايز راحتي خليني شوية .. انا كدا مابقدر ..
قال ليها ما مشكلة ..انا بتلبد ليك كل ما أشوفك قاعدة في حتة بقعد بعيد واعاين ليك ..
قالت ليهو لالالا الله يخليك ..كدا بتخليني متوترة طول الوقت ..خلاص مامشكلة بلاقيك ..ومرت الايام وعاشو فترة في فرحة محكوم عليها بحكم مجهول ..
في يوم من ذات الايام والايام حبلى بالمفاجآت .. الوسيلة تعب في السوق .. والضغط ارتفع عليهو ..
وراسو كبس .. والصداع داير يفقش ليهو راسو ..الكلام ده زي الساعة اربعة عصر ..
وفتش في جيبو مالقى الحبوب ..ضرب لناس البيت قال لزوجته وين حسام..؟
قالت ليهو يادوب جا من الجامعة . ياهو دة بتغدا .. قال ليها حبوبي في دولابي ومفتاح الدولاب في كراع السرير ..افتحي الدولاب اديهو الحبوب اللبنية يجيبها لي هسي في السوق.. انا تعبان ..
السرير بتاعو سرير حديد بمواسير.. وماسورة كراع السرير مقفولة بي غطاء بلاستيك اسود من فوق وغطاء من تحت ..فتحت الغطاء وطلعت المفتاح .. وادتو لحسام .. وقالت ليهو في دولاب ابوك .. الحبوب اللبنية .. بتلقاها في الضلفة اليمين .. مشى فتح الدولاب عشان .. يشيل الحبوب لقى اوراق.. فتحها لقاها وصولات الامانة بتاعة اب حنك .. !!!!!!!
مكتوب انها لعمر .. وهي خمسة ايصالات ..نفس الحكت ليهو بيهن عفراء ..الكانو في الخزنة مع القروش الاتسرقت ..حسام قعد في السرير مغموم مكروب كرب عظيم محبط وقعد يبكي زي الشافع .. اكتشف حسام الجريمة الارتكبها ابوه في الزول الطيب عمر اب حنك .. عمر الحبيب .. الكان بفتخر بخوة ابوي .. وبتكلم عنه بكل معزة
ياخسارة يا أبوي .. ياريت لو ماكنت ولدك ..

.....................................................................................................

ظلال المظالم ..
الحلقة 17
بقلم طارق اللبيب ..
حسام قام سريع وخت الحبوب والأيصالات في جيبو واتحرك ..مشى وقف في الشارع عايز يحصل ابوهو سريع ومتوتر واقف في الشارع .. عايز امجاد تكسي اي حاجة بس توصلو بسرعة .. فجأة كدا مر قدامو واحد من اصدقاهو سايق موتر قال ليهو عليك الله سريع انا ابوي تعبان في السوق .. يا اديني الموتر يا أرح وصلني بسرعة .. قال ليهو اركب .. وقالو كدي خرتو الشارع .. طررررر طررر .. ويخرمو للعربات ويزوغو بيجاي ويزوغو بيجاي ..
ظلع ليهم واحد بتاع حافلة .. داخل غلط وحصل الحصل .. كبسو الحافلة بالموتر وكل واحد طار في جيهه والموتر في جيهة ..
وهناك الوسيلة تعبان وزملاهو السماسرة والعاملين اصحابه كل واحد زاغ علي جيهة .. وهو حاسي انو ماشي في غيبوبة .. جمبو واحد قال ليهو علي الله اضرب لي لي عمر اب حنك قوليهو الوسيلة تعبان في السوق ..
الراجل اتصل على اب حنك وماهي الا عشرة دقايق .. واب حنك وصل بي امجاد وهو وشفقان ومتوتر ..وبمجرد ما ابحنك وصل وسلم علي الوسيلة الوسيلة رد عليهو بي اخر نفس ..
ودخل في غيبوبة .. وبي نفس الامجاد شالو وداهو المستشفى ..
وفي الشارع اب حنك مستغرب في نفسو من تساؤلات كتيرة ..
ليه الزول ده ضرب لي انا بالذات ؟ وليه انا شفقان عليهو كدا ومتوتر على سلامتو؟بالرغم من العملو معاي؟ ..
وصل المستشفي واسعفوه سريع والحمد لله اتجاوز الحالة .. وكانت جلطة مضمونة لو ما أدت بي حياتو كانت شلته ..
وقاعد معاهو لغاية الساعة 7 مساء واتصل على ناس عشوش ..
وماكلمهم انو مع الوسيلة .. قال ليهم واحد صاحبي في المستشفى ..
بعد لحظات شاف زوجة الوسيلة حايمة في المستشفى وهي ماعارفة انو الوسيلة في المستشفي جاية لحسام ..
لانو ضربو ليها انو حسام حصل ليهو حادث .
واب حنك عمل فيها ماشايفها .. عشان حالة الوسيلة ما بتستحمل تشوفها كدا .على كل حال زي الساعة 9 بالليل .. الوسيلة بدا يفيق .. واول ما عينو وقعت على اب حنك قاعد جنبو في السرير
الوسيلة رمى ليهو دمعتين وهو ماقادر يتكلم .. اب حنك قام جري نادى الدكتور المناوب .. الدكتور قال للوسيلة ..
ارفع يديك رفعهم .. ارفع رجليك رفعهم .. الدكتور قال ليهو حمدلله على السلامة دي مرقت منها بفضل الله على يد اخوك ده
لو اتاخر عشرة دقايق انت كنت بتضيع يا وفاة ياشلل .. لكن الحمد لله .. نعم الاخ واقف عليك زي التقول انت ولدو ..
الوسيلة تاني عاين لي اب حنك ورمى دميعاتو .. اب حنك جا قعد جنبو ومسح ليهو الدموع بالملاية
وقال ليهو ..الوسيلة ياخي خلاص ماتبكينا .. والدكتور واقف جنب الباب شايل الفايل ويعاين ليهم والعبرة خانقاهو ..
الدكتور قال لي اب حنك.. اسمعني فضلت حاجة واحدة .. اخوك ده لسه ما اتكلم ..
احتمال تكون في مشكلة في الكلام لو اتكلم معناها نحن تمام.. الوسيلة قاليهو انا تمام يادكتور بس غالبني اتكلم ..
من الاحراج من اخوي ده .. الدكتور قال ليهو طيب الحمد لله ..مافي زول بيحرج من اخوه وطلع ..
الوسيلة قال لاب حنك.. يا عمر انا عايز اعترف ليك بي حاجة قبل ما أموت ..
اب حنك خت يدو فوق خشم الوسيلة وقال ليهو.. لا .. بعدين هسي انت ارتاح بس ..
..اول مارفع ابحنك يدو .. الوسيلة قاليهو قروشك شلتهم انا .. وسددت بيهم ديون وشيكات .. وندمت ..
وماعارفت اقولك كيف .. لكن وعد حا ارجعهم ليك .. والله ح ارجعهم ليك ياعمر .. عليك قولي عافي ليك ..
قال ليهو عافي ليك والله عافي ليك بس انت ارتاح ..
قال ليهو انت قايلني بهضرب لكن والله شلتهم انا ..
قال ليهو خلاص لو بتعزني اسكت خلي الموضوع ده بعدين ..
الوسيلة قال ليهو وين حسام؟ انا ضربت ليهو قبيل العصر يجيب لي الحبوب .. قال ليهو والله ماعارف ..
انا جيت لقيتك في السوق بتقطع في الزبد ..واصحابك الخيبانين بتزاوغو ..!!
قال ليهو انا ياعمر تعبان قبل ماتجيني انت بساعة.. كلهم ركبو عرباتهم ومشو ..
(قالو المواقف بتبين ليك صديقك من عدوك .. )
ابحنك قال ليهو بالمناسبة انا شفت ام حسام قبيل حايمة هنا بس ابيت اوريها..
لانو حالتك كانت مابتستحمل جوطة حريم وبكا ..قاليهو احسن ماعملت ..
دي زولة شفوقة كان جات كانت كتلتني بالجد .. شيل التلفون ده واضرب ليها .. اب حنك ضرب ليها من تلفون الوسيلة ..
اول ماردت .. قالت ليهو انت وين ياوسيلة .. نحن في المستشفى حسام عامل حادث ..تعال سريع ..
اب حنك عاين للوسيلة وقال ليها انا عمر الوسيلة نايم .. لحظة انا برجع ليك ..
وابا يقول للوسيلة عن حسام حاجة .. شال التلفون وطلع برة .. وقال ليها انتو وين ؟ مشى لقى حسام حالتو كويسة بس ظليط ورضوض خفيفة .. ..
وقال ليهم ابوكم كويس انا هسي كنت معاهو قبيل تعب وانا جبتو المستشفى لكن هسي هو كويس ..
حسام حاول يقوم معاهم ومشى لي ابوهو ..والولد التاني الحمد لله زلطة ما انزلط ..
ابوهو لمن شافو راسو ملفوف قال ليهو مالك ياولد؟ قاليهو وقعت من الموتر وقعة خفيفة ..
الدكتور جا وقال ليهم انتو كويسنين الحمد لله الصباح بنخرجكم ..
الوسيلة قال لاب حنك انت امشي البيت طمن الاولاد انا كويس ..
قال ليهو الاولاد انا ضربت ليهم وقلت ليهم بايت بره .. انت اخد راحتك ..
وطلب امجاد لحسام وامو ومشو البيت لانو حسام لسه راسو لافي ..
وقعد مع الوسيلة لغاية الصباح .. والصباح رباح ..

.....................................................................................................

ظلال المظالم .
الحلقة 18
بقلم طارق اللبيب..
اب حنك في المستشفى راقد في البلاط في سباتة ومتغطي بيشالو وكل بعد ساعتين بصحى بقوم يعاين للوسيلة بلقاهو نايم مرتاح.. وتاني يمشي ينوم لغاية الصباح .. خرجوهم وساقو طوالي وصلو البيت .. وهناك طبعا حسام قاعد .. بعاين لابوهو بعين احتقار .. وبعاين لي عمر بعين اعجاب واحترام وتاثير عجيب .. وطبعا" هو فاهم انو عمر ماعارف الجريمة مرتكبها ابوهو .. وماعندو علم انو ابوهو اعترف .. عمر ودعهم ومشى طوالي البيت وشوية كدا لبس ومشى لشغله .. عفراء طبعا مشت الجامعة ومالقت حسام وسألت منو .. اتصلت عليهو وعرفت الحصل عليهو كلو .. وحصلت معاها حاجة في الجامعة .. هي شنو؟ حنشوف لي قدام .. هناك حسام قام الصباح طلع من البيت شايل حاجة في يدو ..
بدون مايحس بيهو اي زول ابوهو راقد في البيت طبعا" .. والكلام ده قبل الفطور .. حسام مشى طوالي لي مكتب محامي .. وقال ليهو دي اوراق بيت بي اسمي ..عايز احولها في اسم عمر.. ده اسمو بالكامل .. وحولها فعلا ..ودفع حق المحامي وشال المبايعة ..وركب طوالي مشى على عمر في مكان شغله .. والايصالات كانت معاهو في جيب الجينز .. ومعاها الحبوب حقة ابوهو لسع قاعدة في جيبو من امس الظهر ..
لمن وصل لعمر عمر اتفاجأ بحسام.. وقام استقبله استقبال بي فرحة .. واكرمه .. وقال ليهو ليه طلعت من البيت بي حالتك دي؟ انت لسه راسك مضروب كان تاخد راحتك .. حتي الجامعة المفروض تاخد لك يومين تلاتة ..
قال ليهو والله جابتني ليك حاجة مهمة ..وموضوع ضروري .. المهم انا بحكي ليك حاجة.. وماتسألني كتير .. لاني في اسئلة كتيرة اح اقدر اجاوبك عليها ..
طبعا" انت عندك قروش اتسرقت واضطريت تبيع قطعتك عشان تسدد قروشك لصاحب العمل .. انا ياعم عمر ابوي كان مضايق في قروش .. وكان حيتسجن ويسبب لينا فضيحة انا مافكرت في زولغيرك .. لكن خجلت اقول ليك
عايزين قروش .. وده غلط مني وعدم فهم .. المهم رسلت لي ناس وشالو القروش من خزنتك .. وندمت على الفعله دي ..
وهسي عايز اصلح غلطتي.. عمر قال ليهو ياحسام ماتغطي على ابوك .. .. انا عارف الحاصل .زي ماهو ابوك ..هو اخوي .. وحقو ياهو حقي ماتشيل هم .. انا ظبطت مواضيعي ..وهسي الامور تمام التمام .. والقروش وكت تحل
كربة اخوك ماوقعت واطا .. بس انت عرفت كيف انو ده ابوك؟ حسام دنقر في الارض .. وقال ليهو انا لقيت الايصالات بتاعة الديون ..بالصدفة في دولاب ابوي ..
وواصل حسام قال ليهو مافي مشكلة ياعم عمر كان ابوي كان انا في النهاية حقك لازم يرجع ليك .. انا ابوي سجل لي بيت بي اسمي .. وهو طبعا" حقو ومن عرق جبينو .. انا مشيت المحامي .. وسجلت ليك البيت بي اسمك ..
هو طبعا" قيمتو اكتر من القروش لكن انا عافي ليك الباقي هدية لاني زي ولدك .. وحقك في رقبتي اكتر من ده لانك عارف وسترت ابوي ..
عمر قال ليهو مستحيل اقبل بالموضوع ده .. ده شنو العملتو ده ياحسام .. انت استشرت ابوك ولا اتصرفت براك ؟؟
قال ليهو ابوي ماعندو لسان يتكلم .. وانا عضبان منو وماقادر اعاين في وشو ..
قال ليهو تعال وقفل الدكان وشال الاوراق ومشو للوسيلة في البيت .. وعمر قال للوسيلة .. يا الوسيلة حسام ده اتصرف تصرف من دون علمك وانا ما موافق عليهو .. ولازم يكون عندك علم بالحاصل ..
الزول ده مشى المحامي وسجل بيتو بي اسمي .. لانو كشف الموضوع الحاصل بينا ..
الوسيلة قال ليهو كشفو كيف الكلمو منو؟ انا كنت عايز اعالج الموضوع بدون مازول يعرف .. حسام وراهو انو لقى الايصالات في الدولاب ..
الوسيلة قال لي حسام .. والله ياحسام طلعت ارجل من ابوك ..
مع اني اعترفت لي عمر وطلبت منو السماح .. بس انا موافق على تصرفك .. البيت من الليلة حق عمر اخوي الوحيد .. وياعمر علي الطلاق البيت ده تاني محرم على مابدخل علي .. ان شا الله تسجلو وقف خيري ..
ده بقى بيتك .. وياعمر اديهو عقد الايجار بتاع الناس المؤجرين البيت .. من الشهر الجاي يستلم حق الايجار هو .. بس الحمد لله انو حسام اتصرف .. عمر قال ليهو بس يا الوسيلة قيمة البيت اكتر من قروشي تلاتة ارعة مرات
الوسيلة قال ليهو .. انا قربت افقد خوتك اعتبر الزيادة دي اني فديت روحي عشان خوتك ترجع لي .. علي الطلاق تاني ماتقول كلمة طلقانة ام حسام تاني ما تفتح خشمك .. حسام عاين لي ابوهو بفخر واعجاب واتحولت تلك النظرة الكانت الصباح ..
عمر اب حنك قال ليهو والله ياجماعة انا والله ما عارف اقول شنو ؟ خلاص مافي مشكلة .. (سبحان الله على هذا الظل العظيم من ظلال المظالم ) وواصل عمر بتكلم قال لحسام .. لكن ان شا الله ياحسام البيت يرجع ليك بي ستو
(يقصد انو حيزوجه عفراء ) الوسيلة قال ليهو نتمنى والله يا عمر والله انت نسبك شرف .. حسام قال ليهم ..
يابختي والله احمد الله .. بيتي يرجع لي وكمان حبيبة عمري .. يارب نعمك لاتحصى ولاتعد .. الوسيلة قال ليهو شايفك شايل كلام عفراء كلو ههههههه .. لكن ياجماعة في مصيبة حاصلة مع عفراء في الجامعة .حتقلب الموازين فوق تحت . وحسام ماجايب ليها خبر ..
ودي حتجوط الحكاية جوطة شديدة خلاص .. ربنا يستر ..
الحلقتين الاخيرتين ..
......................................................................................................

ظلال المظالم ..
الحلقة قبل الاخيرة 19 ..
حسام فرحان فرح ماطبيعي .. واب حنك قبل مايطلع .. قال للوسيلة طبعا ياوسيلة انا بتي مابتخفي علي اي حاجة..
وعارف تفاصيل العلاقة البينها وبين حسام .. وانا شخصيا" ماعندي اي مانع .. وام حمد كمان موافقة ..
الوسيلة قال ليهو والله انا كنت بتمتى طول حياتي انو ولدي الوحيد يلاقي البت المناسبة والنسب المناسب والحمد لله..
ربنا تم مناي .. اها ياجماعة متين العرس ؟ عمر قال ليهو الاولاد يحددو ويكلمونا .. الوسيلة قال ليهو : انا يا عمر
من الليلة تاني سوق السماسرة (عودي فيهو عود مرة) .. طبعا" دي لفظة بقولوها الناس زمان لانهم كانوا مابقسموا للمراة في الميراث .. طبعا" هو موضوع ضد الشرع .. لانو ربنا قال .. للذكر مثل حظ الانثيين .. الوسيلة يقصد يعني ماعندي فيهو نصيب .. بالعربي تاني ماماشي لسوق السماسرة .
عمر قال ليهو والله مي شغلة .. والناس الفيها ممكن الواحد يبع امه عشان القرش .. الامن رحم الله ..
الوسيلة قال ليهو عندي كم نفر كدا دايرين مني قريشات وهي بسيطة .. بسددها وبشوف لي شغلة تانيه ..
الوسيلة قال لي عمر وحسام يا اخوانا انا عندي طلب .. انا ماعايز لاعفراء ولا ناس بيتكم ولاناس بيتنا يعرف باي
حاجة حصلت بينا نحن التلاتة حتى البيت انا ايزو يكون عبارة عن بيع وشراء في راي الناس .. عمر ضحك وقال ليهو
اصلا بيع وشراء بس انا دفعت القروش قبل استلم البضاعة هههه ضحكو كلهم وعمر ودعهم وطلع ..
المهم عمر لقى البيت مبني وباااااارد وخطب لي بتو وجا مارق .. وشايل اوراقو بكل فرحة وارتياح ..
شال اوراقو ومشى السوق واتصل على زوجته وحكا ليها الحاصل لانها هي الوحيدة العارفة قصة جريمة الوسيلة ..
وقال ليها تصمي خشمك زي الكانك ماعارفة حاجة. الراجل تاب ورجع وحالو اصلح واداني بيت قدر قروشي اربعة
مرات .. عشوش قربت تزغرد .. وقالت ليهو انا زاتي ماعارفة حاجة انت متين كلمتني؟ ..ههههه اها هادي سكتة ..
هناك في الجامعة طبعا لمن عفراء مالقت حسام واتصلت عليهو وهي كانت في القاعة قبل بداية المحاضرة وقبل
الدكتور المحاضر يدخل حتى .. ودار بينا وبين حسام الحوار التالي ..
عفراء الوووووو ياحسام انت وين ؟
حسام : كيف ياعفراء انا في البيت ؟
عفراء : مالك ان شا الله خير ؟؟
قال ليها والله امبارح ابوي اتصل انو تعبان من السوق .. وناسي الحبوب في البيت انا شلت الحبوب موديها ليهو ..
ركبت موتر مع واحد صاحبي حصل لينا حادث ........... هنا تلفونو قطع كهربا وفصل .. وبتكلم معاها مواصل وهي ماسمامعاهو وقال
((نحن هسي كويسين .. وحاجة كانت خفيفة الحمد لله)) الكلام الاخير ده عفراء ماسمعته لان الخط كام مفصول ..
حاولت تتصل بتلقى التلفون مقفول والدكتور المحاضر دخل وبدا المحاضر .. وهي اظنها في المحاضرة حاولت تتصل خمسين مرة ..
وخـافت شديد وصدعت صداع غريب .. وحصلت عليها حالة ماحصلت عليها قبل كدا .. في اثناء المحاضرة وطلعت من المحاضرة تجري وتبكي وراسها داير يتكسر من الصداع .. الطلاب طلعوا ن المحاضر والبنات قامن جاريات وراها
ومسكوها .. واغمى عليها .. وده كلو من الخلعة .. وانو حسام ماخت بالو انو البتكلم معاها دي بت .. وعواطفها غلابة واعصابها ضعيفة .. حتى لمن تلفونو قطع ما انتبه انو يرجع ليها ويطمنها ..
المهم شالوها لي اقرب مستوصف .. وادوها درب وتم اسعافها .. لمن عادت لوعيها قالت ليهم انا ماشايفها
انا ماشايفة ..
وعفراء فقدت بصرها نهائي .. من جراء الصداع الحاد الدكتور بتاع المستوصف قال ليهم احتمال الصداع الشديد يكون عمل نزيف .. ربنا يستر النزيف بعمل تهتك في الشبكية .. ودي حتكون عمياء طول حياتها ..
عفراء طبعا خافت شديد وماعارفة تخاف من شنو ولاشنو ؟ من هنا خوفها على حسام وماعارفة الحصل عليهو
ون هنا خوفها على عيونها من الذهاب الى الابد ..
قالت لزميالاتها الواقفات معاها عليك الله يافلانة هاك تلفوني ده فتشي لاخر رقم انا اتصلت عليهو تلقيهو حسام الوسيلة اتصلي عليهو واساليهو ؟ امبارح حصل ليهو حادث شوفيهو .. كويس ؟؟
قالت ليها ياعفراء هسي نحن في شنو وانتي في شنو؟ قالت ليها اتصلي انا حتى لو عمياء مامشكلة المهم عايزة اشوف حسام يارب مايكون حصل ليهو حاجة ..

.......................................................................................................

ظلال المظالم ..
الحلقة الاخيرة
بقلم طارق اللبيب .. 20
البت اتصلت وحسام رد عليها .. وقال ليها انا كويس الحمدلله .. كانت زليطات خفيفة وهسي انا حايم بكرة بجي الجامعة .. قالت ليهو ياحسام في مصيبة حصلت لعفراء .. تعال لينا في المستنتوصف الفلاني ..
قال ليها لاحصل ليها شنو؟
قالت ليهو عفراء عمت وفقدت بصرها .. حسام قام يجري .. واتصل على عمر واتلاقو في المستوصف ..
وعرفو كلام الدكتور .. ودخلو على عفراء لسه كانت تعبانة من الصداع والصداع بدا يخف من ما عرفت انو حسام كويس .. واطمأنت عليهو ..
حسام لمن دخل عليها وسلموا ابوها اتجرس شديد لمن عرف انها فقدت بصرها لكن حسام كان ثابت ماشا الله ..
قالت ليهو ياحسام خلي ابوي والناس يطلعو بره وخليك معاي براك عايزة اقول ليك كلام ..
الناس طلعو برة .. وقالت ليهو ياحسام صراحة انا حسيت اني مابحبك .. وماعايزاك .. ياريت تكنسل الموضوع وتلغي اي وعود كانت بينا ..
قال ليها يابت انتي جنيتي انا مابقدر اعيش من دونك .. قالت ليهو بس انا عمياء .. وحكون عمياء طول حياتي ..
قال ليها عمياء مكسرة طرشا بكما .. ده مابهمني البهمني انك تكوني معاي .. وامها لسه ماعارفة الحاصل ..
كدي سيبي الكلام الماعندو طعم نحن عايزين نطلع نعمل كشوفات .. وتحاليل ونتأكد .. لانو كلام الدكتور ده مجرد اتهامات ساي وتخمين .. المهم شالوها من المستوصف على طبيب مختصص .. للكشف الدقيق ....
المهم شالوها من المستوصف على طبيب مختصص .. للكشف الدقيق ....
بعد الكشف الدكتور قال ليهم .. ده نوع اسمو العمى الموؤقت ومامنو خوف ..
حسام قال ليهو يعني شنو عمى مؤقت يادكتور ..
الدكتور قال :
يعرف العمى المؤقت بأنه الضعف الشديد المؤقت الذي يصيب النظر، والناتج عن أسباب مختلفة ..كوجود جلطات في الشرايين التي تغذي العين، أو ارتفاع مؤقت في ضغط العين، ويترافق العمى المؤقت مع الصداع النصفي وحالات أمراض القلب والشرايين.
وضيق أو تصلب شرايين الرقبة والجلطات الدموية الناتجة عنه يؤدي الى التأثير على تدفق الدم الى العين مما يسبب العمى المؤقت أو المستمر، فإذا تكونت جلطة في أي مكان داخل الشريان الذي يعمل على تغذية العين، ومرت هذه الجلطة في الشريان بسرعة، فسينتج عنها عمى مؤقت، وإذا ثبتت الجلطة فإنها ستسبب ضعف نظر ثابتا، وهذه الحالات عادة ما تظهر عند كبار السن من 50 سنة فما فوق وأحيانا عند صغار السن، ويشعر الإنسان في هذه الحالات بعتمة في النظر لمدة محددة بلا ألم ويعود بعدها النظر لطبيعته.
والإصابة المتكررة لضعف النظر المؤقت عند كبار السن قد تكون أول الأعراض لضيق الشرايين، وهذا يستدعي الفحص الكامل والعلاج والتدخل الجراحي في بعض الأحيان خوفا من حدوث جلطة في المخ في المستقبل، كما يمكن
ان تسبب أمراض صمامات القلب بعض الجلطات المؤدية الى عمى مؤقت أو مستمر، وهذا النوع يصيب الكبار وصغار السن أيضا.
ومرض الصداع النصفي يصاحبه أحيانا عمى مؤقت وهو مرض شائع جدا ويعمل على انقباض الشرايين التي تغذي العين.
الاخير ده النوع العندها .. عفراء يا استاذ بي سبب الصداع الحاد حصل ليها ضغط عالي في العين وتقلص الشرايين أعاق تدفق الدم مما اثر اثر طبيعي للنظر تعود بعده الى طبيعتها في غضون ساعات ..
وحولهم على مستشفى خاص بيهو لمدة اربعة وعشرين ساعة تحت العناية الطبيه . و فعلا الحمد لله كلها ساعات
وبدا النظر يرجع لعفراء شيئا" فشيئا" ..وقبل المغرب اتصلت امها على عمر وقالت عفراء ماجات قال ليها عفراء في المستشفى معاي .. عندها صداع لكن هسي كويسة ..جات عشوش المستشفى هي وحمد لمن امها وصلت المستشفى لقت عفراء نظرها رجع ستة على ستة ..
ولقت حسام واقف عليها زي التقول اخوها جد جد.. ولقت الوسيلة وزوجته وبناتو .. وهي جات وحمد وكل الاسرة ..متحلقين حول سرير عفراء.. وبتبسمو وهي عاينت ليهو كدا بكل اعجاب ..
وطلعو بكل فرحة والامور مشت تمام وتاني ماحصل ظلم ولامظالم .. وكل الاسرتين بقو على قلب واحد حب ومحنة وتربط وانسجام وصداقة وخوة .. وسير على منهج النبوة .. وتم المراد لي حسام وربنا قسم ليهو عفراء ..
وعاشت الاسرتين في وئام تام ..

.......................................................................................................


عدل سابقا من قبل الامبراطور حذو في الإثنين أبريل 18, 2016 11:22 am عدل 1 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://sudan.nojoumarab.net
 
طارق اللبيب .. رواية ظلال المظالم كامله
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: مكتبة القصص والروايات :: روايات طارق اللبيب-
انتقل الى: